Read kapsiki Yɛ Ghena Ŋela 24 Bible Online

Yɛ Ghena Ŋela 24 - kapsiki bible

Yɛ Ghena Ŋela 24

¹Zlɛma na va ka ndiremia mehele ma, mawema dzeghwa na le hɛ ma.

²Kwa nza ŋkɛ mene berete yazəzə hɛ ba'a wəsə kwa ndiremi nya temene hɛ yageze hɛ.

³Laka ntsehwele ne, wərə mbeli kaŋate ghɛ, laka mehele ne, kave nda berete mbeli.

⁴Laka ɗepe wəsə ne, kampɛafe yɛ cɛ mbeli le mama ta wəshi nyi ganji ganji ba'a nyi ndeɗe ndeɗe.

⁵Ntsehwelea wəndə nde ve nda berete, ɗepe wəsə ta wəndə nde mtsehe nda berete.

⁶Dzemtema mpa na kaɗema na kezəzəve megela ma. Mbe zlɛazlɛa ta ka ncɛ ntsehwele se hərə ŋkwa.

⁷Kateɓakɛ ntsehwele nde dewə mehele we. Vatse ɗema ŋkɛ shɛ ghwene mɛ hwa tsene ta meleme.

⁸Ma wəndə nya kezəzə te mene wəsə kwa ndiremi ne, nde mene wəshi nyi ndiremi ndiremi heka ŋkɛ mbeli.

⁹Jaɗafa yazəzə nde dewə mehele keveci keveci. Kaɗe ntsə ta nde ŋkele ntsə mbeli we.

¹⁰Ma kemtenyɛ geva ta ŋa te vecia yaka ne, nde dewə berete na kaganda kaganda.

¹¹Mbelemte mbeli nyi tempə mbeli, yakɛ mbeli nyi ketsepe tsepe kadzete ŋkwa kempə ŋkwa.

¹²Ya kwete ma pa na sha tegeze: «Wəsə shɛ keɗepe 'ya we.» Keɗepe wəndə nya keɗepe ŋkwa nya kwa wənə wəka? Keɗepe wəndə nya kenewe ŋa wəka? Kateve nda zhɛme ŋkɛ ke yayata wəndə kala slene ta ŋkɛ wəka?

¹³Wəzege ta ɗa, zeme mze, kwa nza ŋkɛ ghɛnike ŋkɛ, zeɗekə tenza yɛməa mze kwa mɛa ŋa.

¹⁴Tsagha tenza ntsehwele kaŋa ŋa, ɗepete megela. Ma kekemave ŋkɛ na ne, katenza nza ta ŋa megela. Katebeze geva wəsə nya neghe na we.

¹⁵Kelema ghɛa wəndə nya tiɗiɗi na le mbəɗəkwə ma, fəma wəshi nyi ki ghɛa ŋkɛ na kala nde 'yaghwa mehele ma.

¹⁶Wərə wəndə nya tiɗiɗi kateɗe mberefaŋe zhigə, katesate ŋkɛ. Ama ka 'yaghwa mehele ne, kadzehwa ndiremi bete hɛ.

¹⁷Zlamama na yitea teɗe ta nde ghema ta ŋa ma, mperekema na va zlama kenza ŋkɛ mbe ndiremi ma.

¹⁸Kawəsə nya ndiremi tenewe Mahwətə, katenzanyɛ ŋkɛ keve ɗa te nde ghema ta ŋa.

¹⁹Hwepema wənə na va ka ndiremia mehele ma, zlɛma na va ka 'yaghwa mehele ma.

²⁰Katekemave zeɗe nza nde ndiremia mehele we, katemte paterela ta ka 'yaghwa mehele.

²¹Wəzege ta ɗa, hawe va Mahwətə ba'a va meghe. Bekema na le mbeli nyi keɗe kazhɛremte pɛtɛa wəshi ma.

²²Kwa nza ŋkɛ wərə ndiremi kasləyi hɛ vəkə. Wa nde ɗepe ndiremi nya nza Shala ba'a meghe kavate te hɛ wa?

²³Wa nyi kweci ghena ta ka ntsehwele ntsehwele nyi: Wəsə ganyɛ meha ghwə le nta ghala we.

²⁴Ma yayata wəndə nya kegeze: «Fete va gha we», ke sha nde mene fete ne, katebezla ŋkɛ ba'a kateɗema ŋkɛ mbeli.

²⁵Ma mbeli nyi keve ɗa te nde mene fete ne, katekemave zeɗe nza hɛ, katewəpi hɛ mbeli ba'a katemawe nda zeɗe nza mbeli ke hɛ.

²⁶Zhɛne ghena le kaganda ne, wəsə nya kencɛ mcɛ ŋkɛ.

²⁷Menete slene ta ŋa megela pelɛ te ŋwela, hite wəvea ŋa ndeɗekə. Kwa sebe ta ŋkɛ ne, kateŋa ghɛa ŋa na.

²⁸Ve nda ma fete na ke nde ghedəkwəa ŋa gəmə ma. Tseŋwə yaɗe na kasla laka ghena nyi geze na na?

²⁹Gezema na: «Katemene nda 'ya kala nya menete ɗa ŋkɛ, kateve nda zhɛme 'ya ke yayata wəndə kala slene ta ŋkɛ», pa ma.

³⁰Ma te kwete hɛ ne, pa 'ya dzeyi ɗa vare wəvea nde meɗə, vare wəvea rɛzɛŋea wəndə nya dewə nda zəzə.

³¹Yɛ tigə kwara ya dzeyi te yayata ŋkwa, zhiɓə ŋkwa nya mbe va yɛ tigə ba'a nahe zli pelɛ nya yite keŋzlanyɛ.

³²Ma 'ya kelete zəzə te wəsə nya nakɛ 'ya, ba'a fave ghena nya mbe wəsə nya betate ntsə 'ya te:

³³Kahɛ na ɓɛhwɛ, kadərəzlə ntsə na kavə ɓɛhwɛ, kaɓelahe na serayɛ kaɗema mene slene.

³⁴Tagha gɛ, kateme titikwə te gha kala ghərə, katecɛha ŋa yaka kala nde fə wəshi kaberete.