Read kapsiki Cimə 109 Bible Online

Cimə 109 - kapsiki bible

Cimə 109

¹Se va wəndə nya te ghəa cimə. Ciməa David. Shala nya tsahe 'ya, nzama na divə ma.

²Kwa nza ŋkɛ ne, fete yave ɗa ka 'yaghwa mehele ba'a ka sla tseŋwə, 'ya yaŋwashɛ ŋwashɛ hɛ.

³Ghena zlɛ yadzasle ɗa hɛ le, mpa yaha ɗa hɛ gəmə.

⁴Ya 'ya nza kaɗe hɛ ne, kaɗe ghena ta ɗa hɛ we, ama 'ya ne, ghə yasəkwə 'ya kezha hɛ.

⁵Wəsə kwa ndiremi yamene ɗa hɛ te ŋkwa ganyɛ, zlɛ te ŋkwa ɗe.

⁶Ma ke hɛ sha geze te ghəa ɗa: «Ntave ɓəmə nde 'yaghwa mehele kezha ha nda mpa, ghereŋe nde ve nda fete te kwa zeme ta ŋkɛ.

⁷Ma te və nya meha ghwə mbeli te ne, nza ŋkɛ kande fete, zhɛrenyɛ səkwə ghə ta ŋkɛ kajaɗafa,

⁸ntamte geva yɛ hɛa ŋkɛ teghweme, kelehwe slene ta ŋkɛ kwete wəndə,

⁹nza ŋwalea ŋkɛ kaka mezhɛtiti, nza male ta ŋkɛ kawede,

¹⁰ndendeŋe ŋwalea ŋkɛ ba'a sesəkwə wəshi hɛ, səkwə wəshi hɛ cakeɗake le ghɛa nci nya kakwəfi,

¹¹kesehwe wəshia ŋkɛ wəndə nya kendeke nda dewa, fəhwe wəshi nyi menete ŋkɛ ka se se,

¹²ɗema wəndə ganyɛ shɛ laka gheŋkɛ, ɗema nde zhɛ heli shɛ yitea ka mezhɛtitia ŋkɛ,

¹³zanyɛ sebe te hwelefefia ŋkɛ, zanyɛ sebe te sləa nci mbe va ɓɛhwɛ,

¹⁴zəzəte nda jaɗafa ta ka shihɛnyɛ mbeli ke Mahwətə, kelemtema geva fete ta meghekɛ te wənə,

¹⁵zəzə fetea shɛhɛ Mahwətə kevə kevə, zamte sebe ŋkɛ te sləa nci te hɛɗi.

¹⁶Kwa nza ŋkɛ ne, nahe wəndəa shɛ kezaghəyite mene ganyɛ, nahe ŋkɛ kesahwe nda yaka pa te mte ke nde titikwə, ke nde dewə ŋeli nya keyirə yirə.

¹⁷Ma kwa ɗehwe bezla ŋkwa ŋkɛ kwele kwele ne, pa bezla dzeghənyɛ kənə. Ma kwa ɗema wəpi ŋkwa ŋkɛ ne, pa wəpi slənyɛ cakeɗake yite.

¹⁸Nahe ŋkɛ keseɗete bezla ŋkwa kala lekwesa, tagha gɛ, pa nde dzembenyɛ mbe geva ta ŋkɛ kala yɛmə, ba'a mbe 'yɛ'yɛa ŋkɛ kala n'yi.

¹⁹Nza bezla shɛ kənəa geva ta ŋkɛ kala lekwesa, nza ŋkɛ kala hətə nya hwepe ŋkɛ keveci keveci.»

²⁰Tsetse teve nda zhɛme Mahwətə ke ka ve ɗa fete, ke ka ŋwashɛ ŋwashɛ ɗa.

²¹Ama gha gɛ Shala Mahwətə, kemane ɗa kazləvəa ŋa. Ganyɛ yamene ɗa ɗe ta ŋa, mbelete ɗa.

²²Nahe 'ya kenza kande titikwə ba'a kande dewə berete, kwele kwele yirə ɗa 'ya.

²³Kala shenaŋkwe ta tɛhwɛɗi kiɗi nza ta ɗa, kala hegi keka ɗa mbeli.

²⁴Va mene səwəmayɛ ne, kashɛ 'ya ghereŋe we, nahe titikwə wəsə kezeme kepahemte ɗa.

²⁵Nahe 'ya kenza kawəsə keŋ'wəshi sha hɛ, nakɛ ɗa ma ta nci ne, kagagəzə ghə hɛ.

²⁶Kemane ɗa Shala Mahwətə ta ɗa, mbelete ɗa laka ganyɛa ŋa.

²⁷Ɗepete hɛ kawəsə nya menete na ŋkɛ, kagha Mahwətə nde menete ɗa wəsəa shɛ.

²⁸Ŋkwa yabezla hɛ, ama gha ne, ŋkwa yawəpi na. Ma kehave ɗa mpa hɛ ne, katenza hawe te hɛ, ama katezlama 'ya, 'ya nya kande mene slene ta ŋa.

²⁹Kelemte geva zləvə te ka ve ɗa fete, nza hɛ bətə mbe hawe ta nci kala lekwesa.

³⁰Katetsahe Mahwətə 'ya le berete, kategha nda cimə 'ya te tepe ta wəvəsəa mbeli.

³¹Kwa nza ŋkɛ ne, kaghereŋe ŋkɛ te kwa zeme ta nde titikwə kezha mbele ŋkɛ va mbeli nyi keve nda fete.