Read kapsiki Cimə 71 Bible Online

Cimə 71 - kapsiki bible

Cimə 71

¹Mahwətə, nahe 'ya kentave ŋa kaŋkwa kewəfərə, pəli ɗa ma hawe na tɛape ma.

²Katembele ɗa na ba'a katepele ɗa na werete mbe nza tiɗiɗia ŋa. Ve sleme laka 'ya ba'a mbele ɗa.

³Nza kagela nya wəfərə 'ya mbe, ŋkwa nya nza 'ya kadzete ɗa kevə kevə. Nahe na ketarete kezha mbele ɗa. Kaganda ne, gha ya kagela ta ɗa ba'a kaŋkwa keya ɗa nya berete.

⁴Shala ta ɗa, mbelemte ɗa shave mbe dzeve ta nde 'yaghwa mehele, shave mbe dzeve ta ka mpə ŋkwa ba'a ka mene berete.

⁵Gha yavate ghə 'ya te Shala Mahwətə, ke gha ndeke nda ghə 'ya se kawəzege.

⁶Te gha dɛŋe geva 'ya se kawəzege, gha nde kelakawa ɗa sawa kwa hwəa meyɛ ɗa. Gha yatsahe 'ya keveci keveci.

⁷Kaŋa mbeli kwele kwele ne, kawəsə meŋele se 'ya, gha nde se kaŋkwa kewəfərə ta ɗa nya le berete.

⁸Deke tsahe ŋa nde se kwa mɛa ɗa, keveci keveci ɗe 'ya kazlape zləvəa ŋa.

⁹Neghamte ɗa ma na mbe və nya nza 'ya kehale hale ma. Wəfəyite ɗa ma na vəa ŋkwa nya kiɗinyɛ berete ta ɗa ma.

¹⁰Kwa nza ŋkɛ ne, te 'ya geze ghena ka jaga ta ɗa, nahe mbeli nyi kewəmbə ɗa ketsahwe ghena ta nci.

¹¹Ma ke hɛ: «Nahe Shala kewəfəyite ŋkɛ, keka ɓəmə shɛ mə keseve ŋkɛ, wəndə shɛ katembele ŋkɛ we.»

¹²Shala yawe, nzama na cakeɗake yitea 'ya ma, Shala ta ɗa, nde kahe kahe kakemane ɗa.

¹³Ma mbeli nyi keɗe za ta mpia ɗa, nza hɛ shewə va hawe ba'a zanyɛ sebe te hɛ. Ma mbeli nyi kemawe ɗa ndiremi ne, nza ŋele ba'a yiɗə te hɛ.

¹⁴Ma kaŋa ɗa ne, kafɛa 'ya yitea ve ghə te gha we, katsahe ŋa 'ya kajive kajive.

¹⁵Nza tiɗiɗia ŋa ba'a mbele ŋkwa ta ŋa yageze 'ya keveci keveci, kwa nza ŋkɛ kwele kwele wəshi ganjia ŋa.

¹⁶Kazlape wəshi nyi jama jama ta ŋa 'ya Shala Mahwətə, deke gha yahekɛme tiɗiɗia ŋa 'ya.

¹⁷Shala yawe, nahe na ketekave ɗa wəshi se kawəzege, pa tsetsenya 'ya kageze wəshi meŋelea ŋa.

¹⁸Ya 'ya nza kehale hale ba'a təwə təwə ghə ne, wəfəyite ɗa ma na ma Shala yawe ma. Ma tsagha gɛ, katezlape nda wəshi nyi menete dzeve ta ŋa 'ya ke ŋwale nyi tsetse ŋkwa ba'a ke nyi keteya.

¹⁹Shala yawe, pa pelɛ ghweme dzeme nza tiɗiɗia ŋa, nahe na kemenete wəshi nyi jama jama. Shala yawe, wa wəndə nya yipə le gha tse wa?

²⁰Gha nya kencɛte n'yɛ yaka ba'a ndiremi kwele kwele zhigə ne, katezhɛne na kasərə n'yɛ kanza teghweme. Katezhɛne na kakele ɗa same kwa ghɛa mte.

²¹Katembake ɗa zləvə na, katezhɛne na kagweɗakwe ɗa.

²²Ma tsagha, katetsahe ŋa 'ya le gagera, kategha ganyɛa ŋa 'ya, Shala ta ɗa, katetsa ŋa ŋgwəleŋə 'ya, gha nya kaShala kaganda ta Israyɛl.

²³Katetsahe ŋa 'ya, kategha ŋa cimə zlama mɛa ɗa, kwa nza ŋkɛ nahe na kembeɗeke ɗa mpia ɗa.

²⁴Keveci keveci tegeze nza tiɗiɗia ŋa 'ya, kwa nza ŋkɛ, hawe ba'a yiɗə nde tenza te mbeli nyi kemawe ɗa ndiremi.