Read kapsiki Cimə 145 Bible Online

Cimə 145 - kapsiki bible

Cimə 145

¹Cimə ketsahe Shala ta David. Shala ta ɗa ba'a meghea ɗa, katetsahe ŋa 'ya, katetsa ŋa hana 'ya kevə kevə ba'a kaghala ghala.

²Katetsa ŋa hana 'ya keveci keveci, katetsahe ŋa 'ya kevə kevə ba'a kaghala ghala.

³Nahe Mahwətə kenza wəbake, nahe ŋkɛ kehi kezha tsahe ŋkɛ mbeli. Wəndə shɛ kafave kwele ŋkɛ we.

⁴Geze wəshi nyi menete ŋkɛ mbeli keshi keshi, ɓela slene ta ŋkɛ nyi jama jama mbeli.

⁵'Ya kategegeze wəshi meŋelea ŋa, zləvəa ŋa nya wəba ba'a kwelea ŋa.

⁶Kategeze berete ta ŋa nya ghazlənə mbeli ve mbeli, kateɓela wəshi nyi jama jama nyi menete na 'ya.

⁷Katezəzə wəshi ganjia ŋa nyi jama jama mbeli, katetsa gaghwe mbeli kezha ganyɛa ŋa.

⁸Nahe Mahwətə kenza kande ganyɛa mehele, kande zhɛ heli, kande səwə ghena ba'a kande ɗe ŋkwa nya wəba.

⁹Nahe Mahwətə kenza ganyɛke sha mbeli pɛtɛ, kwele kwele ɗehwe pɛtɛa wəshi nyi pate ŋkɛ ŋkɛ.

¹⁰Mahwətə, katetsahe ŋa wəshi nyi pate na kanya kwetɛŋe, katetsa ŋa hana mbelia ŋa.

¹¹Kategeze zləvəa meghea ŋa hɛ, kateɓela wəshi nyi jama jama nyi menete na hɛ.

¹²Katencɛ nda wəshi nyi jama jama nyi menete na ba'a zləvə nya wəba nya te meghea ŋa hɛ ke mbeli.

¹³Nahe meghea ŋa kenza kameghe nya kaghala ghala, katetemə meghea ŋa keshi keshi. Nahe Shala kenza dɛŋe dɛŋe te meɗe mɛa ŋkɛ, kancɛ ɗe ta ŋkɛ ŋkɛ mbe yayata wəsə nya mene ŋkɛ.

¹⁴Katawe pɛtɛa mbeli nyi keteɗe Mahwətə, kakese ka dewə berete ŋkɛ sate te ŋkwa.

¹⁵Pɛtɛa mbeli kave ntsə ba'a kave ghə te gha, kave nda wəsə kezeme na ke hɛ te vəa ŋkɛ.

¹⁶Kapele dzeve ta ŋa na ba'a kabehe pɛtɛa wəshi nyi nza mpi hwe na le wəshi nyi mawe hɛ.

¹⁷Nahe Mahwətə kenza tiɗiɗi mbe pɛtɛa slene ta ŋkɛ, kancɛ ɗe ta ŋkɛ ŋkɛ mbe yayata wəsə nya menete ŋkɛ.

¹⁸Nahe Mahwətə kenza dekwe yitea pɛtɛa ka səkwə ŋkɛ, yitea pɛtɛa ka səkwə ŋkɛ le wənə kwetɛŋe.

¹⁹Kamene wəsə nya mawe ka hawe ve ŋkɛ, kafa lewela ta nci ŋkɛ ba'a kambele hɛ ŋkɛ.

²⁰Kaya pɛtɛa mbeli nyi keɗe ŋkɛ Mahwətə, ama kateza sebe ŋkɛ te pɛtɛa ka 'yaghwa mehele.

²¹Katetsahe Mahwətə mɛa ɗa ba'a katetsa nda hana pɛtɛ wəshi nyi nza mpi hwe ke Shala nya kaganda, kevə kevə ba'a kaghala ghala.