Read kapsiki Cimə 135 Bible Online

Cimə 135 - kapsiki bible

Cimə 135

¹Alɛləwya! Tsahe mə sləa Mahwətə, tsahe mə ŋkɛ, gheyɛ ka mene slene ta Mahwətə,

²gheyɛ ka mene slene mbe ghɛa Mahwətə, te ŋwela nya yitea ghɛa Shala ta ɓəmə.

³Tsahe mə Mahwətə, kwa nza ŋkɛ megela ŋkɛ. Tsahe mə sləa ŋkɛ, kwa nza ŋkɛ kaɗe ŋkwa ŋkɛ.

⁴Kwa nza ŋkɛ nahe Mahwətə kentave Zhakob, nahe ŋkɛ kezhɛrete Israyɛl kaŋa ŋkɛ.

⁵Kaganda ne, nahe 'ya keɗepe Mahwətə ya wəba. Nde sleke ɓəmə ya te ghəa pɛtɛa yɛ shala.

⁶Yayata wəsə nya ɗe Mahwətə yamene ŋkɛ, pelɛ ghweme ba'a kwake te hɛɗi, kwa yɛ ndərə ba'a kwa yɛ zeweve ta hɛɗi.

⁷Kakele ləmbə ŋkɛ se te mendɛkwe ta hɛɗi, kaslesla va ŋkɛ kezha me va, kantsa sefə ŋkɛ se te ŋkwa nya tseneyi geva ŋkɛ.

⁸Gheŋkɛ nde mpəmte ka tezhɛa kɛfi nyi mbe Ɛzhipte ba'a tsəməa ŋwalea wəshi keseɗa ta nci.

⁹Nahe ŋkɛ keghweneke wəshi kencɛ wəshi ba'a wəshi meŋele kadzembe gha, Ɛzhipte, ke yɛ Farawon le pɛtɛa ka mene slene ta ŋkɛ.

¹⁰Nahe ŋkɛ keɗate hwelefefi kwele kwele, nahe ŋkɛ kempəmte ka meghe nyi berete berete:

¹¹Sihon, meghea ka Amor, Og, meghe nya mbe Bashan, ba'a pɛtɛa ka meghe nyi mbe Kanan.

¹²Nahe ŋkɛ kendeke nda hɛɗia nci kaŋa ŋkɛ, kaŋa ŋkɛ ke Israyɛl nya kahwelefe ta ŋkɛ.

¹³Mahwətə, katenza sləa ŋa kaghala ghala, Mahwətə, katezəzə ŋa mbeli keshi keshi.

¹⁴Kwa nza ŋkɛ kateve nda nza tiɗiɗi Mahwətə ke mbelia ŋkɛ, katezhɛ heli ŋkɛ yitea ka mene slene ta ŋkɛ.

¹⁵Nahe yɛ shala ta kweci hwelefefi kenza kamze kwa tɛawetɛa ba'a kamze kwa tere tere. Le dzeve vɛsəte hɛ mbeli.

¹⁶Mɛ ya te hɛ, ama kageze ghena hɛ we, Ntsə ya kwa hɛ, ama kanewe ŋkwa hɛ we,

¹⁷Sleme ya te hɛ, ama kafa ghena hɛ we. Kwaɗe shɛ kasame kwa mɛa nci we.

¹⁸Nza mbeli nyi kevɛsəte hɛ kala hɛ, tsagha pɛtɛa mbeli nyi keve ghə te hɛ.

¹⁹Ka Israyɛl, tsa nda mə hana ke Mahwətə. Mbelia Aron, tsa nda mə hana ke Mahwətə.

²⁰Gheyɛ ka Lɛvi, tsa nda mə hana ke Mahwətə. Gheyɛ ka hawe va Mahwətə, tsa nda mə hana ke Mahwətə.

²¹Se mbe Zhɛrəzalɛm ne, tsa nda mə hana ke Mahwətə, gheŋkɛ nya kenza pelɛ ghweme ta Siyon. Alɛləwya!