Read kapsiki Cimə 39 Bible Online

Cimə 39 - kapsiki bible

Cimə 39

¹Se va Yedəwtəwn, wəndə nya te ghəa cimə. Ciməa David.

²Ma 'ya sha se kageze: «Ma nza ta ɗa ne, katetsefe ghɛnia ɗa 'ya, kateŋzle mɛa ɗa 'ya te və nya tenza nde 'yaghwa mehele kwa kema ta ɗa.»

³Divə ba'a tikə tikə 'ya nza ɗa, pa 'ya ɗema geze ghena ganyɛ. Ama pa yaka ta ɗa mtsehete geva.

⁴Kala ghwə ndə ɗa ŋkwa nya kwa wənəa ɗa. Kala ndə ta ghwə se ŋələvə ta ɗa. Tagha gɛ, ma 'ya gezete ghena:

⁵Mahwətə, ncɛte ɗa vəa kiɗi ta mpia ɗa ba'a nza ta hɛa ɗa teghweme. Tsagha ne, kateɗepe kaɗema zləvə te 'ya.

⁶Deke kala bezlea hwə dzeve nza ta hɛ. Gəmə nza ta ɗa kwa kema ta ŋa. Ya wəndə nza teghweme ne, gəmə ŋkɛ. Zhɛne mpi.

⁷Kaslə ŋkɛ ba'a kazhɛne geva ŋkɛ kase kala shenaŋkwe. Kwele kwele leɓe ghə ŋkɛ, ama gəmə. Katsene wəshi ŋkɛ, ama keɗepe wəndə nya ketefə hɛ ŋkɛ we.

⁸Mahwətə, wa yave ghə 'ya tsetsenya gɛ? Te gha ve ghə 'ya.

⁹Mbelete ɗa va pɛtɛa jaɗafa ta ɗa, sərəma ka gezhia kɛfi na kaŋele ɗa ma.

¹⁰Nahe 'ya kenza ɗa tikə tikə, katezhɛne 'ya kaghwene mɛ we. Kwa nza ŋkɛ ne, gha nde mene slene ta ŋa.

¹¹Sərəakɛ ɗa ɗa, 'ya kadene va ɗa ta dzeve ta ŋa.

¹²Ka'yɛ wəndə na laka ɗa ŋkɛ va fete ta ŋkɛ, kala lema ne, kazeme wəsə nya ɗe ŋkɛ na. Kaganda ne, gəmə wəndə ŋelɛ. Zhɛne mpi.

¹³Fa səkwə ta ɗa Mahwətə, ve sleme yitea lewela ta ɗa, zhɛrema nehwene ta ɗa na katsewe va mədəŋə ma. Kwa nza ŋkɛ ne, nde se se 'ya sha gha, mentiɓə 'ya kala pɛtɛa ka shihɛ ɗa.

¹⁴Kelemte ntsə ta ŋa te 'ya, tsagha ne, katenza ŋ'wəshi te mɛ va 'ya nda teslə 'ya ba'a nda teza sebe te 'ya.