Read kapsiki Cimə 119 Bible Online

Cimə 119 - kapsiki bible

Cimə 119

¹Zlama ya va mbeli nyi kedzeghwa tiɗiɗi, va mbeli nyi kehawe va wəsə mahalegəa Mahwətə.

²Zlama ya va mbeli nyi keya ghena nyi tekete ŋkɛ, nyi kezele ŋkɛ le pɛtɛa wənəa nci.

³Wəsə kwa ndiremi shɛ kamene hɛ we, kala nya ɗe Shala dzeghwa hɛ.

⁴Shala, gha nde gezete ghena ta ŋa kezha hawe mbeli va hɛ megela.

⁵Ɗepe dzeghwa 'ya tiɗiɗi kezha mene wəshi nyi ɗe na.

⁶Tagha gɛ, katezhɛ ɗa hawe va bete ntsə te pɛtɛa ghena nyi gezete na we.

⁷Katetsahe ŋa 'ya le wənə kwetɛŋe laka teke ghena ta ŋa nyi tiɗiɗi.

⁸Katemene wəshi nyi ɗe na 'ya. Wəfəyite ɗa ma na tɛape ma.

⁹Tsema nza mempɛhweta kayate dzeghwa ta ŋkɛ tiɗiɗi tse wa? Nda laka mene slene le ghena ta ŋa.

¹⁰Kazele ŋa 'ya le wənə kwetɛŋe. Sərə ɗa ma na kandeŋe cakeɗake yitea ghena nyi gezete na ma.

¹¹Kave ghena nyi gezete na 'ya kwa wənəa ɗa kezha ɗema kamene ŋa jaɗafa.

¹²Hana ŋa na gɛ Mahwətə! Tekete ɗa wəshi nyi ɗe na gi!

¹³Le mɛa ɗa ne kaɓela pɛtɛa ghena nyi tarete na 'ya.

¹⁴Kazlama 'ya yitea zele ghena nyi tekete na, kala wəsə nya nza pɛtɛa wəshi va 'ya.

¹⁵Kakele zəzə 'ya te wəshi nyi gezete na, kabete ntsə 'ya te hweŋkwa nya ncɛte ɗa na.

¹⁶Kazlama 'ya yitea wəshi nyi ɗe na, katezaghə ghena ta ŋa 'ya we.

¹⁷Menete ɗa ganyɛ, 'ya nya kande mene slene ta ŋa, kezha nza 'ya teghweme ba'a kezha hawe 'ya va ghena ta ŋa.

¹⁸Ghwenemte yɛ ntsə ta ɗa kezha neweve wəshi meŋelea wəsə mahalegəa ŋa 'ya.

¹⁹Nahe 'ya kenza kamentiɓə te hɛɗi, wəfərəma ghena nyi geze na na va 'ya ma.

²⁰Kevə kevə ne, kamawe ghena nyi tarete na 'ya.

²¹Kave ɗa na te ka bezla bezla nyi kekele ghə, nyi kezanji cakeɗake yitea ghena nyi gezete na.

²²Kelemte ŋele ba'a yiɗə seyi te 'ya, kwa nza ŋkɛ kahawe 'ya va ghena nyi tekete na.

²³Ya mbeli nyi te ghə nza katsa ghena yitea 'ya ne, kakele zəzə 'ya, 'ya nya kande mene slene ta ŋa te wəshi nyi ɗe na.

²⁴Kave ɗa zlama ghena nyi tekete na, ghenci ya kaka ncɛ ɗa ntsehwele.

²⁵Nahe 'ya kenza kwelebəhə hwa hɛɗi, ndeke ɗa nza teghweme kala nya meɗeyi na.

²⁶Nahe 'ya keɓelate ŋa nza ta ɗa, nahe na kezhɛnete ɗa. Tekete ɗa wəshi nyi ɗe na!

²⁷Fave ɗa hweŋkwa ta ghena nyi gezete na, tagha gɛ, katekele zəzə 'ya te wəshi meŋelea ŋa.

