Read kapsiki Yɛ Ghena Ŋela 1 Bible Online

Yɛ Ghena Ŋela 1 - kapsiki bible

Yɛ Ghena Ŋela 1

¹Yɛ ghena ŋela ta Salomon, wəzege ta David, meghea ka Israyɛl.

²Ma ghena ŋela nyi ne, ntsehwele ba'a yɛ ɓene yateke nda hɛ ke wəndə. Kave nda ve sleme yitea ghena ganji hɛ ke wəndə.

³Kateke nda nza le ntsehwele, nza tiɗiɗi, nza le hweŋkwa ta ŋkɛ ba'a nza le kaganda hɛ ke wəndə.

⁴Kancɛ nda ntsehwele hɛ ke ka dewə mehele, kave nda ɗepe wəshi ba'a zəzə ghena hɛ ke ka mempɛhwetɛti.

⁵Ya ka ntsehwele ntsehwele ne, wərə hɛ kakemave zhɛme mbe, ya ka ɗepe wəshi ne, wərə hɛ kasləyi ghena ganji mbe.

⁶Katefave ghena nya tewəfərə mbe kweci ghena ŋela ba'a ghena nya dzawe mbe ghena nyi geze ka ntsehwele ntsehwele hɛ.

⁷Hawe va Mahwətə ya kagha ta ntsehwele. Deke ka gezhia kɛfi ka ɓelama ntsehwele ba'a yɛ ɓene.

⁸Wəzege ta ɗa, fa ghena nyi geze ŋa yiteyɛ ŋa, betakɛma ghena nyi geze meyɛ ŋa na ma.

⁹Katenza hɛ mbe ghəa ŋa kala derə meghe nya ndeɗe ba'a kala zhɛɗa kwa welɛa ŋa.

¹⁰Wəzege ta ɗa, ma keɗe ŋwale tezhili nyi ndiremi ndiremia mehele kaghwete ŋa ne, yɛma na ma.

¹¹Ma ke hɛ sha tegeze ŋa: «Mbi ɓəmə! Ŋsleyi ɓəmə ghweɓe kezha mpə ŋkwa. Kala raberə ne, have nda ɓəmə mpa vəkə ke mbeli nyi ɗema fete va hɛ.

¹²Kekeseve ɓəmə hɛ teghweme kezha mpə hɛ ba'a kezha bete hɛ kata kata kadzawa kwele kala wəsə nya nza gheɓəmə le ghəa ɓəmə kamte.

¹³Katesləyi mama ta wəshi nyi nza zləvə te gheɓəmə, kateviɗi ghɛa ɓəmə gheɓəmə le wəshia shɛhɛ.

¹⁴Nde, katekemave ŋa ŋa na bela, kwetɛŋe tenza slibəa ɓəmə!»

¹⁵Wəzege ta ɗa, ləma na le hɛ ma. Hendemte geva cakeɗake vare hweŋkwa ta nci.

¹⁶Kwa nza ŋkɛ ne, yitea wəsə kwa ndiremi hwɛ hɛ, kezha mpə ŋkwa wədə geva hɛ.

¹⁷Ma kanewe newe nde ŋa dagalawe 'yɛ ne, gəmə ŋa dagalawe wəndəa shɛ kezha kese ŋkɛ.

¹⁸Ama ghenci ne, ke ghəa nci ŋa nda dagalawe hɛ, kezha mpə ghəa nci ŋsle ghweɓe hɛ.

¹⁹Tsetse mene nda geva ŋkɛ ke mbeli nyi keghərə wəshia mbeli, kateghərəhwe geva mpia nci.

²⁰Lewela yatsa ntsehwele dzeyi kwa hweŋkwa, ghena yazlape ŋkɛ dzeyi te ŋkwa kebeke.

²¹Ŋkwa yaheka ŋkɛ dzeyi te ŋkwa nyi nza mbeli kwele kwele. Ma ke sha zlape ghena dzeyi mɛa mɛ degha nyi te meleme:

²²«Gheyɛ ka dewə ntsehwele, pa te nyama və teɗe dewə ntsehwele yɛ wa? Gheyɛ ka ŋ'wəshi ŋkwa, pa te nyama və tezlama yɛ yitea ŋ'wəshi ŋkwa wa? Gheyɛ ka dewə mehele, pa te nyama və teɗema dewə mehele yɛ wa?

²³Fa mə ghena ta ɗa. Ma tsagha, kateve ŋayɛ mehele 'ya ba'a katepele mehele ta ŋayɛ ghena ta ɗa.

²⁴Ama kaheka ŋayɛ 'ya ne, hɛreɗɛ yɛ ɗema fa heka ta ɗa. Kaha ŋayɛ dzeve 'ya ne, wəndə shɛ kave mehele te we.

²⁵Pɛtɛa ŋayɛ keɗema yɛ ghena ta ɗa ba'a kese yɛ kayɛ yɛ ŋele ta ɗa we.

²⁶Ma 'ya le ŋa ɗa gɛ ne, kateŋ'wəshi ŋayɛ 'ya vəa ŋkwa nya nza yɛ mbe ndiremi. Kateyiɗə ŋayɛ 'ya vəa ŋkwa nya keseve ŋayɛ ghazlənə.

²⁷Kwa nza ŋkɛ ma te kwete hɛ ne, kateme ghazlənə kənəa gheyɛ kala sefə nya wəba, katefə ŋayɛ ndiremi kala sefəa va nya wəba. Kateseke ŋayɛ se taze ta mehele ba'a yaka.

²⁸Tagha gɛ, kateheka ɗa yɛ, ama katezhɛne 'ya we, katezele ɗa yɛ, ama katesləyi ɗa yɛ we.

²⁹Tsetse temene geva ŋkɛ va nya ɗema ɗepe wəshi yɛ ba'a va nya ɗema yɛ kentave hawe va Mahwətə,

³⁰va nya ɗema yɛ kese kayɛ ghena ta ɗa ba'a va nya ɗema yɛ kese kaɓela yɛ ŋele ta ɗa.

³¹Vatse gɛ ne, kateŋ'we fəli nya mbe dzeghwa ta ŋayɛ yɛ ba'a katezhɛ ŋayɛ wənəa ŋayɛ va wəshi nyi zəzəte yɛ.

³²Kwa nza ŋkɛ ne, ntɛaŋentɛa ghəa nci nde mpə ka dewə ntsehwele ba'a dewə zəzə ta nci nde za ka dewə mehele.

³³Ama wəndə nya kefa ɗa ghena ne, gwezlayɛ tenza ŋkɛ, gweɗakwe tenza ŋkɛ, kaɗema kaghazlənə va ndiremi.»