Read kapsiki Cimə 69 Bible Online

Cimə 69 - kapsiki bible

Cimə 69

¹Se va wəndə nya te ghəa cimə. Yitea wəshi ketsa nyi nza zewe te hɛ. Ciməa David.

²Shala yawe, mbele ɗa, hwa'a yitea ŋwələ yɛmə va 'ya.

³Nda yanda ɗa nzaɓe nya te megenkene, wəsə shɛ kaghereŋeyi ɗa we. Nda yanda ɗa ŋkwəɗə ba'a kele yakele ɗa ghwa.

⁴Leɓakwe 'ya va tsa lewela, keshilə shilə ŋwələa ɗa, leɓakwe ntsə ta ɗa va newe se ta Shala ta ɗa.

⁵Ma mbeli nyi keɗema ntsə ta ɗa gəmə ne, kwele kwele ma hɛ ke shintia ghəa ɗa. Ma mbeli nyi keɗa ɗa ba'a nyi keɗema ɗa gəmə ne, keberete beretenji hɛ. Ma wəsə nya ghərəvema 'ya ne, nda 'ya kaŋkikɛ na?

⁶Shala, nahe na keɗepe gezhia ɗa, kewəfərəakɛ geva fete nyi menete 'ya va gha we.

⁷Shala Mahwətə nde berete, kaɗe 'ya kanza hawe te mbeli nyi keve ŋa ghəa nci we. Shala ta Israyɛl, kelema zləvə na seyi te mbelia ŋa tewəmbəreke 'ya ma.

⁸Tewəmbəreke gha zereghe ŋele 'ya, nza hawe kwa kema ta ɗa.

⁹Kala nde se se 'ya sha ka kesaka yiteyɛ ɗa, kala wəndə ŋkwərə sha ŋwale tezhilia meyɛ ɗa.

¹⁰Kwa nza ŋkɛ ma ɗe nya va 'ya kezha ghɛa ŋa ne, kala ghwə tere ɗa ŋkɛ. Kadzeghəa 'ya dzeghə ŋele ta mbeli nyi keŋele ŋa.

¹¹Ma vəa ŋkwa nya nehwene 'ya ba'a nya mene səwəmayɛ 'ya ne, kaŋele ɗa mbeli.

¹²Ma vəa ŋkwa nya hwepahwe wəsə 'ya hwa hwə ne, kayiɗə ɗa hɛ.

¹³Te 'ya sla ghena mbeli nyi te kələŋə, 'ya yagha ka ghwəyi ghwəyi kwa cimə.

¹⁴Mahwətə yawe, wa nya səkwə ta ɗa nya: nya ya kavə nya kenza ganyɛke. Shala yawe wəba ganyɛa ŋa, zhɛnete ɗa, kwa nza ŋkɛ gha ya kambele nya kaganda.

¹⁵Nteɗakame ɗa same kwa nzaɓe, yagha ŋkɛ kendahwe ɗa, zləgwəke ɗa va ka jaga ta ɗa ba'a va ŋkwəɗəa yɛmə.

¹⁶Sərəakɛ ɗa ma na kakele ɗa ghwa, kanda ɗa ki nya lɛame ba'a kazhiɓə geva kwele kənəa 'ya ma.

¹⁷Mahwətə yawe, zhɛnete ɗa gi! Kwa nza ŋkɛ ne, ganyɛke ɗe ta ŋa. Kala zhɛ helia ŋa nya kwele ne, zhɛrave ɗa geva gi!

¹⁸Zhɛnema na kawəfərə kema ta ŋa va nde mene slene ta ŋa ma. Mbe yaka 'ya, zhɛnete ɗa kahe kahe.

¹⁹Hende ɗa geva, nza kande ya ɗa, mbele ɗa va ka jaga ta ɗa.

²⁰Nahe na keɗepe ŋele, hawe ba'a yiɗə nya te 'ya. Pɛtɛa ka jaga ta ɗa kwa kema ta ŋa.

²¹Nahe ŋele kebezemte ɗa wənə, shewə 'ya ve. Nahe 'ya kese kaneghe zhɛ heli, ama gəmə. Nahe 'ya kese kasepa wəndə nya kegweɗakwe ɗa, ama kesləyi wəndə 'ya we.

²²Nahe hɛ kemeneyi ɗa wəsəa kwamasa hwa wəsə kezeme ta ɗa ba'a kwa nza 'ya shewə va ndere ne, pa hɛ same ɗa wəsə kwa ŋkɛara.

²³Nza wəshi kezemea nci kakeleŋa nya yitea hɛ ba'a yitea ka mentiɓəa slia nci.

²⁴Gharenji ntsə ta nci ba'a zhɛrenji hɛ kaka ghwələa kɛfi. Ɓelemte dəŋə te hɛ kaghala ghala.

²⁵Pelaghe kwelea beze ta wənəa ŋa kənəa hɛ, me ghwə ta hwepe wənəa te hɛ.

²⁶Zamte geva sebe te ghedəkwəa nci, nza yɛ cɛ lekwesa ta nci kakwəfi.

²⁷Kwa nza ŋkɛ wəndə nya ɗate na ne, yaka yasa nda hɛ shanda. Kamtsehe yaka hɛ kadzete mbeli nyi sahwe nda gəli na ke hɛ.

²⁸Mbakaghe nda fete ke hɛ kadzeghəa fete ta nci, ɗema hɛ ŋ'weve nza tiɗiɗia ŋa kaghala ghala.

²⁹Sehwemte geva sləa nci te palepa ta mpi, ɗema hɛ rafe geva hwa mbeli nyi tiɗiɗi.

³⁰Ma 'ya ne, gəli ba'a yaka ya te 'ya, ama kateya ɗa kemane ta ŋa Shala yawe.

³¹Katetsahe sləa Shala 'ya, kategeze kwelea ŋkɛ 'ya laka tsa nda hana.

³²Nya wəsə nya zeɗehwe nda ke Mahwətə za ma ke sla, ke mca nya nza tereme kwa ba'a cɛpe te.

³³Ma kwa tenakɛ mbele ta ɗa ka dewə ŋeli ne, katezlama hɛ. Ma gheyɛ mbeli nyi kezele Shala ne, hɛakɛ ŋayɛ Shala.

³⁴Kwa nza ŋkɛ ne, kafa səkwə ta ka titikwəa kɛfi Mahwətə, kaɗema mbelia ŋkɛ ŋkɛ vəa ŋkwa nya nza hɛ kwa daŋgayɛ we.

³⁵Tsahe ŋkɛ ghweme ba'a hɛɗi, yɛ ndərə ba'a pɛtɛa wəshi nyi kedzeghwa kwa hɛ.

³⁶Kwa nza ŋkɛ katembele Siyon Shala katezhɛne ŋkɛ kaŋa meleme nyi mbe Zhəwda. Katenza mbeli mbe hɛ ba'a katefə hɛ mbeli.

³⁷Katefə melemea shɛhɛ ŋwalea ka mene slene ta ŋkɛ kawəsə kezeme ghɛ, katenza mbeli nyi keɗe sləa ŋkɛ mbe hɛ.