²⁸Nehwene yave ɗa taze ta mehele, kesakate ɗa te ŋkwa kala nya meɗeyi na.

²⁹Hendemte ɗa vare hweŋkwa ta tseŋwə. Mbe ganyɛa ŋa ne, fave ɗa wəsə mahalegəa ŋa!

³⁰Nahe 'ya kentave hweŋkwa ta kaganda, kahawe 'ya va ghena nyi tarete na.

³¹Kave nda ghə 'ya ke ghena nyi tekete na, Mahwətə yawe, pəli ɗa ma hawe na ma.

³²Kantsə geva 'ya kwa hweŋkwa ta ghena nyi gezete na, kwa nza ŋkɛ kaghwene mehele ta ɗa na.

³³Mahwətə yawe, ncɛte ɗa hweŋkwa ta wəshi nyi ɗe na, kezha mene slene 'ya le hɛ pa te keɗaŋe ta və.

³⁴Fave ɗa wəsə mahalegəa ŋa, tagha gɛ, katemene slene 'ya le, katehawe 'ya ve le wənə kwetɛŋe.

³⁵Beghe ɗa kwa hweŋkwa ta ghena nyi gezete na, kwa nza ŋkɛ zeɗehwe ɗa ŋkɛ.

³⁶Zhɛrete wənəa ɗa laka ghena nyi tekete na, kaɗema kenza laka mcɛlə.

³⁷Kelemte ntsə ta ɗa te wəshia kwadanji, ndeke ɗa nza kwa hweŋkwa ta ŋa.

³⁸Menete ɗa, 'ya nya kande mene slene ta ŋa wəsə nya meɗeyi nda na ke ka hawe va gha.

³⁹Yakɛ ɗa va ŋele nyi keve ɗa ghazlənə, kwa nza ŋkɛ keganji ganjinji ghena nyi tarete na.

⁴⁰Kaganda ne, kamawe wəshi nyi gezete na 'ya. Ndeke ɗa nza teghweme laka tiɗiɗia ŋa.

⁴¹Mahwətə yawe, nza ganyɛke laka 'ya, mbelete ɗa, kala nya meɗeyi na.

⁴²Tagha gɛ, katenza zhɛne va 'ya kaŋa wəndə nya keŋele ɗa, kwa nza ŋkɛ kave ghə 'ya te ghena ta ŋa.

⁴³Kelemtema kaganda na kwa mɛa ɗa ma, kwa nza ŋkɛ ghena nyi tarete na yaneghe 'ya.

⁴⁴Kateya wəsə mahalegəa ŋa 'ya kevə kevə ba'a kaghala ghala.

⁴⁵Katedzeghwa 'ya waɗe, kwa nza ŋkɛ kezele wəshi nyi gezete na 'ya.

⁴⁶Kategeze ghena nyi tekete na 'ya kwa kema ta ka meghea kɛfi, katezhɛ ɗa hawe we.

⁴⁷Kazlama 'ya yitea ghena nyi gezete na, kave ɗa farefa hɛ.

⁴⁸Kakafe dzeve 'ya laka ghena nyi gezete na, kaɗe hɛ 'ya, kakele zəzə 'ya te wəshi nyi ɗe na.

⁴⁹Zəzəte ghena nya gezete ɗa na, 'ya nya kande mene slene ta ŋa. Nahe ghena shɛ kegwəfəte ɗa ghə.

⁵⁰Gheŋkɛ nde gweɗakwe ɗa mbe yaka, kwa nza ŋkɛ ghena nyi gezete na ka ve ɗa mpi.

⁵¹Nahe ka kele ghə keŋ'wəshikɛ ɗa tsape, ama kesərəakɛ wəsə mahalegəa ŋa 'ya we.

⁵²Mahwətə yawe, kazəzə ghena nyi tarete na vəashi 'ya, ghenci ka gweɗakwe ɗa.

⁵³Nahe wənəa ɗa kehwepe va ka 'yaghwa mehele nyi kewəfəyite wəsə mahalegəa ŋa.

⁵⁴Nahe ghena nyi ɗe na kenza kaciməa ɗa ki ghɛ nya nza 'ya kande se se.

