Read kapsiki Cimə 2 Bible Online

Cimə 2 - kapsiki bible

Cimə 2

¹Yitea wa ɗəkwə ɗəkwə mbeli tse wa? Yitea wa tsa ghena hwelefefi gəmə tse wa?

²Kahi geva ka meghe nyi te hɛɗi lema yitea mpa, katsa ghena mbeli nyi te ghə yitea Mahwətə ba'a yitea meghe nya ntave ŋkɛ.

³Ma ke hɛ sha geze: «Ŋslemte ɓəmə yɛ zewe ta nci, Betemte ɓəmə yɛ zewe lɛa nci.»

⁴Ama ntake Mahwətə kaŋ'wəshi, ghenci yaŋ'wəshi wəndə nya nza pasla ta ŋkɛ pelɛ ghweme.

⁵Ntake ŋkɛ kageze nda ghena ke hɛ le wənə le wənə, pa beze ta wənəa ŋkɛ ndeke nda ghazlənə ke hɛ.

⁶Ma ke sha hɛ: «'Ya nde veyi meghea ɗa pelɛ Siyon, ghweme ta ɗa nya keveyi geva tekeleke.»

⁷Kategeze ghena nya gezete Mahwətə 'ya, ma ke sha 'ya: «Gha ya kawəzege ta ɗa. Se te ɓəshi nya ne, 'ya ya kayiteyɛ ŋa.

⁸Ma ke'yɛwete pɛtɛa hwelefefi na va 'ya ne, kateve ŋa hɛ 'ya kaŋa ŋa. Katenza hɛɗia ŋa hwa'a te mendɛkwe ta hɛɗi.

⁹Kate'yɛ hɛ na le geta lɛ, katempə hɛ na kala ghene.»

¹⁰Ma tsetsenya gɛ ka meghea kɛfi, nza mə kentsehwele ntsehwele. Fate mə ghena, gheyɛ ka meha ghwə nyi te hɛɗi lema.

¹¹Mene nda mə slene ke Mahwətə le ghazlənə, Zlama mə le bare bare.

¹²'Yɛ mə ghəa ŋayɛ yagha ŋkɛ tehwepete wənə ba'a yagha yɛ teza ŋayɛ kwa hweŋkwa. Kwa nza ŋkɛ ne, kahe kahe hwepe wənəa ŋkɛ. Zlama ya va pɛtɛa mbeli nyi kwa ghwədərəa ŋkɛ.