Read kapsiki Yɛ Ghena Ŋela 10 Bible Online

Yɛ Ghena Ŋela 10 - kapsiki bible

Yɛ Ghena Ŋela 10

¹Wa nyi ghena ŋela ta Salomon nyi: Ma wəzege nya kentsehwele ntsehwele ne, zlama yave nda ŋkɛ ke yitenyɛ, ma wəzege nya kadewə ntsehwele ne, wənəa nta yabeze nda ŋkɛ ke meghekɛ.

²Ma wəshi nyi kemave wəndə le mbəɗəkwə ne, kafa deme wəndə te hɛ we. Ama nza tiɗiɗi ne, kambele ŋkwa nde va mte.

³Kasərə wəndə nya tiɗiɗi Mahwətə le ma we, ama kandaŋe nda wəsə nya mawe ka 'yaghwa mehele ŋkɛ ke hɛ.

⁴Ma dzeve nyi kemeɗə ne, titikwə yaheka hɛ kase, ama nyi kemene slene ne, mcɛlə yakele ŋkɛ kase.

⁵Ma wəndə nya ketsene wəshi hefeghwe ne, wəndə nya kentsehwele ntsehwele ŋkɛ. Ama wəndə nya kehɛ vəa ŋkwa mene wəshi te wəve ne, wəndə nya kepəli nda hawe ke mbeli ŋkɛ.

⁶Ma mbeli nyi tiɗiɗi ne, wəpi yaŋ'we hɛ. Ama ka 'yaghwa mehele ne, mene berete ya mbe ghena ta nci.

⁷Ma wəndə nya tiɗiɗi ne, katezəzə ŋkɛ mbeli. Ama ka 'yaghwa mehele ne, katezaghə sləa nci mbeli.

⁸Ma wəndə nya nza mehele ve ne, kayɛ wəshi nyi geze nda mbeli ŋkɛ. Ama wəndə nya kegeze ghena gezhi ne, ghəa ŋkɛ yaza ŋkɛ.

⁹Ma wəndə nya kedzeghwa tiɗiɗi ne, kwelɛŋe nza ŋkɛ. Ama wəndə nya kedzeghwa mendale mendale ne, kateme ɗa te.

¹⁰Ma wəndə nya kewəfərə kaganda va mbeli ne, yaka yasa nda ŋkɛ ke hɛ. Ama wəndə nya kegeze nda kaganda ke hɛ ne, kwelɛŋe yave nda ŋkɛ ke hɛ.

¹¹Ma mɛa wəndə nya tiɗiɗi ne, ntsə ta yɛməa mpi ŋkɛ. Ama ŋa ka 'yaghwa mehele ne, mene berete yawəfərə hɛ.

¹²Ma zlɛ ne, tseha mɛ yakele ŋkɛ kase. Ama ɗe ne, kakele pɛtɛa fete ŋkɛ te wənə.

¹³Kasləyi ntsehwele mbeli mbe ghena ta nde ɗepe wəshi. Ama geta nde me te wəmbə va nde dewə ntsehwele.

¹⁴Ɗepe wəshi yatsene ka ntsehwele ntsehwele. Ama ghena ta ka dewə mehele ne, ndiremi nya ketese ŋkɛ.

¹⁵Zli nya berete mcɛləa ŋkɛ yitea nde mcɛlə. Ama yaka nya te nde titikwə ne, za ta ŋkɛ ŋkɛ.

¹⁶Ma zhɛme ta wəndə nya tiɗiɗi ne, kave nda mpi ŋkɛ. Ama wəsə nya ŋ'we nde mbəɗəkwə ne, kateve ŋkɛ mbe jaɗafa.

¹⁷Ma wəndə nya kefa ghena nyi geze nda mbeli ne, dzeghwa yadzeghwa ŋkɛ kwa hweŋkwa ta mpi. Ama wəndə nya keɓelama ghena nyi geze nda mbeli ne, kateza ŋkɛ.

¹⁸Ma wəndə nya kewəfərə zlɛa ŋkɛ ne, nde tseŋwə ŋkɛ. Ma wəndə nya keŋwashɛ ŋwashɛ ne, nde dewə mehele ŋkɛ.

¹⁹Ma wəndə nya kegeze ghena kwele kwele ne, kaɗema ŋkɛ kamenete fete we. Ama wəndə nya kedzakwe mɛa ŋkɛ, wəndə nya kentsehwele ntsehwele ŋkɛ.

²⁰Ma ghena ta wəndə nya tiɗiɗi ne, kala mze kwa tɛawetɛa nya ganyɛ ŋkɛ. Ama zəzə ta nde 'yaghwa mehele ne, zləvə te we.

²¹Ma ghena ta wəndə nya tiɗiɗi ne, kakemane mbeli kwele kwele ŋkɛ. Ama ka dewə mehele ne, katempə hɛ va dewə ntsehwele.

²²Wəpi ta Mahwətə nde ve ŋkwa kamcɛlə, wəsə shɛ kanza heha ta wəndə ŋelɛ kamtseheyite yite we.

²³Ma mene wəsə kwa ndiremi ne, raberə ŋkɛ sha nde dewə mehele, tsagha ntsehwele sha nde ɗepe wəshi.

²⁴Ma wəsə nya ghazlənə nde 'yaghwa mehele ve ne, gheŋkɛ nde mene nda geva. Ma wəshi nyi mawe mbeli nyi tiɗiɗi ne, katekemave hɛ hɛ.

²⁵Ma vəa ŋkwa nya kiɗi sefə nya wəba ne, kateza nde 'yaghwa mehele. Ama wəndə nya tiɗiɗi ne, yitea ghweme tenza ŋkɛ kaghala ghala.

²⁶Kala wəmbela sha slene ba'a kala n'yia ghwə sha ntsə ne tsagha nde meɗə sha mbeli nyi keghwene ŋkɛ.

²⁷Ma hawe va Mahwətə ne, kamtsehe biya ta hɛ ŋkɛ. Ama yɛ va ta ka 'yaghwa mehele ne, kahe kahe kiɗi hɛ.

²⁸Ma wəsə nya neghe mbeli nyi tiɗiɗi ne, zlama. Ama mbele nya neghe ka 'yaghwa mehele ne, kateŋ'we hɛ we.

²⁹Ŋkwa kewəfərə hweŋkwa ta Mahwətə kaŋa mbeli nyi tiɗiɗi. Ama kaŋa ka ndiremia mehele ne, za ŋkɛ.

³⁰Ma wəndə nya tiɗiɗi ne, kateteɗe ŋkɛ tɛape we. Ama ka 'yaghwa mehele ne, katenza hɛ te hɛɗi we.

³¹Ghena ntsehwele yageze wəndə nya tiɗiɗi, Ama kateslamte geva ghɛnia ka sla tseŋwə.

³²Ma ghena nyi geze wəndə nya tiɗiɗi ne, kezeɗe zeɗenji tenza hɛ. Ama ghena nyi geze ka 'yaghwa mehele ne, deke tseŋwə hɛ.