Read kapsiki Yɛ Ghena Ŋela 14 Bible Online

Yɛ Ghena Ŋela 14 - kapsiki bible

Yɛ Ghena Ŋela 14

¹Ma male nya kentsehwele ntsehwele ne, ghɛa nta yaŋa nde. Ama male nya kadewə mehele ne, ŋzla yaŋzla nde le dzeve ta nta.

²Ma wəndə nya kedzeghwa tiɗiɗi ne, hawe yahawe ŋkɛ va Mahwətə. Ama wəndə nya kedzeghwa mendale mendale ne, zləvə yakele ŋkɛ seyi te.

³Kele ghə nde ɗa same kwa mɛa ka dewə mehele. Ama kaya ka ntsehwele ntsehwele ghena ta nci.

⁴Ma wəndə nya ɗema sla kewəza ve ne ghwalɛalɛa nza tame ta ŋkɛ. Ama wəndə nya nza sla kewəza nyi berete berete ve ne, kwele kwele ŋ'we wəshi ŋkɛ se te wəve.

⁵Ma nde negha fete nya kegeze kaganda ne, kasla tseŋwə ŋkɛ we. Ama nde negha fete nya kesla tseŋwə ne, nda tseŋwə nde sawa te mɛa ŋkɛ.

⁶Kazele ntsehwele nde zlere zlere ne, kakemave ŋkɛ we. Ama wəndə nya kezəzə ghena ne, kahe kahe ŋ'we ɗepe wəshi ŋkɛ.

⁷Slə ŋa cakeɗake yitea nde dewə mehele, kwa nza ŋkɛ wəsə shɛ katetekeve na mbe ghena ta ŋkɛ we.

⁸Ma ntsehwelea wəndə nya nza mehele ve ne, gheŋkɛ ya kaya dzeghwa ta ŋkɛ. Ama gezhia ka dewə mehele ne, gheŋkɛ ya kamene mbəɗəkwə.

⁹Ma ka dewə mehele ne, kahi ghena nya kebezenyɛ hɛ we. Ama nde ndeɗea mehele ne, hwa mbeli nyi tiɗiɗi nza ŋkɛ.

¹⁰Deke wəndə nde nza kaɗepete beze ta wənəa ŋkɛ, kwete wəndə shɛ kanza kaɗepete zlama nya kwa we.

¹¹Ma ghɛa ka 'yaghwa mehele ne, kateŋzlamte geva ŋkɛ. Ama ŋa mbeli nyi tiɗiɗi ne, katejive ŋkɛ mbe kema.

¹²Wərə wəndə kanewe dzeghwa ta ŋkɛ tiɗiɗi, ama te kwa keɗaŋe ne, kalə ghɛa mbelia kwahɛɗi tekele ŋkɛ.

¹³Wərə ŋ'wəshi kawəfərəakɛ beze ta wənə ba'a wərə zlama kazhɛre kaheɗe kema.

¹⁴Ma wəndə nya ndiremia mehele ne, katefa ghwene nya mbe wəshi nyi mene ŋkɛ ŋkɛ. Ma wəndə nya ganyɛa mehele ne, katenza ŋkɛ za ma ke gheŋkɛ.

¹⁵Ma wəndə nya dewə ntsehwele ne, pɛtɛ yɛ ghena nyi geze nda mbeli ŋkɛ. Ama wəndə nya nza mehele ve ne, kanewe ŋkwa nya keŋkeɗe seɗa ŋkɛ.

¹⁶Ma wəndə nya kentsehwele ntsehwele ne, kaghazlənə ba'a kahwɛ ŋkɛ va wəsə kwa ndiremi. Ama nde dewə mehele ne, kahe kahe mene wəshi ŋkɛ va nya vate ghə ŋkɛ te ghəa ŋkɛ.

¹⁷Ma wəndə nya kehwepe wənə kahe kahe ne, wəsə kwa ndiremi yamene ŋkɛ. Ma wəndə nya keghwete ŋkwa ne, kaɗe ntsə ta ŋkɛ mbeli we.