⁵⁵Mahwətə yawe, kazəzə sləa ŋa 'ya heviɗi, kamene slene 'ya le wəsə mahalegəa ŋa.

⁵⁶Gheŋkɛ ya kaŋa ɗa wəsə, kwa nza ŋkɛ kaya wəshi nyi gezete na 'ya.

⁵⁷Mahwətə, ma ŋa ɗa wəsə, a 'ya gezete ne, mene slene le ghena ta ŋa.

⁵⁸Nahe 'ya kese kazele kanza zeɗehwe ŋa le wənə kwetɛŋe, zhɛ heli yitea 'ya kala nya meɗeyi na.

⁵⁹Nahe 'ya kese kazəzə dzeghwa ta ɗa, kaɗe 'ya kazhɛne kahawe va ghena nyi tekete na.

⁶⁰Kaɗema kadera ne, kantsə geva 'ya kamene slene le ghena nyi gezete na.

⁶¹Nahe ka 'yaghwa mehele kekesehwe ɗa le keleŋa, ama kazaghə wəsə mahalegəa ŋa 'ya we.

⁶²Te tepe ta viɗi ne, kasate 'ya te ŋkwa katsahe ŋa tewəmbəreke ghena nyi tiɗiɗi nyi tarete na.

⁶³Nahe 'ya kenza kamcɛnyɛa pɛtɛa ka hawe va gha, ba'a ka ya wəshi nyi gezete na.

⁶⁴Mahwətə yawe, rayɛ hɛɗi lema va ganyɛa ŋa, tekete ɗa wəshi nyi ɗe na.

⁶⁵Kamene nda ganyɛ na ke nde mene slene ta ŋa, kala nya meɗeyi na Mahwətə yawe.

⁶⁶Tekete ɗa fa zeweve ta ghena ba'a ɗepe wəsə, kwa nza ŋkɛ kave ghə 'ya te ghena nyi gezete na.

⁶⁷Ma tewə 'ya kesahwe yaka ne, keza za se 'ya. Ama kaya ghena nyi gezete na 'ya tsetsenya.

⁶⁸Megela na ba'a wəsə ganyɛ yamene na. Tekete ɗa wəshi nyi ɗe na.

⁶⁹Kasla ɗa tseŋwə ka kele ghəa kɛfi, ama kaya wəshi nyi gezete na 'ya le wənə kwetɛŋe.

⁷⁰Nahe mehele ta nci kenza keŋzle ŋzle, ama kazlama 'ya yitea wəsə mahalegəa ŋa.

⁷¹Megela ŋkɛ sha 'ya kezha nza yaka te 'ya, kezha tekeve wəshi nyi ɗe na 'ya.

⁷²Megela ma wəsə mahalegə nya kesame kwa mɛa ŋa sha 'ya ke dəɓərəa mze kwa tere tere ba'a mze kwa tɛawetɛa kwele kwele.

⁷³Nahe dzeve ta ŋa kepate ɗa ba'a keveyi ɗa meslete. Ndeke ɗa fa zeweve ta ghena kezha tekeve ghena nyi gezete na 'ya.

⁷⁴Ma kenakɛ ɗa ka hawe va gha, kazlama hɛ, kwa nza ŋkɛ kave ghə 'ya te ghena ta ŋa.

⁷⁵Mahwətə, nahe 'ya keɗepe tiɗiɗi ghena nyi tarete na, wərə nda vate yaka na te 'ya.

⁷⁶Ve ɗa gweɗakwe ganyɛa ŋa, kala nya gezete ɗa na, 'ya nya kande mene slene ta ŋa.

⁷⁷Zhɛ heli yitea 'ya kezha nza 'ya teghweme, kwa nza ŋkɛ zeɗehwe ɗa wəsə mahalegəa ŋa.

⁷⁸Nza hawe te ka kele ghə nyi kese kasla ɗa tseŋwə. 'Ya ne, kave zəzə 'ya te wəshi nyi gezete na.

