Read kapsiki Cimə 32 Bible Online

Cimə 32 - kapsiki bible

Cimə 32

¹Ciməa David. Zlama ya va wəndə nya kelemte geva fete ta ŋkɛ ba'a nya dəpəmte geva jaɗafa ta ŋkɛ.

²Zlama ya va wəndə nya ɓelama jaɗafa ta ŋkɛ Mahwətə ba'a nya ɗema mbəɗəkwə mbe mehele ta ŋkɛ.

³Ma keɗema 'ya ncɛ fete ta ɗa ne, kedene dene nza geva ta ɗa va ŋələvə keveci keveci.

⁴Kwa nza ŋkɛ ma veci le viɗi ne, ɗaŋe ɗaŋe nza dzeve ta ŋa kənəa 'ya, kələsəwə səwə nza geva ta ɗa kala wəfe nya mbe ghwə ta ghele. Zhɛne mpi

⁵Nahe 'ya kencɛte ŋa jaɗafa ta ɗa, kese 'ya kawəfərə fete ta ɗa we. Ma 'ya gezete: «Katencɛ nda fete ta ɗa 'ya ke Mahwətə», Ama gha ne, nahe na kekelemte ɗa ɗaŋeɗa ta jaɗafa ta ɗa. Zhɛne mpi

⁶Nda pɛtɛa mbeli nyi dɛŋe dɛŋe te gha kasəkwə ŋa vəa ŋkwa nya ɗepete fete ta nci hɛ. Ya ghwa sawa kwele kwele gɛ ne, katekekave hɛ ŋkɛ we.

⁷Gha ya kaŋkwa kewəfərə ta ɗa, kaya ɗa na va ndiremi, katedzasle ɗa na le geza. Zhɛne mpi.

⁸Ma ke Mahwətə gezete ɗa: «Kateteke ŋa wəsə 'ya, katencɛ ŋa hweŋkwa nya kele na 'ya, kateve ŋa ntsehwele 'ya ba'a kateve ntsə 'ya te gha.

⁹Nzama na kagezhi kala gədəwə keɗema kala gədəwə kwara nya ghereŋe hwɛ ta ŋkɛ mbeli le lɛ nya mbe mɛ ba'a zewe ma. Tagha gɛ, wəsə shɛ katemene ŋa geva we.»

¹⁰Kwele kwele tesa yaka nde 'yaghwa mehele, ama ɗe nde tedzasle wəndə nya keve ghə te Mahwətə.

¹¹Gheyɛ mbeli nyi tiɗiɗi, zlama mə tewəmbəreke Mahwətə, nza mə fare fare gɛ! Gheyɛ mbeli nyi nza wənəa ŋayɛ tiɗiɗi, Tsa mə gaghwe gɛ!