Read kapsiki Cimə 64 Bible Online

Cimə 64 - kapsiki bible

Cimə 64

¹Se va wəndə nya te ghəa cimə. Ciməa David.

²Shala yawe, fa ŋgaɗe ghə ta ɗa, ya mpia ɗa va nde ghema nya ghazlənə 'ya ve.

³Wəfərəakɛ ɗa va yɛ zəzə ta ka 'yaghwa mehele, ghena yatsa hɛ yitea 'ya, geva yatsene hɛ kezha mene ɗa wəsə kwa ndiremi.

⁴Nɛme nɛme mɗɛte ghɛnia nci hɛ kala kafayɛ, kala yɛ have he ŋkwa ghena nyi geze hɛ.

⁵Kawəfərə hɛ kezha he wəndə nya ɗema fete ve, taghanyɛ he ŋkɛ hɛ kaɗema ghazlənə kazhɛ nda ke hɛ.

⁶Kantsə nda berete hɛ ke ghəa nci yitea wəsə kwa ndiremi, kageze ghena hɛ te keleŋa nyi teŋa hɛ tewəfərə. Ma ke hɛ sha geze: «Wa nde tenakɛ hɛ wa?»

⁷Kazəzə wəshi nyi ndiremi ndiremi hɛ, ma ke hɛ sha geze: «Nahe zəzə ta ɓəmə kedzehwe. Ma mbe wəndə ŋelɛ ne, wənə ya lɛame.»

⁸Ama pa Shala hehekɛ hɛ le have. Taghanyɛ ne, nahe zhi keɗakawa hɛ.

⁹Nahe ghɛnia nci kevate teɗe te hɛ, yayata wəndə nya kenakɛ hɛ kagagəzə ghə.

¹⁰Pɛtɛa mbeli keghazlənənji. Wəsə nya menete Shala yageze hɛ, katefave ghena nya mbe wəsəa shɛ hɛ.

¹¹Zlama wəndə nya tiɗiɗi te Mahwətə, ve ŋkɛ kaŋkwa kewəfərə ta ŋkɛ. Fare fare tenza pɛtɛa mbeli nyi nza wənəa nci tiɗiɗi.