Read kapsiki Cimə 29 Bible Online

Cimə 29 - kapsiki bible

Cimə 29

¹Ciməa David. Gheyɛ ka ghwene ta shala, ɗepete mə Mahwətə, ɗepete mə zləvə ba'a berete ta Mahwətə.

²Ɗepete mə zləvə nya te sləa Mahwətə, Gwəɗəŋə mə ntiŋə ghə mbe hɛɗi mbe kema ta Mahwətə, vəa ŋkwa nya ncɛ geva nza ta ŋkɛ tekeleke.

³Hərəkə ŋkwa nya te ndərə va ŋwələa Mahwətə, kaberazlɛ va Shala nya nza zləvə te, hərəkə ŋkwa nya te ndərə va Mahwətə.

⁴Le berete gaka ŋwələa Mahwətə, le zləvə gaka ŋwələa Mahwətə.

⁵Kaɓeɓele yɛ lekeleke ŋwələa Mahwətə, kahwehweshi yɛ lekelekea ka Liban Mahwətə.

⁶Katsərəkə Liban kala mca nya kawəzege, Hɛrmon kala sla gamba nya kawəzege.

⁷Kamaɗake ghwə ŋwələa Mahwətə.

⁸Kagaŋkəɗə ɓerama ŋwələa Mahwətə, kagaŋkəɗə ɓerama ta Kadɛs Mahwətə.

⁹Kayeya le nyi zhɛ nda ya ke hɛ ŋwələa Mahwətə. Kabete sleke te yɛ wəfe. Ma mbe ghɛa ŋkɛ ne, ma ke mbeli pɛtɛ sha geze: «Zləvə ya te Shala!»

¹⁰Mahwətə ya te ghəa ndərə nyi lɛame lɛame, Mahwətə ya kameghe nya kaghala ghala.

¹¹Kateve nda berete Mahwətə ke mbelia ŋkɛ, katewəpi mbelia ŋkɛ Mahwətə laka kwelɛŋe.