Read kapsiki Cimə 45 Bible Online

Cimə 45 - kapsiki bible

Cimə 45

¹Se va wəndə nya te ghəa cimə. Ghena nya ghate ŋwalea Korɛ kacimə. Ciməa ɗe nya tsa ŋgwəleŋə mbeli yite.

²Kagwəɗə gwəɗə wənəa ɗa yitea ghena ganji, 'ya kagha nda cimə ke meghe. Nza ghɛnia ɗa kala wəsə kerafe wəsə ta nde ɗepe rafe wəsə.

³Gha ya ganyɛ ma hwa zhili, ghena ganji ka same kwa mɛa ŋa. Vatse wəpikɛ ŋa Shala kaghala ghala.

⁴Katsala kempa, seɗeyite kafayɛa ŋa yitea slerepe, gheŋkɛ ya kakwelea ŋa ba'a kazləvəa ŋa.

⁵Ntsəte rəgia ŋa ba'a hərəte ŋkwa. Dzawa hweŋkwa kezha kaganda, nza kagwedə ba'a nza tiɗiɗi. Tekave ŋa slene nyi ghazlənə mbeli va hɛ dzeve kwa zeme ta ŋa.

⁶Kelɛmelɛa lɛmelɛanji yɛ have ta ŋa, kampempahwe wənə hɛ te ka jaga ta meghe, kabete mbeli te hɛɗi va gha.

⁷Kala pasla ta Shala pasla ta ŋa, kaghala ghala tetemə ŋkɛ. Kasleke mbelia ŋa na laka nza tiɗiɗi.

⁸Wəsə nya tiɗiɗi yaɗe na, kaɗe wəshi nyi ndiremi na we. Vatse nda veyi ŋa Shala nya kaShala ta ŋa tekeleke laka sheke n'yia zlama kwa ghəa ŋa. Za ma ɗehwe ŋa ŋkɛ ke kweci mbelia ŋa.

⁹Kamama ta 'wərdə zəŋwə yɛ lekwesa ta ŋa, katsa ŋa geva wəshi ketsa kezeɗe zeɗenji shave ki meghea ŋa nyi kepesa pesa le slene ta cewe.

¹⁰Kiagha nzanji ŋwalea kwɛa meghe, wəshi kepesa geva ta ŋa ya te geva ta nci. Ma laka dzeve kwa zeme ta ŋa ne, tagha meghekɛ ghɛ nya kepesa pesa le mze kwa tere tere ganyɛ.

¹¹Fa gɛ wəzha ta ɗa, newema ba'a ghwene slene ta ŋa, zaghəyite hwelefe ta ŋa ba'a mbeli nyi ki ghɛa yiteyɛ ŋa.

¹²Kamawe ndeɗea ŋa meghe! Gheŋkɛ ya kande sleke ŋa tsetsenya, gwəɗəŋə ŋa kwa kema ta ŋkɛ.

¹³Ma ka Tir nyi kambeli nyi mcɛlə ma ne, katedzeghe hɛ kaghwete ŋa le wəshi gəmə.

¹⁴Zləvə ya te wəzha ta meghe ki ghɛa meghe. Mze kwa tere yatsetsate mbeli dzate te lekwesa ta nta.

¹⁵Ma kwa nde mbe lekwesa nya hweliɗiɗi ne, pa nde keleghe geva kalə sha meghe. Ma kwa sebe ta nta ne, pa deghelɛshi nyi kaka mcɛhɛ nta, fəghe geva kadzeki sha gha.

¹⁶Kabeghe hɛ mbeli le yɛyi. Kadzeki ghɛa meghe hɛ.

¹⁷Katedzeme pasla ta ka shihɛ ŋa ŋwale ŋa, kateve hɛ na kambeli nyi te ghə te hɛɗi lema.

¹⁸Kategeze sləa ŋa 'ya keshi keshi. Tsagha gɛ, katetsahe ŋa mbeli pɛtɛ kaghala ghala.