Read kapsiki Cimə 40 Bible Online

Cimə 40 - kapsiki bible

Cimə 40

¹Se va wəndə nya te ghəa cimə. Ciməa David.

²Nahe 'ya kevate ghə te Mahwətə, nahe ŋkɛ keyiŋwəte geva laka 'ya, nahe ŋkɛ kefate lewela ta ɗa.

³Nahe ŋkɛ kekelakame ɗa kwa ki nya lɛame, kwa nzaɓe nya kwa zeweve ta hɛɗi. Pa ŋkɛ ghereŋeyi seɗa ta ɗa kwa ghəa gela, pa ŋkɛ ndeke ŋkeɗe seɗa le gezleŋema ghɛ.

⁴Ma kwa mɛa ɗa ne, pa veyi cimə mɛnɛfɛ, tsahe kaŋa ŋkɛ, gheŋkɛ nya kaShala ta ɓəmə. Kwele kwele mbeli nyi ketenewe wəsəa shɛ, katehawe hɛ ba'a kateve ghə hɛ te Mahwətə.

⁵Zlama ya va wəndə nya kevate ghə te Mahwətə, nya keɗema kazhɛre geva laka ka ŋkele ntsə ba'a laka mbeli nyi keɗehwe tseŋwə.

⁶Shala Mahwətə ta ɗa, kwele kwele wəshi meŋele ba'a slene nyi menete na kaŋa n'yɛ! Wəsə shɛ yipə yipə le gha we. Kaɗe 'ya kageze wəshia shɛhɛ, kazhɛne ghwelə yitea hɛ, ama kezlɛazlɛa hɛ kezha ɓelate geva.

⁷Kese na kaɗe melɛ keɗema wəshi we, nahe na keghwenemte ɗa sleme ta ɗa kezha fa ghena. Kese na ka'yɛwe melɛ kwa tere tere keɗema melɛ keyaɓe jaɗafa we.

⁸Tagha gɛ, ma 'ya gezete: «Wa nya 'ya nya kase sha gha. Ma mbe palepa kwa peɗe peɗe ne, nahe 'ya kesləyi wəsə nya hi 'ya kamene kerafe rafe.

⁹Shala ta ɗa, kamawe 'ya kezha mene ɗe ta ŋa, kave wəsə mahalegəa ŋa 'ya kwa wənəa ɗa.»

¹⁰Hwa tsene nya wəba ne, kageze nza tiɗiɗia ŋa 'ya, Newema, kaŋzle mɛa ɗa 'ya we. Mahwətə, nahe na keɗepe.

¹¹Kawəfərə nza tiɗiɗia ŋa 'ya kwa wənəa ɗa we, ama kageze ganyɛa ŋa ba'a mbele ŋkwa ta ŋa 'ya. Ma hwa tsene nya wəba ne, kawəfərə ɗe ta ŋa ba'a kaganda ta ŋa 'ya we.

¹²Ma gha Mahwətə ne, kateɗema na kazhɛ heli yitea 'ya we. Kateya ɗa ganyɛa ŋa ba'a kaganda ta ŋa kaghala ghala.

¹³Kaganda ne, kase yɛ ndiremi te yayata ŋkwa, kazhɛne 'ya kaɓelate hɛ we. Kadzeghəa 'ya zhɛme ta fete nyi menete 'ya, kazhɛne 'ya kasəwəte newe hɛ we. Kwele kwele ma hɛ ke shinti nyi mbe ghəa ɗa, kwele kwele yirənyɛ mehele ta ɗa.

¹⁴Mahwətə, təhwə təhwə mbelete ɗa. Mahwətə, se kahe kahe kakemane ɗa.

¹⁵Ma mbeli nyi keɗe kaza mpia ɗa ne, nza hawe te hɛ pɛtɛa nci! Ma mbeli nyi keɗe kave ndiremi te 'ya ne, ŋkamte hɛ ba'a kelemte zləvə te hɛ.

¹⁶Ma mbeli nyi keŋ'wəshi: «Ha! ha! ha!», te ghəa ɗa ne, nza mɛa nci teŋzle va hawe.

¹⁷Ama pɛtɛa mbeli nyi kezele ŋa ne, wetse hɛ va zlama tewəmbəreke gha! Ma mbeli nyi keɗe ŋa, gha nde mbele ŋkwa ne, geze hɛ kevə kevə: «Mahwətə ya wəba.»

¹⁸Ma 'ya ne, nde titikwə ba'a nde dewə ŋeli 'ya, ama kazəzə ɗa Mahwətə. Gha ya kande kemane ɗa ba'a kande mbele ɗa. Shala ta ɗa, derama na gɛ ma!