Read kapsiki Yɛ Ghena Ŋela 16 Bible Online

Yɛ Ghena Ŋela 16 - kapsiki bible

Yɛ Ghena Ŋela 16

¹Kamene zəzə wəndə ŋelɛ, ama va Mahwətə se zhɛne.

²Ma zəzə wəndə ŋelɛ ne, megela wəshi nyi mene ŋkɛ. Ama Mahwətə nde newe wəshi nyi kwa wənə.

³Dapave nda slene nya mene na ke Mahwətə, ma tsagha ne, kateyipə geva wəshi nyi zəzə na kwa.

⁴Nahe Mahwətə kemenete pɛtɛa wəshi kezha tereke, ya ka 'yaghwa mehele kezha vecia ndiremi.

⁵Kaɗe ntsə ta ka kele ghə Mahwətə we. Kaganda ne, kateme ɗa te hɛ.

⁶Laka ganyɛa mehele ba'a nza tiɗiɗi ne, katekelemte geva fete te wənə. Ma wəndə nya kehawe va Mahwətə ne, kateya ghə ŋkɛ va mene wəsə kwa ndiremi.

⁷Ma kenza dzeghwa ta wəndə zeɗehwe nda ke Mahwətə ne, katseɓa ŋkɛ ŋkɛ ya le ka ghema ta ŋkɛ.

⁸Megela ma kemave zhɛme ɓɛhwɛ le kaganda ke kemave wəshi kwele kwele le mbəɗəkwə.

⁹Kamene zəzə wəndə ŋelɛ, ama Mahwətə nde yipə hɛ kadzawa.

¹⁰Kala nya geze ghena Shala le ghəa ŋkɛ geze ghena meghe. Ma kenza ŋkɛ kameha ghwə ne, kanta ghala ŋkɛ we.

¹¹Kiləwə nyi tiɗiɗi yaɗe Mahwətə. Gheŋkɛ nde menete pɛtɛa wəshi kedzeghe ɗaŋeɗa ta wəshi.

¹²Kaɗe mene wəsə kwa ndiremi ka meghea kɛfi we, kwa nza ŋkɛ mene wəsə nya tiɗiɗi nde ve nda berete ke meghea ŋkɛ.

¹³Zeɗehwe nda wəndə nya kegeze nda kaganda ke meghe. Mbeli nyi kegeze wəsə nya kehi yaɗe ŋkɛ.

¹⁴Wərə meghe nya beze wənəa ŋkɛ kaghwenakɛ ka mpə ŋkwa. Ama wərə nde ntsehwele ntsehwele kagweɗakwete ŋkɛ.

¹⁵Ma kenza ŋ'wəshi te mɛ va meghe ne, mpi ŋkɛ. Kala ləmbəa meŋzleghele ganyɛa mehele ta ŋkɛ.

¹⁶Megela ma kemave ntsehwele ke mze kwa tere tere, kemave ɗepe wəsə ke mze kwa tɛawetɛa.

¹⁷Kazhɛre nda wəmbə mbeli nyi tiɗiɗi ke wəsə kwa ndiremi. Ghəa ŋkɛ yaya wəndə nya keya dzeghwa ta ŋkɛ.

¹⁸Ndiremi yakele kele ghə kase, teɗe ŋa ɓelama ŋkwa.

¹⁹Megela ma shifə ghə hwa ka titikwəa kɛfi ke nehe wəshi nyi fəke mbeli hwa mpa le ka kele ghə.

²⁰Ma wəndə nya nza mehele ve ne, katekemave zeɗe nza ŋkɛ. Ma wəndə nya keve nda ghə ke Mahwətə ne, zlama nde tenza ve.

²¹Ma wəndə nya kentsehwele ntsehwele ne, kateheka ŋkɛ mbeli kande ɗepe wəshi. Kamtsehe ɗepe wəsə ghena ganji.

²²Ma mehele ne, ŋkwa nya se mpi ŋkɛ te kaŋa mbeli nyi nza ŋkɛ va hɛ. Ama ka dewə mehele ne, gezhia nci nde ve ɗa te hɛ.

²³Ma wəndə nya kentsehwele ntsehwele ne, kazəzə ŋkɛ nda tegeze ghena ŋkɛ. Le ghena nyi geze ŋkɛ ne, wərə ŋkɛ kakeseke mehele ta mbeli.

²⁴Ma ghena ganji ne, kala yɛməa mze hɛ. Ghɛnike hɛ kwa mɛ ba'a ghwɛ hɛ kaŋa geva.

²⁵Ma zəzə kwete wəndə ne, kwa hweŋkwa nya tiɗiɗi ŋkɛ. Kakwa keɗaŋe ne, katekele ŋkɛ nde kalə sha mte.

²⁶Ma nde ŋka nde mene slene kezha mene slene, mɛa ŋkɛ nde tsəkwə ŋkɛ yite.

²⁷Wəsə kwa ndiremi yazəzə wəsəa kwadanyɛa wəndə, kala ghwə nya ketse ghena nyi geze ŋkɛ.

²⁸Ghəpə yave nde ndiremia mehele hwa mbeli, ka mcɛhɛ yanehe wəndə nya keŋwashɛ ŋwashɛ.

²⁹Nde ghedəkwəa ŋkɛ yaghwete wəndə nya kemene berete, kadzawa hweŋkwa nya ndiremi beghe ŋkɛ.

³⁰Ma wəndə nya kedərəzləte ntsə ba'a kehwepete mɛ kezha mene wəsə kwa ndiremi ne, nahe ŋkɛ kemenete wəsə kwa ndiremi tsagha.

³¹Ma shinti meha ne, derə meghe nya ganyɛ ŋkɛ. Kwa hweŋkwa ta kaganda nza mbeli kasləyi ŋkɛ.

³²Ma wəndə nya kezereghe ghena ne, za ma ŋkɛ ke katsala. Ma wəndə nya tsefe ghəa ŋkɛ ne, za ma ŋkɛ ke wəndə nya kekelehwe meleme.

³³Kasla kwasheghediɗi mbeli, ama Mahwətə nde ve zhɛne ta ŋkɛ.