Read kapsiki Yɛ Ghena Ŋela 27 Bible Online

Yɛ Ghena Ŋela 27 - kapsiki bible

Yɛ Ghena Ŋela 27

¹Menema fege na le hendɛ ma, kwa nza ŋkɛ keɗepe wəsə nya ketemene geva ɓeshi na we.

²Sərəakɛ kweci mbeli katsahe ŋa. Megela ma tsahe ŋa nde mtake kenya tsahe ghəa ŋa na.

³Ɗaŋe ɗaŋe pelɛ, tsagha shɛ behwea ndaleghe, ama ɗaŋeɗa ma nza hwepe ta wənəa nde dewə mehele.

⁴Wəsə nya ndiremi mene berete, kala hələ nya kesawa hwepe ta wənə, ama wa nde tenza kaghereŋe kwa kema ta zlɛ wa?

⁵Megela ma ŋele nya le kaganda ke mcɛ nya keɗema kancɛ geva.

⁶Ɗe ta ŋkɛ yancɛ yɛ ŋele ta mcɛ, ama ɗe tseŋwə həməwə ŋkwa ta nde ghema.

⁷Kaɓela yɛməa mze wəndə nya behe we. Ama zeɗekə fa wəsə nya ndɛalɛa wəndə nya shewə va ma.

⁸Kala 'yɛ nya keslənyɛ cakeɗake yitea ghɛa ŋkɛ wəndə nya kendeŋenyɛ cakeɗake yitea hɛɗia ŋkɛ.

⁹Zlama yave nda n'yi ba'a 'wərdə ke wənə. Megela ma ganyɛa mcɛ ke 'wərdə nya nza zləvə te.

¹⁰Wəfəyitema ka mcɛhɛ ŋa, ya ka mcɛhɛnyɛa yiteyɛ ŋa na ma. Ləma na sha wəza yiteyɛ ŋa kenza ghena te gha ma. Za ma nde ghedəkwə nya dekwe ke wəza yita nya cakeɗa.

¹¹Wəzege ta ɗa, nza kentsehwele ntsehwele, ma tsagha ne, fare fare tenza wənəa ɗa. Ma keŋelekɛ ɗa wəndə ne, wərə 'ya katezhɛnete nda.

¹²Kawəfərə nde ntsehwele ntsehwele kenakɛ ndiremi ŋkɛ kase, ama ghə yaha nda ka gezhia kɛfi nda teme ŋkɛ te hɛ.

¹³Ma kenza wəndə kanzəɓə nda dewa va gha ke wəndə ne, keseyi lekwesa ta ŋkɛ. Ma va nya veyi dewa ta wəndə nya ɗepema na ŋkɛ kwa ghəa ŋkɛ ne, veyi ŋa wəsə ŋkɛ kwa jiŋgina.

¹⁴Ma kenza wəndə kakwaɗe sha nde ghedəkwəa ŋkɛ le lewela masheke masheke ne, kaŋele tefa kwaɗe ta ŋkɛ mbeli.

¹⁵Ma male nya keghəpə ne, kala ghapeha nya kecifə cifə nde.

¹⁶Ma keɗe na kafɛa ŋkɛ yite ne, kala wəsə nya ɗe na kafɛa sefə keɗema kagə n'yi te dzeve.

¹⁷Lɛ nde mɗɛ lɛ. Jikə geva le mbeli nde ve nda mehele ke wəndə.

¹⁸Ma wəndə nya kenene yitea dasekwa ne, katezeme ya ta ŋkɛ ŋkɛ. Ma wəndə nya ketsefe yitea nde sleke ŋkɛ ne, katekemave zləvə ŋkɛ.

¹⁹Kala nya nza wəndə kanewe ghəa ŋkɛ kwa yɛmə ne, tsagha newe geva yɛ zəzə ta wəndə kwa kema ta ŋkɛ.

²⁰Kala nya ɗema ghɛa mbelia kwahɛɗi kabehe va mbeli ne, tsagha ɗema sla ntsə ta wəndə ŋelɛ kabehe.

²¹Le ghwə dzeghe mze kwa tere tere ba'a mze kwa tɛawetɛa mbeli, le zləvə nya te dzeghe wəndə mbeli.

²²Ya mbeli nzəkwəmte nde dewə mehele kwa nzərə ne, kakiɗi dewə mehele ta ŋkɛ te we.

²³Neweve nza ta timɛtia ŋa megela, nene yitea wəvəsəa wəshi keseɗa ta ŋa.

²⁴Kwa nza ŋkɛ ne, kanza mcɛlə kaghala ghala we. Ya derə meghe ne, kanza keshi keshi we.

²⁵Sla gwəzə sheke kwamte, vəa ŋkwa nya nza gwəzə mba kakele. Ŋase gwəzə nyi keghwele ghwele dzeyi hwa yɛ ghweme.

²⁶Kele timɛti kezha tsa yɛ lekwesa yitea shintia nci, ha zhɛfa lɛmə kezha pa wəve na te hɛ.

²⁷Ma ŋ'wa nya mpave na kwele kwele yitea kwia ŋa ne, katesa yɛ le mbelia ŋa ba'a ka kwaterashia ŋa.