⁷⁹Zhɛne geva ka hawe va gha kase sha 'ya, kateɗepe ghena nyi tekete na hɛ.

⁸⁰Zele wəshi nyi ɗe na 'ya le wənə kwetɛŋe. Ma tsagha ne, katenza hawe te 'ya we.

⁸¹Leɓakwe 'ya va neghe mbele ta ŋa, nahe 'ya kevate ghə te ghena ta ŋa.

⁸²Ghare yaghare ntsə ta ɗa va neghe meɗe mɛa ŋa. Ma 'ya gezete: «Hweŋkwa tegweɗakwe ɗa na wa?»

⁸³Yipə yipə 'ya le slibə hweta nya keghwele ghwele, ama kazaghə wəshi nyi ɗe na 'ya we.

⁸⁴Ŋkwini tetene yɛ hɛa nde mene slene ta ŋa wa? Hweŋkwa tekele zəzə na te ka ghweze mɛ hwa 'ya wa?

⁸⁵Nahe ka kele ghə keŋate ɗa yɛ keleŋa, wəsə nya kehitema geva laka wəsə mahalegəa ŋa.

⁸⁶Nahe pɛtɛa ghena nyi gezete na kenza kakaganda. Yaka yasa ɗa va mbeli gəmə, kemane ɗa gi.

⁸⁷Takwa takwa mbeli kazamte sefə hwa 'ya, ama kewəfəyite wəshi nyi gezete na 'ya we.

⁸⁸Ndeke ɗa nza teghweme laka ganyɛa ŋa kezha mene slene 'ya le wəshi nyi gezete na.

⁸⁹Mahwətə yawe, kaghala ghala tenza ghena ta ŋa, pelɛ ghweme nza ŋkɛ.

⁹⁰Katemə ganyɛa ŋa keshi keshi. Nahe na keveyi hɛɗi ntɛaŋe ntɛaŋe, tagha gɛ, kanza ŋkɛ.

⁹¹Tewəmbəreke zəzə ta ŋa nza pɛtɛa wəshi pa ɓeshi, kwa nza ŋkɛ slene ta ŋa yamene wəshi pɛtɛ.

⁹²Ma ya kaɗema wəsə mahalegəa ŋa zeɗehwe ɗa ne, nza nahe 'ya kemte ɗa mbe yaka.

⁹³Katezaghə wəshi nyi gezete na 'ya tɛape we, kwa nza ŋkɛ kave ɗa na teghweme laka hɛ.

⁹⁴Nahe 'ya kenza kaŋa ŋa, mbelete ɗa, kwa nza ŋkɛ kazele wəshi nyi gezete na 'ya.

⁹⁵Kaceha ɗa ka 'yaghwa mehele kezha pesle ɗa. Ama kave mehele 'ya te ghena nyi tekete na.

⁹⁶Nahe 'ya kenakɛ kiɗi ta yayata wəsə ganyɛ, ama kakiɗi ghena nya gezete na we.

⁹⁷Kaɗe wəsə mahalegəa ŋa 'ya kwele kwele, kave zəzə 'ya te keveci keveci.

⁹⁸Ntsehwele ma ve ɗa ghena nya gezete na ke ka jaga ta ɗa, katenza ŋkɛ kaŋa ɗa kaghala ghala.

⁹⁹Ɗepe ma ghena 'ya ke ka teke ɗa wəshi, kwa nza ŋkɛ kave zəzə 'ya te ghena nyi tekete na.

¹⁰⁰Fave ma zeweve ta ghena 'ya ke ka meha mehɛɗi, kwa nza ŋkɛ kaya wəshi nyi gezete na 'ya.

¹⁰¹Kaya ghəa ɗa 'ya va dzeghwa nya ndiremi kezha mene slene le ghena ta ŋa.

¹⁰²Kaslə 'ya te ghena nyi tarete na we. Kwa nza ŋkɛ ne, gha nde tekete ɗa ghena.

¹⁰³Kezeɗe zeɗenji ghena nyi gezete na kwa mɛa ɗa, zeɗe ma ke yɛməa mze te ghɛnia ɗa.

