Read kapsiki Cimə 49 Bible Online

Cimə 49 - kapsiki bible

Cimə 49

¹Se va wəndə nya te ghəa cimə. Ciməa ŋwalea Korɛ.

²Gheyɛ mbeli pɛtɛ, fa mə ghena, gheyɛ mbeli nyi te hɛɗi lema, ghwene mə sleme,

³ka dewə ŋeli ba'a mbelia jama, ka titikwəa kɛfi ba'a ka mcɛləa kɛfi kanya kwetɛŋe.

⁴Ghena ntsehwele yageze 'ya, ghena ganji yazəzə 'ya.

⁵Kave sleme 'ya megela yitea ghena ta ka ntsehwele ntsehwele, kancɛ ghena nyi mbe hɛ 'ya kwa ŋgwəleŋəa ɗa.

⁶Va wa zhɛ ɗa ghazlənə te vəa ndiremi, te və nya dzaslete ɗa ka mbəɗəkwə kezha mene ɗa wəsə kwa ndiremi wa?

⁷Te wəshi nyi va hɛ ve ghə hɛ, le mcɛləa nci mene fege hɛ.

⁸Wəndə shɛ kambeɗeke kwete wəndə ya kaŋkikɛ nda wəsə kembeɗe mpia ŋkɛ ke Shala we.

⁹Ya tsemanyɛ wəsə nya ŋkikɛ hɛ kezha mpia nci ne, katenza wəsəa shɛ wərə tɛape we.

¹⁰Ma zəzə hɛ ne, katenzanji hɛ teghweme kaghala ghala ba'a kateyakɛ ghəa nci hɛ va dzawa kwele na?

¹¹Ama kanewe newe mbeli nda mpə ka ntsehwele ntsehwele, nda za sebe te ka gezhia kɛfi ba'a ka dewə mehele. Tagha gɛ, kasərə nda mcɛləa nci hɛ ke kweci mbeli.

¹²Ma zəzə hɛ ne, kaghala ghala tenza ghɛa nci ba'a keshi keshi tenza yɛ ŋkwa kenza ta nci, ghenci nyi kehekate nda sləa nci ke yɛ hɛɗi.

¹³Ama katemə wəndə nya nza zləvə te we. Yipə yipə ŋkɛ le wəsə keseɗa nya kemtenyɛ.

¹⁴Tsetse nza ta mbeli nyi keve ghə fate fate te ghəa nci, ntishɛ ta mbeli nyi keɗe kafa nda ŋa nci mbeli ke hɛ. Zhɛne mpi.

¹⁵Kaŋka hɛ mbeli kala timɛti kadzawa ghɛa mbelia kwahɛɗi, mte ya kande ya hɛ. Ma te hendɛ ta ŋkwa ne, kateŋkeɗe hɛ mbeli nyi tiɗiɗi, kateza ndeɗea nci. Katenza ghɛa mbelia kwahɛɗi kaŋkwa kenza ta nci.

¹⁶Ama katembeɗe mpia ɗa Shala same kwa ghɛa mbelia kwahɛɗi. Kwa nza ŋkɛ ne, katekele ɗa ŋkɛ. Zhɛne mpi.

¹⁷Yirəma na te və nya kemave mcɛlə kwete wəndə ba'a te və nya mbakenji wəshi nyi ki ghɛa ŋkɛ ma.

¹⁸Ma vəa ŋkwa nya temte ŋkɛ ne, wəsə shɛ kakele ŋkɛ we, katedzawa kwele mcɛləa ŋkɛ yite we.

¹⁹Ma vəa ŋkwa nya nza ŋkɛ teghweme ne, ma ke sha tsahe ghəa ŋkɛ: «Yawa meyidala! Nahe na kejive mbe kema.»

²⁰Ndagwara katelə ŋkɛ sha ka shihɛnyɛ nyi keɗema nya katezhɛne kanakɛ waŋe tɛape.

²¹Ma wəndə nya nza zləvə te, nya kande dewə ntsehwele ne, yipə yipə ŋkɛ le wəsə keseɗa nya kemtenyɛ.