Read kapsiki Cimə 5 Bible Online

Cimə 5 - kapsiki bible

Cimə 5

¹Se va wəndə nya te ghəa cimə. Yitea yɛ shela. Ciməa David.

²Mahwətə, ve sleme yitea ghena ta ɗa, fa ŋələvə ta ɗa.

³Meghea ɗa ba'a Shala ta ɗa, ve sleme yitea lewela ta ɗa, ke gha ve ŋa səkwə ta ɗa 'ya.

⁴Masheke ne, kafa ŋwələa ɗa na Mahwətə. Kiɗima ta ŋkwa ne, kahi geva 'ya kezha gha ba'a kaneghe zhɛne ta ŋa 'ya.

⁵Kenza na kashala nya keɗe wəsə nya ndiremi we. Kanza nde 'yaghwa mehele vare gha we.

⁶Kaghereŋe ka ŋkele ntsə kwa kema ta ŋa we. Kaɗe ntsə ta ka mene wəshi nyi ndiremi ndiremi na we.

⁷Kaza sebe na te mbeli nyi kesla tseŋwə. Mahwətə, kaɗe ntsə ta nde pesle ŋkwa ba'a nde mbəɗəkwə na we.

⁸Ama te zlaɓa ta ɗe ta ŋa nya wəba ne, wərə 'ya kadzeki ghɛa ŋa. Le hawe nya wəba ne, kagwəɗəŋə 'ya laka ghɛa ŋa nya keveyi geva tekeleke.

⁹Mahwətə, beghe ɗa laka nza tiɗiɗia ŋa va mbeli nyi keceha ɗa. Hite hweŋkwa ta ŋa mbe kema ta ɗa.

¹⁰Kaganda shɛ kwa mɛa nci we. Deke mene fete yazəzə wənəa nci. Kwele nya keghwene ghwene mɛa nci ba'a wəmbə mazleraɗa ghɛnia nci.

¹¹Shala yawe, ncɛte fete ta nci. Teɗenji hɛ va zəzə ta nci, ŋkamte hɛ va pɛtɛa fete ta nci va nya nza hɛ kaka fama ŋa ghena.

¹²Ama katezlama pɛtɛa mbeli nyi kwa ghwədərəa ŋa, katezlama hɛ kaghala ghala, kwa nza ŋkɛ kateya hɛ na. Kateve nda tsa gaghwe na ke mbeli nyi keɗe sləa ŋa.

¹³Mahwətə, gha nde wəpi mbeli nyi tiɗiɗi, kadzasle hɛ ganyɛa ŋa kala gelə.