¹⁰⁴Kave ɗa ɗepe wəsə wəshi nyi gezete na. Vatse ɗema pɛtɛa hweŋkwa ta tseŋwə 'ya.

¹⁰⁵Ghena ta ŋa ya kapaterela kezha yɛ seɗa ta ɗa, kawaŋe nya kwa hweŋkwa ta ɗa.

¹⁰⁶Nahe 'ya kemeɗeyi hawe va ghena nyi tiɗiɗi nyi tarete na, kateyipə ghena ta ɗa 'ya kadzawa.

¹⁰⁷Kwele kwele sahwe yaka 'ya. Mahwətə yawe, ndeke ɗa nza teghweme kala nya meɗeyi na.

¹⁰⁸Mahwətə yawe, yɛte səkwə nya səkwə ŋa 'ya, tekete ɗa ghena nyi tarete na.

¹⁰⁹Kevə kevə nza 'ya takwa yitea mte, ama kazaghə wəsə mahalegəa ŋa 'ya we.

¹¹⁰Nahe ka 'yaghwa mehele keŋate ɗa keleŋa, ama kendeŋe ɗa 'ya cakeɗake yitea wəshi nyi gezete na we.

¹¹¹Nahe wəshi nyi tekete na kenza kaŋa ɗa wəsə kaghala ghala, nahe hɛ kenza kazlama nya kwa wənəa ɗa.

¹¹²Kantsə geva 'ya kamene wəshi nyi ɗe na, ghenci ya kazhɛme ta ɗa kaghala ghala.

¹¹³Kaɗe ntsə ta mbeli nyi nza wənəa nci bake bake 'ya we, ama kaɗe wəsə mahalegəa ŋa 'ya.

¹¹⁴Gha ya kaŋkwa kewəfərə ta ɗa ba'a kageləa ɗa. Kave ghə 'ya te ghena ta ɗa.

¹¹⁵Ka 'yaghwa mehele, slə mə yitea 'ya, kezha hawe 'ya va ghena nyi gezete Shala ta ɗa gi ga!

¹¹⁶Tawe ɗa kala nya meɗeyi na. Tagha gɛ, katenza 'ya teghweme. Pəli ɗa ma hawe na laka ghə nya gwəfəte 'ya ma.

¹¹⁷Tawe ɗa kezha nza 'ya pələsə ba'a kezha zele wəshi nyi ɗe na 'ya kaghala ghala.

¹¹⁸Kaŋka ka hawema va wəshi nyi ɗe na na, kwa nza ŋkɛ deke tseŋwə ya kaslene ta nci.

¹¹⁹Katebete pɛtɛa ka 'yaghwa mehele nyi te hɛɗi na te kəsə, vatse ɗe wəshi nyi tekete na 'ya.

¹²⁰Kabare bare pɛtɛa geva ta ɗa va gha, kazhɛ ɗa ghazlənə va ghena nyi tarete na.

¹²¹Nahe 'ya kese kamene wəsə nya kehi ba'a nya tiɗiɗi. Ve ɗa ma na mbe dzeve ta ka sa ɗa yaka ma.

¹²²Meɗeyi nda zeɗe nza ke nde mene slene ta ŋa. Sa ɗa ma yaka ka kele ghə ma.

¹²³Ghare yaghare ntsə ta ɗa va neghe kemane ta ŋa ba'a mbele nya meɗeyi na.

¹²⁴Menete nda ganyɛa ŋa ke nde mene slene ŋa, tekete ɗa wəshi nyi ɗe na.

¹²⁵Nahe 'ya kenza kande mene slene ta ŋa, ndeke ɗa ɗepe wəsə kezha ɗepe wəshi nyi tekete na 'ya.

¹²⁶Mahwətə yawe, nahe və kese kezha sate na te ŋkwa: nahe mbeli kedzawanji wəmbə wəsə mahalegəa ŋa.

¹²⁷Vatse ɗe ghena nyi gezete na 'ya za ma ke mze kwa tere tere, za ma ke mze kwa tere tere nya ganyɛ.

