Read kapsiki Job 33 Bible Online

Job 33 - kapsiki bible

Job 33

¹Gha gɛ Job, fa ghena nya geze ŋa 'ya, ghwene sleme yitea pɛtɛa ghena nyi geze 'ya.

²Nya 'ya kaghwene mɛ gɛ, ɗeke ɗeke ghɛnia ɗa kageze ghena.

³Le wənə kwetɛŋe tegeze ŋa ghena 'ya, deke ghena nyi kaganda yategeze ŋa mɛa ɗa.

⁴Sefəa Shala nde pate ɗa, zhɛne mpi ta Nde berete nde ve ɗa mpi.

⁵Ma kenza ŋkɛ kapesle na yite ne, zhɛnete ɗa, hite geva kandɛkwe ɗa, ghereŋe megela ga!

⁶Ma kwa kema ta Shala ne, yipə yipə mə, 'ya perə ne, le rekɛ pate geva 'ya!

⁷Kehi ghazlənə kazhɛ ŋa va 'ya we, kehi kwelea ɗa kata geva ta ŋa we.

⁸Ama nahe na kegha kagezete kafefa sleme ta ɗa vəa ŋkwa nya gegeze ghena na kala nyi:

⁹«'Ya ne, wɛŋe 'ya, jaɗafa va 'ya we. Tiɗiɗi 'ya, fete shɛ va 'ya we.

¹⁰Ama nahe Shala kencake ŋele te 'ya, nahe ŋkɛ kezhɛrete ɗa kala nde jaga ta ŋkɛ.

¹¹Nahe ŋkɛ kehwepeyi seɗa ta ɗa kwa zewe lɛ, ŋkwa nyi ŋkeɗe seɗa 'ya te yave ntsə ŋkɛ te.»

¹²Te nya ne, kageze ŋa 'ya kaɗema kaganda va gha Job. Kwa nza ŋkɛ ne, kwele ma Shala ke wəndə ŋelɛ.

¹³Wa raberə ghəpə na le, gheŋkɛ nya kezhɛnema ghena nyi 'yɛwe na wa?

¹⁴Keghə keghə ntsehwelea geze ghena va Shala, ama wəndə shɛ kave sleme yite we.

¹⁵Kageze ghena ŋkɛ laka yɛ shiwə, laka wəshi nyi newe mbeli heviɗi, vəa ŋkwa nya nza mbeli shelɛŋe yitea hɛ, vəa ŋkwa nya nza hɛ yitea hɛ te gezle ta nci.

¹⁶Tagha ne, kaghwene sleme ta mbeli ŋkɛ ba'a kameɗe hɛ ŋkɛ kakwa keɗaŋe zhigə,

¹⁷yitea zhɛremte hɛ va wəshi nyi ndiremi ndiremia nci ba'a yitea fɛake hɛ kenza kaka kele ghə.

¹⁸Ma tsagha ne, ghenci yaya ŋkɛ va dzawa kwele, ghenci yafɛa ŋkɛ kelə sha mte.

¹⁹Ma te kweci hɛ ne, ka'yɛ wəndə ŋelɛ Shala le ghwene nda zereghwe nya kewele ŋkɛ te gezle. Tagha gɛ, kabare bare ŋkɛ kevə kevə va ɗawa.

²⁰Kakafene nda wənə ɗafa, kanza wəshi kezeme ganji zeɗehwe nda we.

²¹Kanewe newe mbeli nda pahe ŋkɛ, cihwɛŋwɛa'a tene 'yɛ'yɛa ŋkɛ.

²²Tagha gɛ, mɛa kwele ŋkɛ, mbe dzeve ta ka mpə ŋkwa mpia ŋkɛ.

²³Ama ɗa ma ta nde ghwene ta Shala kakemane ŋkɛ, kwete kwetɛŋe hwa ka ghwene ta Shala nyi slibə kezha ncɛ nda slene ta ŋkɛ ke wəndəa shɛ ne,

²⁴katezhɛ heli nde ghwene ta Shala yite, ma ke sha tegeze nda ke Shala: «Yakɛ ŋkɛ va dzawa kwele, nahe 'ya kentsate ntsehwele kembele ŋkɛ.»

²⁵Tagha gɛ, pa nde zereghwea shɛ zhɛrenyɛ kala wəzege, pa zhɛneke geva kase te vəa mempɛhweta ta ŋkɛ.

²⁶Pa ŋkɛ səkwəte Shala nya kefate səkwə ta ŋkɛ, pa dzawa kema ta ŋkɛ le zlama, va nya mbelete ŋkɛ Shala.

²⁷Ntake kagha cimə kwa kema ta mbeli pɛtɛ, ma ke: «Nahe 'ya kese kamene jaɗafa, kese 'ya kahawe va wəshi mahalegə we. Ama kese Shala kave ɗa te 'ya kala nya kehi we.

²⁸Nahe ŋkɛ keyakɛ ɗa va dzawa kwele, nahe 'ya kekemave mpi ba'a waŋe yanewe 'ya.»

²⁹Shala nde mene pɛtɛa wəshi kezha wəndə ŋelɛ, kamene hɛ ŋkɛ kevə kevə.

³⁰Gheŋkɛ ɗe kazhɛne ŋkɛ same kwa kwele ba'a kaɓele waŋea mpi kənə.

³¹Ntsagwe Job, fa ghena ta ɗa megela. Nza divə, mba ghena va 'ya kageze ŋa.

³²Ma kenza ghena va gha kazhɛne ɗa ne, gezete, kwa nza ŋkɛ kateve ŋa 'ya kawəndə nya tiɗiɗi.

³³Ma keɗema ghena va gha ne, fa ɗa ŋa ɗa. Nza divə, 'ya kateteke ŋa ntsehwele.