¹⁸Ma ka dewə ntsehwele ne, nza kagezhi ya kawəsəa nci. Ama mbeli nyi nza mehele va hɛ ne, nza kaka ɗepe wəshi ya kazləvəa nci.

¹⁹Ma ka ndiremia mehele ne, kategwəɗəŋə hɛ kwa kema ta mbeli ganji. Ma ka 'yaghwa mehele ne, katenza hɛ dzeyi kwa yɛ degha ta mbeli nyi tiɗiɗi.

²⁰Ma nde titikwə ne, pa le ka mcɛhɛnyɛ kaɗema ntsə ta ŋkɛ. Ama nde mcɛlə ne, kwele kwele nza ka mcɛhɛ te.

²¹Ma wəndə nya keɓelama nde ghedəkwəa ŋkɛ ne jaɗafa yamene ŋkɛ. Ama wəndə nya kezhɛ heli yitea ka titikwəa kɛfi ne, zlama ya ve.

²²Ma mbeli nyi kezəzə wəsə kwa ndiremi ne, kateza nda za hweŋkwa ke hɛ. Ama mbeli nyi kezəzə wəsə ganyɛ ne, katekemave ndeɗea mehele ba'a nza tiɗiɗi hɛ.

²³Ma yayata slene ne, zhɛme yakele ŋkɛ kase. Ama tseha mɛ ne, titikwə yakele nde kase.

²⁴Mcɛləa nci ya kazləvə nya te ka ntsehwele ntsehwele. Ma ka dewə mehele ne, te gezhia nci ɗepe hɛ mbeli.

²⁵Ma nde negha fete nya nza kaganda ve ne, kambele ŋkwa ŋkɛ. Ama wəndə nya kesla tseŋwə ne, ŋkwa yaza ŋkɛ.

²⁶Ma mbe hawe va Mahwətə ne, gezleŋema ghə nya berete ya shɛ. Kezha ŋwalea ŋkɛ ne, nahe ŋkɛ kenza kaŋkwa kewəfərə.

²⁷Hawe va Mahwətə ya kaɗaslea mpi. Kakele ŋkwa ŋkɛ same kwa hweŋkwa ta mte.

²⁸Ma kenza mbeli shɛ kwele kwele ne, zləvə ya te meghe. Ama kedewə mbeli te hɛɗi ne, teɗe ya te wəndə nya te ghə.

²⁹Ma wəndə nya kezereghe ghena ne, wəndə nya nza mehele ve ŋkɛ. Ama wəndə nya kehwepe wənə kahe kahe ne, gezhia ŋkɛ yancɛ ŋkɛ.

³⁰Ma gweɗakwe mehele ta wəndə ne, lɛŋe lɛŋe nza geva ta ŋkɛ. Ama zlɛ ne, zhiwəva nya mbe 'yɛ'yɛ ŋkɛ.

³¹Ma wəndə nya kesa nda yaka ke ka titikwəa kɛfi ne, nde pate ŋkɛ yaŋele ŋkɛ. Ama wəndə nya kezhɛ heli yitea ka dewə berete, zləvə yave ŋkɛ te.

³²Wəsə kwa ndiremia ŋkɛ nde teɗe nde 'yaghwa mehele. Ama wəndə nya tiɗiɗi ne, katesləyi ŋkwa kewəfərə ŋkɛ mbe nza tiɗiɗia ŋkɛ.

³³Ma wəndə nya kezəzə ghena ne, wəndə nya kentsehwele ntsehwele ŋkɛ. Ama hwa ka dewə ntsehwele ne, katesləyi ntsehwele mbeli na?

³⁴Mene wəsə nya tiɗiɗi ne, hɛɗi yakele ŋkɛ. Ama mene jaɗafa ne, hawe yapəli nda nde ke mbeli.

³⁵Ma nde mene slene nya nza mehele ve ne, ndeɗehwe nda nza ŋkɛ ke meghe. Ama nde mene slene nya kepəli nda hawe ne, katenza hwepe wənəa ŋkɛ kənə.