¹²⁸Nahe pɛtɛa wəshi nyi gezete na kenza tiɗiɗi sha 'ya, vatse ɗema pɛtɛa hweŋkwa ta tseŋwə 'ya.

¹²⁹Nahe wəshi nyi tekete na kenza kameŋele, vatse mene slene 'ya le hɛ.

¹³⁰Kakele waŋe fa ta ghena ta ŋa kase, kave nda fa zeweve ta ghena ŋkɛ ke ka gwedəa kɛfi.

¹³¹Kanda ndɛghwɛɗɛ 'ya yitea ghena ta ŋa, kwa nza ŋkɛ kwele kwele ɗe ghena nyi gezete na 'ya.

¹³²Zhɛre geva laka 'ya ba'a zhɛ heli yitea 'ya kala nya tarete na kaŋa mbeli nyi keɗe ŋa.

¹³³Ndeke nda berete ghena nyi gezete na ke seɗa ta ɗa. Sərəma wəsə kwa ndiremi na kasleke ɗa ma.

¹³⁴Mbelete ɗa va mbeli nyi kesa ɗa yaka, kezha mene slene 'ya le wəshi nyi gezete na.

¹³⁵Ɓelaghe kema ta ŋa kənəa 'ya nya kande mene slene ta ŋa, tekete ɗa wəshi nyi ɗe na.

¹³⁶Sərəɓə sərəɓə se 'ya kanehwene, kwa nza ŋkɛ kaya wəsə mahalegəa ŋa mbeli we.

¹³⁷Mahwətə yawe, tiɗiɗi na, kaganda ghena nyi tarete na.

¹³⁸Ma laka wəshi nyi tekete na ne, nahe na kencɛte tiɗiɗia ŋa ba'a ganyɛa ŋa.

¹³⁹Kazhɛ ɗa wənəa ɗa kala ghwə va nya zaghəyite ghena ta ŋa ka jaga ta ɗa.

¹⁴⁰Nahe ghena ta ŋa kedzeghete geva fate fate, kaɗe ŋkɛ 'ya, 'ya nya kande mene slene ta ŋa.

¹⁴¹Ya 'ya nza kepahe pahe ba'a ya mbeli ɓelama ɗa ne, kazaghə wəshi nyi gezete na 'ya we.

¹⁴²Tiɗiɗia ŋa ya katiɗiɗi nya kaghala ghala, wəsə mahalegəa ŋa ya kakaganda.

¹⁴³Nahe yaka ba'a yirə kedzete 'ya, ama nahe ghena nyi gezete na kenza zeɗehwe ɗa.

¹⁴⁴Nahe wəshi nyi tekete na kenza tiɗiɗi kaghala ghala. Ndeke ɗa fa zeweve ta ghena kezha nza 'ya teghweme.

¹⁴⁵Mahwətə yawe, kasəkwə ŋa 'ya le wənə kwetɛŋe, zhɛnete ɗa kezha mene slene 'ya le wəshi nyi ɗe na.

¹⁴⁶Kasəkwə ŋa 'ya, mbelete ɗa kezha mene slene 'ya le wəshi nyi tekete na.

¹⁴⁷Tewə ŋkwa kekiɗi ne, katsa ŋa lewela 'ya, kave ghə 'ya te ghena ta ŋa.

¹⁴⁸Mba ŋkwa heviɗi ne, kapele ntsə 'ya kezha ve zəzə te ghena nyi gezete na.

¹⁴⁹Mahwətə, mbe ganyɛa ŋa ne, fate ŋwələa ɗa ba'a ndeke ɗa nza teghweme kala ghena nyi tarete na.

¹⁵⁰Kahende geva ka mene wəsə kwa ndiremi kase, kaslə hɛ seyi yitea wəsə mahalegəa ŋa.

¹⁵¹Mahwətə yawe, dekwe na yitea 'ya, kaganda ghena nyi gezete na pɛtɛ.

¹⁵²Se vəashi, nahe 'ya keɗepe nahe na keveyi wəshi nyi tekete na kaghala ghala.

