Read kapsiki Cimə 140 Bible Online

Cimə 140 - kapsiki bible

Cimə 140

¹Se va wəndə nya te ghəa cimə. Ciməa David.

²Mahwətə, mbelete ɗa va ka 'yaghwa mehele, ya ɗa va mbeli nyi kemene berete,

³va ka zəzə wəsə nya ndiremi ba'a va ka mtse yɛ ghəpə keveci keveci.

⁴Kanɛlɛme ghɛni hɛ kala shishi, ghwɛa mentsape ya kwa mɛ va hɛ. Zhɛne mpi.

⁵Mahwətə, ya ɗa va dzeve ta ka 'yaghwa mehele, newe ghweme te 'ya va ka mene berete ba'a va mbeli nyi kezəzə teɗe ta ɗa.

⁶Nahe ka kele ghə keŋate ɗa keleŋa, nahe hɛ kemeneyi yɛ zamba dzeyi mɛa hweŋkwa, nahe hɛ kebebaŋeyi ɗa yɛ dagalawe. Zhɛne mpi.

⁷Ma 'ya sha Mahwətə: «Shala ta ɗa na. Mahwətə, ve sleme yitea səkwə ta ɗa.

⁸Shala Mahwətə, gha ya kaberete nya kembele ɗa, nahe na keyakɛ ɗa te vecia mpa.

⁹Mahwətə, yɛ nda ma ɗe ta nci na ke ka 'yaghwa mehele ma, sərəma zəzə ta nci na kayipə geva kadzawa ma. Kwa nza ŋkɛ ne, katekele ghəa nci hɛ.» Zhɛne mpi.

¹⁰Zhɛneyi nda geva wəsə kwa ndiremia nci kwa ghə ke ka 'yaghwa mehelea shɛhɛ gɛ!

¹¹Betaghe geva laɗe ta ghwə kənəa hɛ, beteyi hɛ Shala kwa ghwə, kwa ki nyi teɗema hɛ kasamenji kwa hɛ.

¹²Katenza ka ŋwashɛ ŋwashɛ ŋkwa te hɛɗi we. Katekeka ka mene berete ndiremi kaɗema zhɛne mpi yite.

¹³Nahe 'ya keɗepe kave nda nza tiɗiɗi Mahwətə ke ka dewə ŋeli ba'a kave nda kaganda ŋkɛ ke ka titikwəa kɛfi.

¹⁴Kaganda ne, katetsahe ŋa mbeli nyi tiɗiɗi, katenza mbeli nyi nza wənəa nci wɛŋe kwa kema ta ŋa.