Read kapsiki Cimə 84 Bible Online

Cimə 84 - kapsiki bible

Cimə 84

¹Se va wəndə nya te ghəa cimə. Yitea getsepele ta ka Gat. Ciməa ŋwalea Korɛ.

²Mahwətə nde berete, kwele kwele ɗehwe ghɛa ŋa 'ya.

³Kedera 'ya kadzete ŋwela nya yitea ghɛa Mahwətə, pɛtɛa nza ta ɗa katsa nda gaghwe ke Shala teghweme.

⁴Kaŋ'we nda ghɛ zaghwala ke ghəa ŋkɛ ba'a ghɛ keya ŋwalea ŋkɛ ndɛhwepɛ terasle yitea yɛ reghwetɛa ŋa Mahwətə nde berete, meghea ɗa ba'a Shala ta ɗa.

⁵Zlama ya va mbeli nyi mbe ghɛa ŋa, katetsahe ŋa hɛ kevə kevə. Zhɛne mpi.

⁶Zlama ya va mbeli nyi kekemave berete mbe gha, katelə hɛ sha gha le wənə ganyɛ.

⁷Ma te və nya jive hɛ te zlərə nya keghwele ghwele ne, kazhɛre zlərəa shɛ Shala kaɗasle, kave nda wəpi va nyi keghate.

⁸Ma kadzeghwa hɛ ne, kanza hɛ berete ma, kantsehe hɛ kwa kema ta Shala nya pelɛ Siyon.

⁹Shala Mahwətə nde berete, fa səkwə ta ɗa, ghwenemte sleme Shala ta Zhakob. Zhɛne mpi.

¹⁰Shala yawe, newema wəndə nya kageləa n'yɛ, kemaneve wəndə nya ntave na.

¹¹Megela ma hɛ kwetɛŋe te ŋwela ta ghɛa ŋa ke hɛ slibə nyi menete wəndə te kwete ŋkwa. Shala ta ɗa, ɗehwe ma nza mɛa ŋkwa kedzembe ghɛa ŋa 'ya ke nza ki ghɛa ka 'yaghwa mehele.

¹²Kwa nza ŋkɛ veci ba'a gelə Shala Mahwətə. Kave nda zlaɓa ba'a zləvə Mahwətə ke mbeli. Kaŋka nda zeɗe nza ŋkɛ ke mbeli nyi ɗema ŋele te hɛ we.

¹³Mahwətə nde berete, zlama ya va wəndə nya keve ghə te gha!