Read kapsiki Cimə 132 Bible Online

Cimə 132 - kapsiki bible

Cimə 132

¹Cimə kedzeghwa kadzeme. Mahwətə yawe, zəzəte David ba'a pɛtɛa yaka nyi sahwe ŋkɛ.

²Ma ke zemete nda fela ke Mahwətə ba'a meɗeyi nda mɛ ke Shala nde berete ta Zhakob:

³«Katedzembe cɛ lekwesa ta ɗa 'ya we, katedzete gezle ta ɗa 'ya we,

⁴katedərəzlə ntsə 'ya we, ba'a katezhɛme zhɛme ɗa hɛ we.

⁵Nda 'ya kemave ŋkwa kaŋa Mahwətə, ghɛ kaŋa Shala nde berete ta Zhakob.»

⁶Nahe n'yɛ kefate kwa Ɛfrata səndəkwəa jikə geva, nahe n'yɛ kesləyi ŋkɛ mbe gamba ta Ya'ar.

⁷Tagha gɛ, ma ke ghen'yɛ gezete: «Dzembe ɓəmə ghɛa ŋkɛ, gwəɗəŋə ɓəmə yitea ŋkwa keve seɗa ta ŋkɛ.»

⁸Sate te ŋkwa Mahwətə, se kadzete ŋkwa kezhɛne mpia ŋa, gha ba'a səndəkwə nya nza berete ta ŋa kwa.

⁹Seɗaghe geva nza tiɗiɗi kənəa ka dzeghe ŋa melɛ. Tsa gaghwe mbelia ŋa.

¹⁰Te zlaɓa ta David nya kande mene slene ta ŋa ne, neghama meghe nya ntave na na ma.

¹¹Nahe Mahwətə kegezete nda ghena gheci gheci ke David. Kaganda ne, katezhɛre ghɛni ŋkɛ we. Ma ke: «Katenta wəndə nya hwa hwelefe ta ŋa 'ya kezha ve ŋkɛ pelɛ pasla ta ŋa.

¹²Ma kenza ŋwalea ŋa kaya jikə geva ta ɗa ba'a wəshi nyi teteke nda 'ya ke hɛ ne, katenza ŋwalea nci pelɛ pasla ta ŋa kaghala ghala perə.»

¹³Kwa nza ŋkɛ nahe Mahwətə kentave Siyon, nahe ŋkɛ keɗehwe ŋkɛ kaŋkwa kenza ta ŋkɛ.

¹⁴Ma ke gezete: «Kaŋkwa kezhɛne mpia ɗa tenza ŋkɛ kaghala ghala. Katenza 'ya mbe, gheŋkɛ yaɗehwe 'ya.

¹⁵Katewəpi wəshi nyi mbe 'ya, katebehe ka titikwəa kɛfi nyi mbe 'ya le wəsə kezeme.

¹⁶Kateseɗe nda nza tiɗiɗi 'ya ke ka dzeghe melɛ nyi mbe, katetsa gaghwe mbeli nyi mbe.

¹⁷Mbe Siyon tepese berete ta David 'ya, kala paterela nya nza ghwə kwa ne, kateve meghe nya ntave 'ya 'ya.

¹⁸Katepəli nda hawe 'ya ke ka jaga ta ŋkɛ, ama kateseɗe derə meghe nya keslesla ŋkɛ.»