Read kapsiki Cimə 76 Bible Online

Cimə 76 - kapsiki bible

Cimə 76

¹Se va wəndə nya te ghəa cimə. Yitea yɛ ŋgwəleŋə. Ciməa Asaf. Cimə.

²Nahe Shala kencɛte ghəa ŋkɛ mbe Zhəwda, zləvə ya te sləa ŋkɛ mbe Israyɛl.

³Nahe ŋkɛ kemɓete cɛ lekwesa ta ŋkɛ mbe Zhɛrəzalɛm, nahe ghɛa ŋkɛ kenza mbe Siyon.

⁴Mbagha bezemte wəshi kempa ŋkɛ: yɛ have, yɛ gelə, yɛ megha. Zhɛne mpi.

⁵Zləvə ma te gha ba'a meŋele ma na ke ghweme nyi kaghala ghala.

⁶Nahe mbeli kefəhwe wəshia ka katsala ka sewajɛ, nahe hɛ kedzete hɛ ta mte. Nahe ka katsala ka sewajɛa shɛhɛ kezamte pɛtɛa wəshia nci.

⁷Shala ta Zhakob, ma kwa ntsə nda ghyana na ke hɛ ne, nahe yɛ wəmata kempa ba'a yɛ gədəwəa lɛmə kegheghereŋenji.

⁸Gha nya ghazlənə nya mbeli ve ne, wa nde nza kaghereŋenyɛ kwa kema ta ŋa vəa kwa nya hwepete wənə na wa?

⁹Sawa pelɛ ghweme ne, kameha ghwə na. Va ghazlənə ne, tikə tikə nza hɛɗi lema,

¹⁰vəa ŋkwa nya sate Shala te ŋkwa kezha meha ghwə, kezha mbele pɛtɛa ka dewə ŋeli nyi te hɛɗi lema. Zhɛne mpi.

¹¹Pa le hwepe ta wənəa wəndə ŋelɛ kave zləvə te gha. Ma mbeli nyi kembelenji va hwepe ta wənəa shɛ ne, kahwepe nda wəsə na hwa hwə ke hɛ.

¹²Meɗe nda mə wəshi ke Shala Mahwətə ta ŋayɛ ba'a yipə mə hɛ kadzawa. Fə nda mə wəshi kase ke Shala nya dzawea shɛ, gheyɛ pɛtɛa mbeli nyi kedzaslete ŋkɛ.

¹³Kwa nza ŋkɛ ne, kasla heli ŋkɛ hwa mbeli nyi te ghə, kave nda ghazlənə ŋkɛ ke ka meghea kɛfi nyi te hɛɗi lema.