Read kapsiki Yɛ Ghena Ŋela 13 Bible Online

Yɛ Ghena Ŋela 13 - kapsiki bible

Yɛ Ghena Ŋela 13

¹Ma wəzege nya kentsehwele ntsehwele ne, kave ghena ta yitenyɛ ŋkɛ yitea ghə. Ama wəzege nya kezlere zlere ne, kayɛ ŋele ŋkɛ we.

²Ma wəndə ganyɛ ne, kakema zhɛme ŋkɛ mbe ghena nyi geze ŋkɛ. Ama mbeli nyi kemene mbəɗəkwə ne, mene berete ya kawəsə kezeme ta nci.

³Ma wəndə nya keya mɛa ŋkɛ ne, mpia ŋkɛ yaya ŋkɛ. Ama wəndə nya kegeze yayata ghena ne, ghəa ŋkɛ yaza ŋkɛ.

⁴Kamawe wəshi nde meɗə, ama wəsə shɛ kakemave ŋkɛ we. Ama wəndə nya kemene slene le ŋa ŋkɛ ne, wəshi nyi mawe ŋkɛ yakema ŋkɛ.

⁵Ma wəndə nya tiɗiɗi ne, kaɗe tseŋwə ŋkɛ we. Ama nde 'yaghwa mehele ne, hawe ba'a ŋele yave ŋkɛ te mbeli.

⁶Nza tiɗiɗi nde ya wəndə nya nza kaganda ve. Ama wəsə kwa ndiremi nde za ka 'yaghwa mehele.

⁷Kaka mcɛlə ve ghəa nci kweci mbeli kaɗema wəshi va hɛ. Kaka titikwə ve ghəa nci kweci, ama wəshi ya va hɛ kwele kwele.

⁸Kambele mpia nde mcɛlə mcɛləa ŋkɛ. Ama wəndə shɛ kaghakɛ nde titikwə we.

⁹Ma wəndə nya tiɗiɗi ne, kaɓele ŋkɛ kala waŋe va zlama. Ama ka 'yaghwa mehele ne, kala paterela nyi ɗema ghwə kwa hɛ hɛ.

¹⁰Ma kele ghə ne, ghəpə yakele ŋkɛ kase. Ama ntsehwele ne, le mbeli nyi keyɛ ghena ŋkɛ.

¹¹Ma mcɛlə nya kemave wəndə kahe kahe ne, taghanyɛ kiɗi ŋkɛ. Ama nya tsene wəndə ɓɛhwɛ ɓɛhwɛ ne, kafɛa nde kemtsehe we.

¹²Ma wəndə nya ketemə kwele kwele kaneghe wəsə ne, katetaze mehele ta ŋkɛ. Ama zəzə nya keyipəyi geva kwa ne, kala wəfe ta mpi ŋkɛ.

¹³Ma wəndə nya keɓelama ghena ne, dzawe teŋki ŋkɛ. Ama wəndə nya keyɛ ghena ne, katekemave zhɛme ŋkɛ.

¹⁴Ma wəsə nya teke nda nde ntsehwele ntsehwele ke wəndə ne, ghwa ta mpi ŋkɛ. Kaya ŋkwa ŋkɛ va fete nyi kekele ŋkwa kalə sha mte.

¹⁵Ma zəzə ganyɛ ne, wəsə nya mawe mbeli ŋkɛ. Ama ka mbəɗəkwə ne, kwa hweŋkwa ta za hɛ.

¹⁶Ma wəndə nya nza mehele ve ne, kazəzə ŋkɛ nda temene wəsə ŋkɛ. Ama nde dewə mehele ne, slene gezhia ŋkɛ yancɛ ŋkɛ.

¹⁷Ma nde ghwene nya ndiremia mehele ne, ndiremi yakele ŋkɛ kase. Ama nde ghwene nya tiɗiɗi ne, ŋkwa ya mbe ŋkɛ.

¹⁸Ma wəndə nya keɗema kayɛ ɓene ne, kande titikwə ba'a kawəndə nya ɗema zləvə te tenza ŋkɛ. Ama wəndə nya keyɛ ŋele ne, zləvə nde tenza te.

¹⁹Yayata wəndə kaɗe kamene wəsə nya ɗe ghəa ŋkɛ. Vatse ɗema ka dewə mehele kasərə mene wəsə kwa ndiremi.

²⁰Ma kenza wəndə kadzeghwa le ka ntsehwele ntsehwele ne, katekemave ntsehwele ŋkɛ. Ama kenza wəndə kadzeghwa le ka dewə mehele ne, katesləyi ndiremi ŋkɛ.

²¹Ndiremi nde zele ka jaɗafa. Ama zeɗe nza ya kazhɛme ta mbeli nyi tiɗiɗi.

²²Ma wəndə ganyɛ ne, kasərə nda wəshi kezeme ghɛ ŋkɛ ke ŋwalea ŋkɛ. Ama wəshia nde jaɗafa ne, kaŋa wəndə nya tiɗiɗi tenza hɛ.

²³Ma wəve nya wəzakɛ nde titikwə ne, kwele kwele ŋ'we geva wəshi kezeme te. Ama mbeli nyi ndiremia mehele ne, kahe kahe tekiɗi berete ta nci.

²⁴Ma wəndə nya keɗema kaɗa wəzege ta ŋkɛ ne, kaɗe ŋkɛ we. Ama wəndə nya ke'yɛ wəzege ta ŋkɛ ne, ɗe yaɗe ŋkɛ.

²⁵Ma wəndə nya tiɗiɗi ne, behe tezeme wəsə kezeme ŋkɛ. Ama ka 'yaghwa mehele ne, katenehwene hwəa nci va ma.