Read kapsiki Cimə 28 Bible Online

Cimə 28 - kapsiki bible

Cimə 28

¹Ciməa David. Mahwətə yawe, 'ya katsa ŋa lewela. Keleɓa ta ɗa, nzama na kamədəŋə gɛ ma! Ma kenza ŋa na tikə tikə ne, nahe tenza ŋa ɗa.

²Təhwə təhwə, fate səkwə ta ɗa vəa ŋkwa nya tsa ŋa lewela 'ya, vəa ŋkwa nya kafe dzeve 'ya laka ŋkwa nya keveyi geva tekeleke tsape mbe ghɛa ŋa.

³Mene ɗa ma na kala ka 'yaghwa mehele keɗema kala ka ndiremi ndiremia mehele ma. Ghena ganji yageze nda hɛ ke ka ghedəkwəa nci, ama wəsə kwa ndiremi yaviɗi kwa wənəa nci.

⁴Menete nda ke hɛ kala slene ta nci ba'a kala fete nyi menete hɛ. Menete nda ke hɛ kala nya menete nda hɛ ke kweci mbeli, zhɛneyi wəshi nyi menete hɛ kwa ghə.

⁵Kafave wəshi nyi mene Mahwətə keɗema slene nyi mene dzeve ta ŋkɛ hɛ we. Yawa, zamte sebe ŋkɛ te hɛ, zhɛnema hɛ kasate te ŋkwa gɛ!

⁶Hana 'ya sha Mahwətə, kwa nza ŋkɛ nahe ŋkɛ kefate səkwə ta ɗa.

⁷Mahwətə ya kaberete ta ɗa ba'a kageləa ɗa. Nahe 'ya kendeke nda wənəa ɗa, tagha gɛ, pa kemanakɛ ɗa. Zlama ya kwa wənəa ɗa, 'ya katsahe ŋkɛ le cimə.

⁸Mahwətə ya kaberete ta mbelia ŋkɛ. Kaŋkwa nya berete nya kembele meghe nya ntave ŋkɛ.

⁹Mbelete mbelia ŋa, wəpikɛ mbeli nyi kaŋa ŋa, nza kande ya hɛ ba'a newe ghweme te hɛ kaghala ghala.