¹⁵³Newema yaka nya te 'ya, mbelete ɗa, kwa nza ŋkɛ kazaghə wəsə mahalegəa ŋa 'ya we.

¹⁵⁴Kelete ghena ta ɗa ba'a mbelete ɗa. Ndeke ɗa nza teghweme kala nya meɗeyi na.

¹⁵⁵Nahe mbele kenza cakeɗake yitea ka 'yaghwa mehele, kwa nza ŋkɛ kahawe hɛ va wəshi nyi ɗe na we.

¹⁵⁶Mahwətə nahe ɗe ta ŋa kenza wəbake, ndeke ɗa nza teghweme kala ghena nyi tarete na.

¹⁵⁷Nahe ka ghweze mɛ hwa 'ya ba'a ka jaga ta ɗa kenza kwele kwele, ama kadzawa 'ya wəmbəa wəshi nyi tekete na we.

¹⁵⁸Nahe wənəa ɗa kebeze va ka wəfəyite ŋa nyi, va ka hawema nyi va ghena nyi gezete na.

¹⁵⁹Mahwətə, neweve tsema tsema ɗe wəshi nyi gezete na 'ya. Ndeke ɗa nza teghweme kala ganyɛa ŋa.

¹⁶⁰Kaganda ya kagha ta ghena ta ŋa, nahe pɛtɛa ghena nyi tiɗiɗi nyi tarete kenza kaghala ghala.

¹⁶¹Kaghweze mɛ mbeli nyi te ghə hwa 'ya gəmə, ama deke ghena ta ŋa nde ve ɗa ghazlənə.

¹⁶²Kazlama 'ya te ghena nyi meɗeyi na, kala wəndə nya kekemave mcɛlə nya wəba.

¹⁶³Kaɗe tseŋwə 'ya we, zeɗehwe ɗa ŋkɛ we. Ama kaɗe wəsə mahalegəa ŋa 'ya.

¹⁶⁴Te veci kwetɛŋe ne, mberefaŋe zhigə tsahe ŋa 'ya kezha ghena nyi tiɗiɗi nyi tarete na.

¹⁶⁵Kwelɛŋe nya wəba ya va ka ɗe wəsə mahalegəa ŋa, tehene shɛ katsa hɛ we.

¹⁶⁶Mahwətə yawe, mbele ta ŋa yaneghe 'ya, kamene slene 'ya le ghena nyi gezete na.

¹⁶⁷Kahawe 'ya va wəshi nyi tekete na, kaɗe hɛ 'ya tsape tsape.

¹⁶⁸Kahawe 'ya va ghena ba'a wəshi nyi tekete na, nahe pɛtɛa dzeghwa ta ɗa kenza kwa kema ta ŋa.

¹⁶⁹Mahwətə, ntsehe lewela ta ɗa pelɛagha sha gha, ndeke ɗa fa zeweve ta ghena laka ghena ta ŋa.

¹⁷⁰Ntsehe səkwə ta ɗa hwa'a pelɛagha sha gha, mbelete ɗa kala nya meɗeyi na.

¹⁷¹Tsahe ŋa mɛa ɗa, kwa nza ŋkɛ wəshi nyi ɗe na yateke ɗa na.

¹⁷²Gha ghena ta ŋa mɛa ɗa, kwa nza ŋkɛ nahe pɛtɛa ghena nyi gezete na kenza tiɗiɗi.

¹⁷³Kemane ɗa dzeve ta ŋa, kwa nza ŋkɛ nahe 'ya kentave wəshi nyi gezete na.

¹⁷⁴Mahwətə, kamawe 'ya kezha mbele ɗa na, zeɗehwe ɗa wəsə mahalegəa ŋa.

¹⁷⁵Nza 'ya teghweme kezha tsahe ŋa, kemane ɗa ghena nyi tarete na.

¹⁷⁶Ndeŋe yandeŋe 'ya kala təmə nya keza za, se kasepa ɗa, 'ya nya kande mene slene ta ŋa, kwa nza ŋkɛ kazaghə ghena nyi gezete na 'ya we.