Read kapsiki Cimə 42 Bible Online

Cimə 42 - kapsiki bible

Cimə 42

¹Se va wəndə nya te ghəa cimə. Ciməa ŋwalea Korɛ.

²Kala nya mawe yɛmə nya kwa hələ le ne, tsagha mawe ŋa 'ya, gha nya kaShala ta ɗa.

³Ndere nde zhɛ ɗa yitea Shala, yitea Shala teghweme. Hweŋkwa tedzembe ghɛa ŋkɛ ba'a tedzawa kema ta ŋkɛ 'ya tse wa?

⁴Veci le viɗi ne, nehwene ya kaɗafa ta ɗa, kwa nza ŋkɛ ma ke mbeli sha geze ɗa kevə kevə: «Tema Shala ta ŋa gɛ wa?»

⁵Zəzə nyi kesla ɗa heli ya va 'ya: Vəashi ne, te kema ta mbeli se 'ya kadzeghwa, nahe 'ya kese kalə ghɛa Shala hwa mbeli nyi kezlama, te tepe ta gaghwe ba'a tsahe.

⁶Va wa taze geva mehele ta ɗa tse wa? Va wa ŋgaɗe ghə 'ya va nza ta ɗa tse wa? Megela ma ve ghə te Shala. Kaganda ne, katezhɛne 'ya katsahe ŋkɛ, gheŋkɛ nya kande mbele ɗa ba'a kaShala ta ɗa.

⁷Shala ta ɗa, ketaze taze mehele ta ɗa. Vatse zəzə ŋa 'ya se te ŋkwa nya nza nya 'ya, te hɛɗia Zhəwrdɛŋe, pelɛ ghweme ta Hɛrmon ba'a pelɛ ghweme ta Mitsɛyar.

⁸Kave nda gaka na ke yɛ ghwa, kaheheka ghəa nci yɛ ghwa. Kawədzərə pɛtɛa ghwa shɛhɛ na kənəa 'ya, tagha gɛ, kanza 'ya bətə kwa yɛmə.

⁹Ncɛte ɗa ganyɛa ŋkɛ Mahwətə heveci. Tsagha gɛ ne, kategha nda cimə 'ya heviɗi, katesəkwə Shala nya keve ɗa teghweme 'ya.

¹⁰Ma 'ya gezete nda ke Shala nya keya ɗa: «Va wa zaghəyite ɗa na wa? Va wa dzeghwa 'ya keyirə yirə ba'a sa ɗa yaka ka jaga ta ɗa wa?»

¹¹'Ya yaŋele ka ghema ta ɗa. Ma ke hɛ sha geze ɗa kevə kevə: «Tema Shala ta ŋa gɛ wa?» Kala wəsə nya mpəmte 'yɛ'yɛa ɗa hɛ.

¹²Va wa taze geva mehele ta ɗa tse wa? Va wa ŋgaɗe ghə 'ya va nza ta ɗa tse wa? Megela ma ve ghə te Shala. Kaganda ne, katezhɛne 'ya katsahe ŋkɛ, gheŋkɛ nya kande mbele ɗa ba'a kaShala ta ɗa.