Read kapsiki Yɛ Ghena Ŋela 11 Bible Online

Yɛ Ghena Ŋela 11 - kapsiki bible

Yɛ Ghena Ŋela 11

¹Kaɗe ghena ta yɛ kiləwə tseŋwə Mahwətə we, ama wəshi kedzeghe ɗaŋeɗa ta wəshi nyi tiɗiɗi yaɗe ŋkɛ.

²Ma kele ghə ne, ɓelama ŋkwa yakele ŋkɛ kase. Ama ntsehwele ne, shifə ghə yave nda ŋkɛ ke wəndə.

³Kaganda nde tencɛ nda hweŋkwa ke mbeli nyi tiɗiɗi. Ama mbəɗəkwəa nci nde teza ka mbəɗəkwəa kɛfi.

⁴Ma te vecia meha ghwə ta Shala ne, wəsə shɛ kaketekɛ mcɛlə we. Ama nza tiɗiɗi ne, katembele ŋkwa ŋkɛ va mte.

⁵Ma kaganda ta wəndə nya tiɗiɗi ne, kateve ŋkɛ kwa hweŋkwa nya tiɗiɗi. Ama nde 'yaghwa mehele ne, kateza ŋkɛ va 'yaghwa mehele ta ŋkɛ.

⁶Ma kaganda ta mbeli nyi tiɗiɗi ne katembele hɛ ŋkɛ. Ama ka mbəɗəkwəa kɛfi ne, katekese hɛ keleŋa ta sla ntsə ta nci.

⁷Ma kamte nde 'yaghwa mehele ne, kaza zəzə ta ŋkɛ, tsagha zəzə nya veyi ŋkɛ te mcɛləa ŋkɛ.

⁸Kambele wəndə nya tiɗiɗi va nza keyirə yirə. Nde 'yaghwa mehele nde teɗe mbe te ŋkwa ŋkɛ.

⁹Ma wəndə nya kemene wəsə kwa ndiremi ne, nde ghedəkwəa ŋkɛ yaza ŋkɛ le ghena nyi geze ŋkɛ. Ama mbeli nyi tiɗiɗi ne, katembele hɛ va ɗepe wəsə ta nci.

¹⁰Ma vəa ŋkwa nya nza mbeli nyi tiɗiɗi mbe zeɗe nza ne, zlama ya va mbeli nyi mbe meleme. Ama vəa ŋkwa nya mpə ka 'yaghwa mehele ne, gaghwe yatsa mbeli nyi mbe meleme.

¹¹Ma laka wəpi mbeli nyi tiɗiɗi ne, kajive meleme ta nci te kema. Ama laka ghena nyi geze ka 'yaghwa mehele ne, kaŋzla geva nde.

¹²Ma wəndə nya keɓelama nde ghedəkwəa ŋkɛ ne, nde dewə mehele ŋkɛ. Ma wəndə nya nza mehele ve ne, divə nza ŋkɛ.

¹³Ma wəndə nya keŋwashɛ ŋwashɛ ne, ghena nyi tewəfərə yancɛ ŋkɛ. Ama wəndə nya nza mehele ve ne, kawəfərə hɛ ŋkɛ.

¹⁴Ma keɗema wəndə ganyɛ te ghəa hwelefe ne, kateza ŋkɛ. Ma mbele ne, se mbe kwele kwele ta ka ncɛ ntsehwele ŋkɛ.

¹⁵Ma wəndə nya keyɛte kaŋki dewa ta kwete wəndə ne, katenda ghena ŋkɛ. Ma wəndə nya keɗema ŋki ne, gwezlayɛ tenza ŋkɛ.

¹⁶Ma male nya ganyɛ ne, kakema zləvə nde, ma za nya berete ne, kakema mcɛlə ŋkɛ.

¹⁷Ma wəndə nya ganyɛa mehele ne, ke ghəa ŋkɛ mene nda ganyɛ ŋkɛ. Ama wəndə nya 'yaghwa mehele ne, ndiremi yave ŋkɛ te ghəa ŋkɛ.

¹⁸Ma wəndə nya 'yaghwa mehele ne, kakema wəshi ganji ŋkɛ we. Ama wəndə nya kemene ganyɛ ne, katekemave zhɛme ŋkɛ.

¹⁹Ma wəndə nya kezəzə kamene wəsə nya tiɗiɗi ne, katenza ŋkɛ teghweme. Ama wəndə nya kentsə geva yitea wəsə kwa ndiremi ne, katemte ŋkɛ.

²⁰Kaɗe ntsə ta mbeli nyi ndiremi ndiremia wənə Mahwətə we, ama mbeli nyi nza kaganda va hɛ yaɗe ŋkɛ.

²¹Kaganda teme ɗa te wəndə nya ndiremia mehele, ama mbeli nyi tiɗiɗi ne, pələsə tenza hɛ ve.

²²Kala ŋgwedɛba mze kwa tere tere nya mbe ŋshi va gərədə ne, tsagha male nya ndeɗe nya kagezhi.

²³Ma wəsə nya zəzə mbeli nyi tiɗiɗi ne, deke mene ganyɛ. Ama wəsə nya mawe ka 'yaghwa mehele ne, hwepe wənə yave ŋkɛ kənəa hɛ.

²⁴Ma wəndə nya kevele ne, wəshia ŋkɛ yamtsehe ŋkɛ. Ama wəndə nya keɗema kasawa te wəsə ne, titikwə yave nda ŋkɛ ke ghəa ŋkɛ.

²⁵Ma wəndə nya keɗa nda wəshi ke mbeli ne, katekemave wəshi ŋkɛ kwele kwele. Ma wəndə nya kesa nda wəshi ke mbeli ne, katesa nda wəshi mbeli perə.

²⁶Ma wəndə nya kewəmbə ha ta ŋkɛ ne, katebezla ŋkɛ mbeli. Ama wəndə nya kepa nda ŋa ŋkɛ ke mbeli ne, katewəpi ŋkɛ mbeli.

²⁷Kazlama mbeli te wəndə nya kemene wəsə ganyɛ, ama ndiremi nde dzeghəa wəndə nya kezəzə mene wəsə kwa ndiremi.

²⁸Ma wəndə nya kevate ghə te mcɛləa ŋkɛ ne, kateteɗe ŋkɛ. Ama mbeli nyi tiɗiɗi ne, kala nya ɗa yɛ wəfe teɗa hɛ.

²⁹Ma wəndə nya ketaze ghɛa ŋkɛ ne, sefə yatekese ŋkɛ. Ma wəndə nya kadewə mehele ne, katenza ŋkɛ kamava ta nde ntsehwele ntsehwele.

³⁰Ma slene ta mbeli nyi tiɗiɗi ne, kala wəfe ta mpi hɛ. Ma wəndə nya kentsehwele ntsehwele ne, kakese mehele ta mbeli ŋkɛ.

³¹Ma mbeli nyi tiɗiɗi ne, kakema zhɛme hɛ kwake te hɛɗi. Katekemave ŋa nci ka 'yaghwa mehele ba'a ka jaɗafa perə!