Read kapsiki Cimə 52 Bible Online

Cimə 52 - kapsiki bible

Cimə 52

¹Se va wəndə nya te ghəa cimə. Ciməa David.

²Te və nya se Dowɛg, nde Ɛdom sha Sawəl, ma ke shɛ: «Nahe David kedzekinyɛ ki ghɛa Ahimɛlɛk.»

³Gha nya kakatsala, va wa mene fege na le 'yaghwa mehele ta ŋa tse wa? Keveci keveci nza ganyɛa Shala.

⁴Ghena ta mpə ŋkwa yazele ghɛnia ŋa, nɛme nɛme nde kala mpiɗi, ɗɛme ɗɛme nde yitea ghwete ŋkwa.

⁵Ɗe ma wəsə nya ndiremi na ke nya ganyɛ, ɗe ma tseŋwə na ke kaganda. Zhɛne mpi.

⁶Ghena nyi kezhɛ ŋkwa yaɗe na, ghɛni mbəɗəkwə ya kwagha!

⁷Vatse teza ŋa Shala kaghala ghala, katekese ŋa ŋkɛ, katentsehe ŋa ŋkɛ shave ki ghɛa ŋa. Katenteɗemte ŋa ŋkɛ te hɛɗia mbeli nyi teghweme. Zhɛne mpi.

⁸Tagha gɛ, katenewe wəsə nya kemenete geva mbeli nyi tiɗiɗi ba'a katezhɛ nda ghazlənə ke hɛ. Ma ke hɛ sha teyiɗə ŋkɛ:

⁹«Newema mə katsala nya gɛ gi! Kese ŋkɛ kave Shala kande ya ŋkɛ we, ama te mcɛləa ŋkɛ vate ghə ŋkɛ. Va nya nza ŋkɛ kande mcɛlə ne, kande berete veyi ghəa ŋkɛ ŋkɛ.»

¹⁰Ama 'ya ne, kala bekele nya gwəzləmə mbe ghɛa Shala 'ya. Te ganyɛa Shala ve ghə 'ya kaghala ghala.

¹¹Kaghala ghala tetsahe ŋa 'ya tewəmbəreke wəsə nya menete na. Kave ghə 'ya te sləa ŋa kwa kema ta mbelia ŋa, va nya nza na ganyɛke.