Read kapsiki Cimə 115 Bible Online

Cimə 115 - kapsiki bible

Cimə 115

¹Mahwətə, kenza te ghen'yɛ we, te ghen'yɛ ve geva zləvə we, ama te gha, kezha ɗe ta ŋa ba'a kezha ganyɛa ŋa.

²Kezha wa geze kweci mbeli: «Tema Shala ta nci gɛ wa», ke hɛ wa?

³Nahe Shala ta n'yɛ kenza pelɛ ghweme, pɛtɛa wəshi nyi ɗe ŋkɛ yamene ŋkɛ.

⁴Nahe yɛ shala ta nci kenza kamze kwa tɛawetɛa keɗema kamze kwa tere tere, mbeli ka vɛsəte hɛ.

⁵Mɛ ya te hɛ, ama kageze ghena hɛ we. Ntsə ya kwa hɛ, ama kanewe ŋkwa hɛ we.

⁶Sleme ya te hɛ, ama kafa ghena hɛ we. Ŋshi ya te hɛ, ama kafa zəŋwəa wəsə hɛ we.

⁷Dzeve ya te hɛ, ama kakwaɗe wəsə hɛ we. Seɗa ya te hɛ, ama kadzeghwa hɛ we. Kwaɗe shɛ kasame kwa mɛa nci we.

⁸Nza mbeli nyi kevɛsəte hɛ kala hɛ, tsagha pɛtɛa mbeli nyi keve ghə te hɛ.

⁹Gheyɛ ka Israyɛl, ve mə ghə te Mahwətə. Nahe ŋkɛ kenza kande kemane ŋayɛ ba'a kageləa ŋayɛ.

¹⁰Gheyɛ hwelefefia Aron, ve mə ghə te Mahwətə. Nahe ŋkɛ kenza kande kemane ŋayɛ ba'a kageləa ŋayɛ.

¹¹Gheyɛ mbeli nyi kehawe va Mahwətə, ve mə ghə te Mahwətə. Nahe ŋkɛ kenza kande kemane ŋayɛ ba'a kageləa ŋayɛ.

¹²Kazəzə ɓəmə Mahwətə, katewəpi ɓəmə ŋkɛ. Katewəpi ka Israyɛl ŋkɛ, katewəpi hwelefe ta Aron ŋkɛ,

¹³katewəpi mbeli nyi kehawe ve Mahwətə, ŋwale ba'a mbelia jama.

¹⁴Ndeke ŋayɛ ya Mahwətə kwele kwele, gheyɛ ba'a ŋwalea ŋayɛ.

¹⁵Wəpikɛ ŋayɛ Mahwətə, gheŋkɛ nya kepate ghweme ba'a hɛɗi.

¹⁶Nahe ghweme kenza kaghweme ta Mahwətə, ama hɛɗi ne, nahe ŋkɛ kendeke nda ke mbeli.

¹⁷Kenza tsahe Mahwətə kaŋa mbeli nyi kempə mpə, ghenci nyi kedzawa ghɛa mbelia kwahɛɗi we.

¹⁸Ama gheɓəmə ne, katsahe Mahwətə gheɓəmə, se tsetsenya ba'a kaghala ghala. Alɛləwya!