Read kapsiki Job 6 Bible Online

Job 6 - kapsiki bible

Job 6

¹Tagha gɛ, ma ke Job zhɛnete:

²«Amaga! Kaɗe 'ya kadzeghete yaka ta ɗa mbeli, kaveyi ndiremi nya te 'ya mbeli te kiləwə!

³Ɗaŋeɗa ma nza ŋkɛ ke ndaleghe nya kwa hələ, vatse geze ghena 'ya taheta taheta.

⁴Shala nde berete nde n'yiame yɛ have ta ŋkɛ mbe 'ya, dzembe yadzembe geva ta ɗa dala ta nci. Mpa yampa 'ya le berete ta Shala nya dzawe.

⁵Kanehwene kwara gamba hwa gwəzə nyi menjaɓa na? Kanehwene sla kenza zhawa ve na?

⁶Kazehwe nɗeli wəndə kaɗema ghwene hwe na? Kafate zeɗe wəndə te kwa tɛawetɛa ta slesle nya ketama na?

⁷Kaɗe wəshi kezeme shɛhɛ mɛa ɗa we. Wəsə kezeme nya keɗema zeɗehwe ɗa yaka nya te 'ya.

⁸Kaɗe 'ya kazhɛnete ɗa 'yɛwe ta ɗa kwete wəndə, pa Shala ndeke ɗa wəsə nya neghe 'ya.

⁹Ganyɛ ma mberɛɗɛmte ɗa Shala, kafete dzeve ta ŋkɛ ŋkɛ kezha pesle ɗa!

¹⁰Katekemave berete 'ya ɓɛhwɛ, katewetse 'ya va zlama mbe yaka nya dzawea shɛ: katezaghə ghena nyi gezete Shala nya kaganda 'ya we.

¹¹Ama mba berete keneghe va 'ya we: wa yaketekɛ ɗa nza teghweme le tse wa? Mba zəzə ta mbele va 'ya we.

¹²Berete ta ɗa nza kala pelɛ na? Geva ta ɗa nza kala mze kwa ghwə ghwə na?

¹³Wəsə nya kenza kakemanakɛ ɗa shɛ mbe 'ya we, berete kembele shɛ va 'ya ya ɓɛhwɛ we.

¹⁴Hweŋkwa ya va wəndə nya keyirə yirə kazhɛ heli nde ghedəkwəa ŋkɛ yite, ya gheŋkɛ ɗema mba kahawe va Shala nde berete.

¹⁵Nahe ka mcɛhɛ ɗa kepamte ɗa kala hələ, kala kwete hwa hələ nyi ɗema yɛmə kwa.

¹⁶Ma hevɛa ne, viɗi hɛ va yɛmə, vəa ŋkwa nya rɛɗɛnji kwacakelɛ.

¹⁷Ama hecimə ne, hase hase hɛ. Ma kwa se hwələ ne, mba yɛmə kwa hɛ we.

¹⁸Mba ka zhɛre dzeve kakele hweŋkwa nya dzate mɛa hɛ we, kadzete ɓerama negha ghə hɛ kampə.

¹⁹Nda newe yanewe hɛ ka zhɛre dzeve nyi mbe Tɛma le ntsə, nda ghə yagwəfə ka dzeghwa nyi mbe Saba le hɛ.

²⁰Ama hawe ya te hɛ va nya vate zəzə hɛ te yɛmə: ma kwa ntsehe hɛ ne, kwetɛ kwetɛŋe nzanji mehele ta nci.

²¹Wa nya tsetse nza ta ŋayɛ sha mcɛ ŋayɛ. Ma kwa nakɛ ndiremi yɛ ne, benake yɛ ghazlənə ŋayɛ.

²²Nahe 'ya ke'yɛwakɛ kwete wəsə va gheyɛ na? Nahe 'ya kegeze ŋayɛ kave ɗa bela ta wəshia ŋayɛ

²³kezha mbele ɗa shave mbe dzeve ta nde jaga ta ɗa ba'a kezha mbeɗe ɗa shave mbe dzeve ta nde ghwərə ghwərəa ntsə na?

²⁴Megela ma gezete ɗa yɛ tiɗiɗi, katenza 'ya divə, ncɛte ɗa mə tema tema menete fete 'ya.

²⁵Kazhɛ ŋkwa ghena nyi kaganda na? Ama wa yaɗe ghena nyi geze nyi yɛ kageze wa?

²⁶Te ghena nyi gezete 'ya geze ghena yɛ na? Ghena kwada ghena ta wəndə nya keyirə yirə.

²⁷Gheyɛ ɗe kakele mezhɛte le sla kwasheghediɗi, gheyɛ ɗe kapamte mcɛ ŋayɛ!

²⁸Tsetsenya ne, neweve mə kema ta ɗa: tseŋwə yasla 'ya kwa kema ta ŋayɛ na?

²⁹Newe ɗa mə: slama tseŋwə yɛ ma! Newe ɗa mə, tiɗiɗi nza ta ɗa.

³⁰Tseŋwə ya te ghɛni va 'ya na? Keɗepe ndiremi 'ya we, pe yɛ sha ŋa ŋayɛ na?»