Read kapsiki Yɛ Ghena Ŋela 17 Bible Online

Yɛ Ghena Ŋela 17 - kapsiki bible

Yɛ Ghena Ŋela 17

¹Megela ma zeme ɗafa kembeɗa mbe kwelɛŋe ke zeme veghe ki ghɛ nya nza zhɛne ghə.

²Ma nde mene slene nya nza mehele ve ne, katenza ŋkɛ te ŋkwa wəzege nya kepəli nda hawe ke mbeli. Katekemave wəsə kezeme ghɛ ŋkɛ hwa ka kesaka yita.

³Le ghwə dzeghe mze kwa tere tere ba'a mze kwa tɛawetɛa mbeli, ama Mahwətə nde dzeghe nza ta wənəa mbeli.

⁴Ma wəndə nya ndiremia mehele ne, ghena nyi ndiremi ndiremi yave sleme ŋkɛ yite. Ma wəndə nya kesla tseŋwə ne, ghena tseŋwə yave nda mehele ŋkɛ.

⁵Ma wəndə nya keŋ'wəshi nde titikwə ne, nde pate ŋkɛ yaŋele ŋkɛ. Ma wəndə nya kezlama te ndiremi nya te kweci mbeli ne, katembele ŋkɛ va ɗa we.

⁶Fare fare ghəa ka shihɛ yitea hwelefefia nci, zlama ya va ŋwale yitea mbeli nyi keyake hɛ.

⁷Ma ghena ganyɛ ne, zeɗehwe nda ŋkɛ ke nde dewə mehele we, dzawe ma ghena tseŋwə sha wəndə nya te ghə.

⁸Nahe wəsə gəmə kenza kapelɛ ha kwa ntsə ta mbeli nyi nza ŋkɛ va hɛ. Te yayata ŋkwa nya lə hɛ ne, jive yajive hɛ te kema.

⁹Ma wəndə nya kekele fete seyi te wənə ne, kateŋ'we ka mcɛhɛ ŋkɛ. Ama wəndə nya kezhɛzhɛne geva te ne, katehwɛnji ka mcɛhɛnyɛ.

¹⁰Zhɛ nda ma ŋele kwetɛŋe ke wəndə nya nza mehele ve ke geta gwəmsə te wəmbəa nde dewə mehele.

¹¹Wəsə kwa ndiremi yazele nde 'yaghwa mehele kamene. Tsagha ne, ndiremi yaheka nda ŋkɛ ke ghəa ŋkɛ.

¹²Za ma begeme le deghwava nya ɗema ŋwale yite ke begeme le nde dewə mehele mbe gezhia ŋkɛ.

¹³Ma wəndə nya kewa wəsə ganyɛ le kwa ndiremi ne, kashave ndiremi ki ghɛa ŋkɛ we.

¹⁴Ma zhɛne ghə ne, ntsamte ghwa ŋkɛ. Ma nda tegha ghəpə ne, slə ŋa!

¹⁵Ve nde beze ghena kawəndə nya tiɗiɗi keɗema ve wəndə nya tiɗiɗi kande beze ghena ne, kaɗe hɛ Mahwətə bake nci we.

¹⁶Wa yanza cɛdɛ kaketekɛ nde dewə mehele le wa? Kezha kemave ntsehwele na? Ghə shɛ ve we!

¹⁷Kaɗe ŋkwa mcɛ keveci keveci. Ama nahe menə keyake geva kezha vəa yaka.

¹⁸Ma wəndə nya keve dewa ta wəndə kwa ghəa ŋkɛ ne, nde dewə mehele ŋkɛ.

¹⁹Ma wəndə nya keɗe ghəpə ne, jaɗafa yaɗe ŋkɛ. Ma wəndə nya kekele ghəa ŋkɛ ne, za yazele ŋkɛ.

²⁰Ma wəndə nya ndiremia mehele ne, katesləyi zeɗe nza ŋkɛ we. Ma wəndə nya kegeze ghena te mbeli ne, kateteɗe ŋkɛ mbe ndiremi.

²¹Ma wəndə nya keyake gezhi ne, yirə ya te. Katekemave zlama yitenyɛa nde dewə mehele we.

²²Ma wənə nya farefa ne, ghwɛ ganyɛ ŋkɛ. Ama mehele nya ketaze taze ne, geva yapesle ŋkɛ.

²³Ma ka mbəɗəkwə ne, kayɛ wəshi gəmə hɛ tewəfərə kezha zhɛremte kaganda.

²⁴Ma wəndə nya nza mehele ve ne, kanewe newe geva ntsehwele kwa kema ta ŋkɛ. Ama ntsə ta gezhi ne, hwa'a te mendɛkwe ta hɛɗi newe ŋkwa hɛ.

²⁵Yaka yave nde dewə mehele te yitenyɛ, yirə yave ŋkɛ te male nya keyake ŋkɛ.

²⁶Kehi kave ɗa mbeli te wəndə nya tiɗiɗi we. Kehi mbeli kaɗa wəndə nya nza zləvə te we.

²⁷Ma wəndə nya kedzakwe mɛa ŋkɛ ne, wəndə keɗepe wəsə ŋkɛ. Ma wəndə nya kegweɗakwe mehele ne, wəndə nya nza zəzə ve ŋkɛ.

²⁸Ya gezhi kenzanyɛ ŋkɛ divə ne, kande ntsehwele ntsehwele newe ŋkɛ mbeli. Ma keŋzlete mɛa ŋkɛ ŋkɛ ne, kawəndə nya nza mehele ve newe ŋkɛ mbeli.