Read kapsiki Yɛ Ghena Ŋela 20 Bible Online

Yɛ Ghena Ŋela 20 - kapsiki bible

Yɛ Ghena Ŋela 20

¹Kazhɛre wəndə tɛ kande ŋ'wəshi ŋkwa, kave nda wəndə mbazli kande tseha mɛ. Ma yayata wəndə nya kendeke nda ghə ke hɛ ne, katenza ŋkɛ kande ntsehwele ntsehwele tɛape we.

²Ma meghe nya kehwepete wənə ne, kala nivɛrə nya keghwəghwə ŋkɛ. Ma wəndə nya kehwepe nda wənə ne, mpia ŋkɛ yateza ŋkɛ.

³Zləvə nya te wəndə ya ghə va ghəpə. Deke ka gezhia kɛfi kantsə geva mbe.

⁴Kaɗe nde meɗə kawəza hevɛa we. Ma hefeghwe ne, katezele ŋkɛ, ama wəsə shɛ katesləyi ŋkɛ we.

⁵Tewəfərə yɛ zəzə ta wəndə ŋelɛ kala yɛmə nyi mbe hɛɗi. Wəndə nya nza mehele ve nde nza kasləyi hɛ.

⁶Kwele kwele mbeli nyi kefege le ganyɛa mehele ta nci. Ama wəndə nya tiɗiɗi ne, wa nde tenza kasləyi ŋkɛ wa?

⁷Mbe kaganda dzeghwa wəndə nya tiɗiɗi. Katenza zlama va ŋwalea ŋkɛ kwa sebe ta ŋkɛ!

⁸Ma vəa ŋkwa nya nza meghe pelɛ pasla kezha meha ghwə ne, kala metɛ ta ntsə tentsa wəsə kwa ndiremi ŋkɛ.

⁹Wa nde nza kagezete: «Wəsə kwa wənəa ɗa we, wɛŋe 'ya va jaɗafa ta ɗa», ke wa?

¹⁰Kaɗe Mahwətə kaghərə ŋkwa mbeli le yɛ kiləwə ba'a yɛ agweda we.

¹¹Te slene nyi mene ŋkɛ ɗepe mempɛhweta mbeli, kenza ŋkɛ megela ba'a tiɗiɗi dzeghwa ta ŋkɛ.

¹²Ma sleme nya kefa ghena ba'a ntsə nya kenewe ŋkwa ne, Mahwətə nde pate hɛ bake nci.

¹³Ma kaɗe hɛ na ne, katezhɛre na kande titikwə. Ghwenemte ntsə ta ŋa keɗe na kabehe va wəsə kezeme.

¹⁴Ma ke nde pa wəsə sha geze: «Wəsə ganyɛ we, wəsə ganyɛ we!» Ama vəa ŋkwa nya slənyɛ ŋkɛ ne, katsahe ghəa ŋkɛ ŋkɛ yitea wəsəa shɛ.

¹⁵Kakemave mze kwa tere tere ba'a wəshi kepesa geva mbeli kwele kwele. Ama ghena ntsehwele yanza zləvə te za ma.

¹⁶Ma keɗe kwete wəndə kanzəɓə nda dewa va gha ke kwete wəndə ne, keseyi lekwesa ta ŋkɛ, kwa nza ŋkɛ ke kwete wəndə nzəɓə nda ŋkɛ.

¹⁷Ma kakwa ghate ne, zeɗekə ɗafa nya ghweteke mbeli, ama kwa sebe ta ŋkɛ ne, kweya ya viɗi te mɛ ve.

¹⁸Kateyipə zəzə ta ŋkɛ wəndə nya ke'yɛwe ntsehwele. Ləma na yitea mpa kaɗema na kezəzəve megela ma.

¹⁹Nde pelaŋe ghena wəndə nya keŋwashɛ ŋwashɛ. Jikəma geva na le wəndə nya ketseha mɛ ma.

²⁰Ma wəndə nya keɓelama yɛ yitenyɛ le meghekɛ ne, katemte ŋkɛ kala paterela hwa ŋkwesle.

²¹Ma mcɛlə nyi ketsenete geva kahe kahe ne, katefa deme mbeli te hɛ te kwa keɗaŋe we.

²²Zəzəma na kawa ghena kwa ndiremi nya menete ŋa mbeli ma. Ndeke nda ghəa ŋa ke Mahwətə, katembele ŋa ŋkɛ.

²³Kaɗe agweda nyi keɗema tiɗiɗi Mahwətə we. Kehi kiləwə nyi keɗema le hweŋkwa ta ŋkɛ we.

²⁴Mahwətə nde sleke dzeghwa ta wəndə ŋelɛ. Tsema nza wəndə ŋelɛ kafave dzeghwa ta ŋkɛ wa?

²⁵Keleŋa ŋkɛ kave nda wəsə tekeleke ke Shala gəmə ba'a kameɗe nda wəsə kaɗema wəndə kezəzəve.

²⁶Kataze ka 'yaghwa mehele meghe nya kentsehwele ntsehwele, kaŋkeɗe hɛ ŋkɛ le seɗa ta wəmata.

²⁷Mehele ta wəndə ŋelɛ ya kapaterela ta Mahwətə, gheŋkɛ nde waŋe kwa keɗaŋe ta zəzə ta ŋkɛ.

²⁸Kaya meghe ganyɛa mehele ba'a nza tiɗiɗi. Ganyɛa mehele nde ve nda berete ke meghea ŋkɛ.

²⁹Berete ta nci ya kazləvəa megelɛshi, shinti meha ya kahawe nya te meha mehɛɗi.

³⁰Zhi nyi keɗa ŋkwa ya kaghwɛa wəsə kwa ndiremi, tsagha yɛ ɗa kaŋa kwa keɗaŋe ta zəzə.