Read kapsiki Cimə 48 Bible Online

Cimə 48 - kapsiki bible

Cimə 48

¹Cimə. Ciməa ŋwalea Korɛ.

²Mahwətə ya wəba, nahe ŋkɛ kehi katsahe ŋkɛ mbeli mbe meleme ta Shala ta ɓəmə, pelɛ ghweme ta ŋkɛ nya keveyi geva tekeleke.

³Ghweme nya ndeɗe ba'a nya biya ŋkɛ, kave nda zlama nde ke hɛɗi lema. Keɗaŋe ta bela kwa gwela ya kaghweme ta Siyon, kameleme ta meghe nya wəba.

⁴Ma ki ghɛ meghe nyi mbe Siyon ne, nahe mbeli keɗepe Shala kaŋkwa kewəfərə.

⁵Nahe ka meghea kɛfi ketsenete geva, nahe hɛ kese kaha mpa kanya kwetɛŋe ke Siyon.

⁶Nakɛma ta nci ke melemea shɛ ne, pa hɛ yirənji. Ma kwa dakenji hɛ ne, kweracɛ hɛ hwɛnji.

⁷Tagha gɛ, ntake hɛ kabare bare, kala nya heha male va ya,

⁸kala sefə nya kesame kwa zeweve ta ghweme, te və nya mpə yɛ kwambeləa ka Tarsis ŋkɛ.

⁹Ma wəsə nya fate ghen'yɛ kageze mbeli ne, nahe ghen'yɛ kenakɛ mbe meleme ta Mahwətə nde berete, mbe meleme ta Shala ta ɓəmə. Kateve nda berete Shala kaghala ghala. Zhɛne mpi.

¹⁰Shala ta n'yɛ, ma mbe ghɛa ŋa ne, kave zəzə ghen'yɛ te ɗe ta ŋa.

¹¹Shala ta n'yɛ, zləvə ya te gha hwa'a te mendɛkwe ta hɛɗi, katetsahe ŋa mbeli hwa'a te mendɛkwe ta hɛɗi. Wəshi nyi kehi yamene dzeve kwa zeme ta ŋa.

¹²Kazlama ghweme ta Siyon, fare fare meleme nyi mbe Zhəwda yitea meha ghwə ta ŋa.

¹³Ntəslə mə Siyon, dzasle mə ŋkɛ. Ɓela mə yɛ ghɛ nyi bebiya bebiya nyi mbe.

¹⁴Neweve mə zli nya yite, ɓela mə ghɛ meghe nyi mbe kezha geze nda yɛ ke hwelefe nya keteya

¹⁵Shala shɛ ya kaShala ta ɓəmə kaghala ghala, gheŋkɛ nde ncɛ ɓəmə hweŋkwa kaghala ghala.