Read kapsiki Cimə 9 Bible Online

Cimə 9 - kapsiki bible

Cimə 9

¹Se va wəndə nya te ghəa cimə. Yitea wəshi ketsa. Ciməa David.

²Mahwətə, katetsahe ŋa 'ya le wənəa ɗa pɛtɛ, kategeze wəshi meŋele nyi menete na 'ya.

³Katezlama 'ya ba'a katenza 'ya fare fare te gha, katetsahe sləa ŋa 'ya, Shala nya pelɛ ghweme.

⁴Kazhɛre geva ka jaga ta ɗa dzeyi te sebe, katsa hɛ tehene ba'a kampə hɛ mbe kema ta ŋa.

⁵Nahe na kemenete ɗa wəsə nya tiɗiɗi ba'a nahe na kendeke ɗa nza tiɗiɗi. Mentishɛ na pelɛ pasla ta ŋa kande meha ghwə nya tiɗiɗi.

⁶Nahe na kevate ɗa te hwelefefi ba'a kezamte sebe te ka 'yaghwa mehele. Nahe na kesehwemte sləa nci kaghala ghala.

⁷Mba ka jaga shɛ we, mɛke sebe te hɛ kaghala ghala. Nahe na keŋzlamte yɛ meleme ta nci, rayɛ sləa nci kezanji yitea ghə va mbeli.

⁸Ama pelɛ pasla nza Mahwətə kaghala ghala, nahe ŋkɛ keveyi pasla ta ŋkɛ kezha meha ghwə.

⁹Gheŋkɛ nde sleke hɛɗi lema le kaganda, kameha ghwə nya tiɗiɗi ŋkɛ te mbeli.

¹⁰Mahwətə ya kaŋkwa kewəfərə ta wəndə nya kesa yaka, kaŋkwa kewəfərə mbe vəa ndiremi.

¹¹Ve ghə mbeli nyi keɗepe ŋa te gha, kwa nza ŋkɛ kawəfə mbeli nyi kezele ŋa na we Mahwətə we.

¹²Tsahe mə Mahwətə nya nza pasla ta ŋkɛ mbe Siyon, Ɓela mə wəshi ganji nyi menete ŋkɛ hwa hwelefefi.

¹³Kasepa ka mpə ŋkwa ŋkɛ, mba mbeli nyi mpəmte hɛ yitea ghəa ŋkɛ, kazaghə lewela ta ka dewə ŋeli ŋkɛ we.

¹⁴Zhɛ heli yitea 'ya Mahwətə. Newema tsema tsema sa yaka 'ya va fete ta mbeli nyi keɗema ntsə ta ɗa, gha nya ketewaɗe ɗa shave mbe pela ta mte.

¹⁵Kategeze 'ya yitea wa yitea wa tsahe ŋa 'ya. Kwa kema ta mbeli nyi mbe Siyon ne, katetsa gaghwe 'ya va nya mbelete ɗa na.

¹⁶Nahe hwelefefi kebeteyi geva kwa ki nya late hɛ. Nahe keleŋa nyi ŋate hɛ tewəfərə kekesehwe seɗa ta nci.

¹⁷Nahe Mahwətə kencɛte ghəa ŋkɛ, nahe ŋkɛ kemehate ghwə nya tiɗiɗi. Nahe ŋkɛ kekekesehwe ka 'yaghwa mehele le keleŋa nyi ŋate hɛ. Gweɗakwe ta wəshi ketsa. Zhɛne mpi

¹⁸Zhɛneghe geva ka 'yaghwa mehele kadzawa ghɛa mbelia kwahɛɗi, pɛtɛa hwelefefi nyi kezaghəyite Shala!

¹⁹Ama kazaghə nde titikwə Shala tɛape we. Kaza wəsə nya vate ghə nde dewə ŋeli te tɛape we.

²⁰Mahwətə, sate te ŋkwa, yagha wəndə ŋelɛ kahərəte ŋkwa! Mehate geva ghwə te hwelefefi kwa kema ta ŋa!

²¹Mahwətə, ndeke nda ghazlənə ke hɛ. Ɗepete hwelefefi kambeli nyi kempə hɛ.