Read kapsiki Cimə 80 Bible Online

Cimə 80 - kapsiki bible

Cimə 80

¹Se va wəndə nya te ghəa cimə. Yitea yɛ ŋgwəleŋə. Negha fete ta Asaf. Cimə.

²Nde ya ka Israyɛl yawe, fate. Gha nya kencɛ nda hweŋkwa ke Zhozɛf kala wəshi keseɗa, gha nya mentishɛ kənəa ka shɛrəbɛŋe ne, ncɛte ghəa ŋa.

³Te kema ta Ɛfrayim, Bɛnjamɛn ba'a Manasɛ ne, ncɛte berete ta ŋa ba'a se kambele n'yɛ.

⁴Shala yawe, zhɛneyi n'yɛ te ŋkwa n'yɛ. Ɓelaghe kema ta ŋa kənəa ghen'yɛ yitea nza n'yɛ kembele mbele.

⁵Shala Mahwətə nde berete, pa te nyama və tenza na le wənə tehwepe va səkwə ta mbelia ŋa wa?

⁶Ɗafa nya takɛ mbeli le nehwene yazeme nda na ke mbelia ŋa, nehwene nya dazlave yasa nda na ke hɛ.

⁷Nahe na kezhɛrete n'yɛ kaghəpə nya kwelɛ ka ghedəkwəa n'yɛ, kala nya ɗe hɛ ŋ'wəshi n'yɛ ka jaga ta n'yɛ.

⁸Shala nde berete, zhɛneyi n'yɛ te ŋkwa n'yɛ. Ɓelaghe kema ta ŋa kənəa ghen'yɛ yitea nza n'yɛ kembele mbele.

⁹Nahe na kenteɗeke rɛzɛŋe shave mbe Ɛzhipte, nahe na keŋkamte hwelefefi kezha zhɛne kamɓe ŋkɛ.

¹⁰Nahe na kehite ŋkwa megela dzeyi yite. Tagha gɛ, pa nde hehate yɛ slərə ba'a hərəkəhwe ŋkwa nya te hɛɗi.

¹¹Bətə bətə yɛ ghweme mbe shenaŋkwe ta ŋkɛ, bebiya ma yɛ dzeve ta ŋkɛ ke lekeleke nyi jama jama.

¹²Pa mɛa ndərəa Mɛditɛranɛ haghe zega ŋkɛ, pa mɛa hələa Efrate haghe dzeve ŋkɛ.

¹³Wa raberə ŋate ŋkwa na te zlia ŋkɛ kezha dzeme ka kedzeghwa te kanda ya ta ŋkɛ wa?

¹⁴Kabeze ŋkɛ gərədə gamba, kaɓatse ŋkɛ wəshi keseɗa nyi hwa gamba.

¹⁵Shala nde berete, zhɛneke geva. Newe ŋkwa sawa pelɛ ghweme ba'a mareve. Sate te ŋkwa kezha rɛzɛŋea shɛ.

¹⁶Ya rɛzɛŋe nya mɓete na le ghəa ŋa, magwɛaɓa ta rɛzɛŋe nya ndeke nda berete na.

¹⁷Nahe ka jaga ta n'yɛ keteremte ŋkɛ ba'a ketsaslemte ŋkɛ, zanji sebe te hɛ va ntsə nya neheke nda na ke hɛ.

¹⁸Veyi dzeve ta ŋa kənəa meghe nya te kwa zeme ta ŋa, kənəa wəndə nya ndeke nda berete nya na.

¹⁹Tagha gɛ, kateslə ghen'yɛ yitea gha we, katezhɛne na kave n'yɛ mpi ba'a katesəkwə ŋa ghen'yɛ.

²⁰Shala Mahwətə nde berete, zhɛneyi n'yɛ te ŋkwa n'yɛ, ɓelaghe kema ta ŋa kənəa ghen'yɛ yitea nza n'yɛ kembele mbele.