Read kapsiki Cimə 30 Bible Online

Cimə 30 - kapsiki bible

Cimə 30

¹Ciməa David. Cimə keve ghɛa Shala tekeleke.

²Mahwətə yawe, katsahe ŋa 'ya, kwa nza ŋkɛ nahe na kekesakate ɗa te ŋkwa, kesərəakɛ ka jaga ta ɗa na kaŋ'wəshi ɗa we.

³Shala Mahwətə yawe, nahe 'ya ketsave ŋa lewela, tagha gɛ, pa na mbete ɗa.

⁴Mahwətə, nahe na kekelakame ɗa kwa ghɛa mbelia kwahɛɗi. Mɛa kwele se 'ya, ama nahe na kezhɛne kandeke ɗa mpi.

⁵Gha nda mə cimə ke Mahwətə, gheyɛ mbelia ŋkɛ, tsahe mə sləa ŋkɛ nya keveyi geva tekeleke.

⁶Kavə ɓɛhwɛ temə hwepe wənəa ŋkɛ, ama kala nza ta hɛa wəndə teghweme temə ganyɛa ŋkɛ. Hetɛhwɛɗi ne, nehwene ya shɛ, ama masheke, gaghwe ya shɛ.

⁷Ma vəa ŋkwa nya se 'ya gwezlayɛ ne, ma 'ya sha se kageze: «Kateteɗe 'ya tɛape we.»

⁸Mahwətə yawe, ma mbe ganyɛa ŋa ne, nahe na kendeke ɗa nza gwezlayɛ. Ama kwa zhɛrave ɗa wəmbə na ne, pa ghazlənə zhɛte ɗa.

⁹Mahwətə yawe, nahe 'ya ketsave ŋa lewela, nahe 'ya kese kampi ŋa dzeve Mahwətə.

¹⁰Wa wəsə nya ŋ'we na mbe mte ta ɗa ba'a mbe dzawa kwele ta ɗa wa? Katetsahe ŋa wəndə nya kemte mte na? Kategezete kaganda ta ŋa ŋkɛ na?

¹¹Mahwətə yawe, fate səkwə ta ɗa ba'a zhɛakɛ heli yitea 'ya gi! Mahwətə yawe, kemanakɛ ɗa gi!

¹²Nahe na kezhɛrete nehwene ta ɗa kawetse zlama, nahe na kembeɗate lekwesa gəsəkə te ŋkwa zlave nya hwa hwə va 'ya.

¹³Vatse gɛ ne, kategha zləvəa ŋa 'ya, katenza 'ya divə we. Shala Mahwətə yawe, katetsa ŋa hana 'ya kaghala ghala.