Read kapsiki Job 8 Bible Online

Job 8 - kapsiki bible

Job 8

¹Laŋe Bildad, nde Shəwha te ghena, ma ke sha Job:

²«Pa te nyama və tegeze ghena nyi kala nyi na wa? Hweŋkwa tesərə ŋwafe ghena ghweleme nyi na wa?

³Kazhɛre wəsə nya tiɗiɗi Shala na? Kazhɛre kaganda Shala nde berete katseŋwə na?

⁴Nahe ŋwalea ŋa kemenete nda fete, nahe ŋkɛ keŋkikɛ nda zhɛme ta jaɗafa ta nci ke hɛ.

⁵Ama gha kenza na kazele Shala, kenza na kampi nda dzeve ke Nde berete,

⁶kenza na kande mene wəshi nyi tiɗiɗi ba'a nyi le hweŋkwa ta ŋkɛ ne, katedera ŋkɛ yitea newe ghweme te gha we, katezhɛne ŋa ŋkɛ kadzete ŋkwa ŋa.

⁷Ma nza ta ŋa nya vəashi ne, kawəsə nya ɓɛhwɛ tenza ŋkɛ yitea nya te kwete hɛ.

⁸'Yɛwakɛ ghena va mbeli nyi vəashi, veyite sleme yitea ɗepe nza ta ka shihɛnyɛ hɛ.

⁹Mbeli nyi keya mbeɗa mə, wəsə shɛ keɗepe mə we. Kala dzeghwa ta shenaŋkwe nza ta ɓəmə te hɛɗi.

¹⁰Ama ghenci ne, wərə hɛ kateke ŋa wəshi ba'a kageze ŋa ghena, mbe ɗepe nza ta nci ne, wərə hɛ kaɗepe nta kelɛ kwa ghena:

¹¹Kakele mahawa pelɛ wəmbə we, kapese ghwəvərə kaɗema te ŋkwa yɛmə we.

¹²Keɗema yɛmə shɛ ne, mpelɛa ma ghwele ŋkɛ ke kweci gwəzə, nya mene ghwə ŋkɛ ba'a kanakama mbeli kaslahwe.»

¹³Tsetse nza ta mbeli nyi kezaghə Shala. Kala nya za sebe te mbele ta ka 'yaghwa mehele.

¹⁴Nahe sebe kezanyɛ te zəzə ta nci, kala zamba nza ta nci gwezlayɛ.

¹⁵Ma kadzate tambetamba te zamba nci ne, kanaɗe nde, ma kandɛaŋe geva hɛ te ne, kaŋsle nde.

¹⁶Kala wəfe nya nza ŋ'wa viɗi mbe te veci hɛ, kapesle yɛ dzeve ta ŋkɛ nde dzeyi kənəa ntsa.

¹⁷Kaha yɛ slərəa ŋkɛ nde dzawa hwa pelɛ, kaha geva dzawa kwelɛ perawe ta gela.

¹⁸Ama kenteɗemte geva nde te ŋkwa nya se nde ne, kategeze ŋkwa shɛ kaɗema ŋkɛ kegha kanakɛ ŋkɛ.

¹⁹Tsetse kiɗi zeɗe nza ta mbeli nyi kezaghə Shala! Ma te ŋkwa nci ne, kapese kweci mbeli.

²⁰Kaɓelama wəndə nya tiɗiɗi Shala we, kakemane mbeli nyi kemene wəsə kwa ndiremi ŋkɛ we.

²¹Kateve ŋa ŋ'wəshi te mɛ, kateve gaghwe ŋkɛ kwa mɛa ŋa.

²²Ama shewə tenza ka jaga ta ŋa va hawe, katenza ghɛ va ka 'yaghwa mehele we.