Read kapsiki Yɛ Ghena Ŋela 23 Bible Online

Yɛ Ghena Ŋela 23 - kapsiki bible

Yɛ Ghena Ŋela 23

¹Ma kenza na kənəa wəsə kezeme le wəndə nya nza zləvə te ne, vate mehele megela te wəndə nya kwa kema ta ŋa.

²Ma kenza na kande ɓerawe ne, dzeghete zeme wəsə ta ŋa.

³Ntsəma na yitea wəshi kezeme ganjia ŋkɛ ma: wəsə kezeme nya kepəli nda hawe ke wəndə ŋkɛ.

⁴Leɓema ghəa ŋa na katsene yɛ mcɛlə ma, nza ŋa keve zəzə te hɛ.

⁵Ma nda tevate geva ntsə ta ŋa te hɛ ne, nahe hɛ kezanji. Kala zele nya kezlə dzeme yitea ghweme pele yɛ bidzə hɛ.

⁶Zemema ɗafa ta nde ntsə yitea wəshi na ma, slama ntsə na yitea wəshi kezeme ganjia ŋkɛ ma.

⁷Kwa nza ŋkɛ kazəzə ŋkɛ kala nya geze ŋkɛ we. «Zeme ba'a sa», ke sha geze ŋa, ama le gha wənəa ŋkɛ we.

⁸Katevənəhwe wəsə nya ndahwe na na, wəsə shɛ keketekɛ ghena ganjia ŋa we.

⁹Geze nda ma ghena na ke gezhi ma, kateɓela ghena nya mbe yɛ ghena ta ŋa ŋkɛ we.

¹⁰Nteɗema ghala nya vəashi na ma, zləgwəma wəvea ka mezhɛtiti na ma.

¹¹Kwa nza ŋkɛ berete ya va nde kemane hɛ, gheŋkɛ nde teya hɛ va gha.

¹²Ghwenemte mehele ta ŋa yitea teke wəshi ba'a yɛ sleme ta ŋa yitea ghena ɗepe wəsə.

¹³Nza ŋa ma na ke'yɛ wəzege ta ŋa ma. Ma kenza na kaɗa ŋkɛ ne, kamtenyɛ ŋkɛ ve we.

¹⁴Ama kenza na kaɗa ŋkɛ ne, katembele mpia ŋkɛ na va mte.

¹⁵Wəzege ta ɗa, ma kendeke nda wənəa ŋa na ke ntsehwele ne, fare fare tenza wənəa ɗa perə.

¹⁶Kwele kwele tenza zlama va 'ya vəa ŋkwa nya tegeze ghena nya tiɗiɗi na.

¹⁷Zhɛma ŋa zlɛ va ka jaɗafa ma, ama hawe va Mahwətə keveci keveci.

¹⁸Tagha gɛ, katekemave zeɗe nza na, katebeze geva zəzə ta ŋa we.

¹⁹Ma gha gɛ wəzege ta ɗa, fa ghena ta ɗa yitea nza na kande ntsehwele ntsehwele, katedzeghwa na kwa hweŋkwa nya tiɗiɗi.

²⁰Dzeghwama na le mbeli nyi keghwəyi, ya nyi kezeme sli kwele kwele ma.

²¹Kaka titikwə tenza mbeli nyi keghwəyi ba'a nyi kezeme sli kwele kwele. Kaca kaca yateseɗe hɛ va meɗəa nci.

²²Fa nda ghena ke yiteyɛ ŋa, gheŋkɛ nya keyake ŋa, kelema zləvə na te meyɛ ŋa va nya hale nda nde ma.

²³Tekeve kaganda, ntsehwele, fa ghena ba'a ɗepe wəsə. Ma kekemave wəshi nyi na ne, bezemtema hɛ na ma.

²⁴Zlama nde nza va yitenyɛa wəzege nya tiɗiɗi, fare fare nza wəndə nya keyake wəzege nya kentsehwele ntsehwele.

²⁵Nza zlama va yiteyɛ ŋa ba'a meyɛ ŋa, nza farefa va male nya keyake ŋa.

²⁶Wəzege ta ɗa, ndeke ɗa ghəa ŋa, nza dzeghwa ta ɗa zeɗehwe ŋa.

²⁷Kaganda ne, ki nya lɛame male nya kemene mefətekwə, belageji nya mentɛawe male nya ɗepema wəndə.

²⁸Kala nde mefətekwə ŋa keleŋa nde. Kwele kwele zhili nyi kesehwe nde.

²⁹Kaŋa wa yɛ «Awema» wa? Kaŋa wa yɛ «Aya» wa? Kaŋa wa yɛ ghəpə wa? Kaŋa wa yɛ ŋgaɗe ghə wa? Kaŋa wa ɗa nyi gəmə gəmə wa? Kaŋa wa ntsə nyi ghɛmɛa ghɛmɛa wa?

³⁰Kaŋa wəndə nya kebeke te ŋkwa nya nza tɛ, kaŋa wəndə nya kegwegweɗə wəshi kesa nyi keghwəyi ŋkwa.

³¹Newema tɛ na vəa ŋkwa nya nza ŋkɛ ghɛmɛ, vəa ŋkwa nya nza hwɛfɛ kənə kwa kwalekwə ba'a vəa ŋkwa nya dzawa ŋkɛ vare ŋwələ ma.

³²Kwa sebe ta ŋkɛ ne, katehale ŋkwa ŋkɛ kala shishi, katendaŋwe ŋkwa ŋkɛ kala mentsape.

³³Katezhezhewɛne geva wəshi dzeyi mɛa ntsə ta ŋa ba'a kategeze ghena na taheta taheta.

³⁴Katenza na kala wəndə nya meɓelahe te tepe ta ndərə, kala wəndə nya pelɛ ghəa seləa kwambelə.

³⁵Ma pa na sha tezəzə: «Nahe mbeli keɗate ɗa, ama wəsə shɛ kazhɛ ɗa we! Nahe mbeli kempave ɗa, ama keɗepete 'ya we! Hweŋkwa tefeɗeghe 'ya tse wa? Kate'yɛwe wəsə kesa 'ya zhɛkwa!»