Read kapsiki Yɛ Ghena Ŋela 29 Bible Online

Yɛ Ghena Ŋela 29 - kapsiki bible

Yɛ Ghena Ŋela 29

¹Ma wəndə nya kentsə ghə ntɛaŋe ntɛaŋe va ghena nyi geze nda mbeli ne, kala metɛ ta ntsə teza ŋkɛ kaɗema ghwɛ yite.

²Zlama yazlama mbeli kembakete geva mbeli nyi tiɗiɗi. Ama ŋələvə yaŋələvə mbeli kenza ŋkɛ nde 'yaghwa mehele nde sleke ŋkwa.

³Zlama yave nda wəndə nya keɗe ntsehwele ke yitenyɛ. Ama wəshia ŋkɛ yabeze wəndə nya kezele mi nyi kemene mefətekwə.

⁴Jive mbe kema yave nda meghe nya kehawe va wəsə mahalegə ke hɛɗia ŋkɛ. Ama taze yataze ŋkɛ kenza ŋkɛ ka'yɛwe jaɓeregwale kwele kwele.

⁵Ma wəndə nya keghwete nde ghedəkwəa ŋkɛ ne, keleŋa yaŋa nda ŋkɛ ke ghəa ŋkɛ.

⁶Fete ta nci ya kakeleŋa ta ka 'yaghwa mehele. Ama zlama ba'a farefa ya va mbeli nyi tiɗiɗi.

⁷Nahe wəndə nya tiɗiɗi keɗepe nza ta ka titikwəa kɛfi. Ama ɗepe wəsə nya kala nyagha shɛ va nde 'yaghwa mehele we.

⁸Ghwə yandə mbeli nyi keyiɗə ŋkwa yitea meleme. Ama wənəa nci yagweɗakwe nda ka ntsehwele ntsehwele ke mbeli nyi mbe.

⁹Ma kenza nde ntsehwele ntsehwele te ghwə le nde dewə mehele, ya gheŋkɛ hwepete wənə keɗema ŋ'wəshi ne, kagweɗakwe mehele ta ŋkɛ we.

¹⁰Kaɗe ntsə ta mbeli nyi kegeze kaganda ka mpə ŋkwa we. Ama le hɛ ɗe mbeli nyi tiɗiɗi kabeke.

¹¹Waɗe pelave nda hweŋkwa nde dewə mehele ke hwepe ta wənəa ŋkɛ. Ama kakese ba'a kagweɗakwe ŋa ŋkɛ nde ntsehwele ntsehwele.

¹²Ma kenza wəndə nya te ghə kave sleme yitea yɛ tseŋwə ne, pɛtɛ zhɛre ka mene slene ta ŋkɛ kaka tseŋwəa kɛfi.

¹³Kanya kwetɛŋe yɛ nde titikwə le wəndə nya kesa nda yaka: Mahwətə nde ve nda ntsə ke hɛ bake nci kezha newe ŋkwa.

¹⁴Ma kenza meghe kameha nda ghwə tiɗiɗi ke ka dewə ŋeli ne, le berete tenza meghea ŋkɛ kaghala ghala.

¹⁵Kave nda ntsehwele yɛ ɗa ba'a yɛ ŋele ke wəndə. Ama hawe yapəli nda wəzege nya kesleke ghəa ŋkɛ ke meghekɛ.

¹⁶Kwele kwele nza beze ghena kenza wəba va ka 'yaghwa mehele. Ama katenewe teɗe ta nci mbeli nyi tiɗiɗi.

¹⁷'Yɛte wəzege ta ŋa, gweɗakwe tenza na, ba'a ne, kateve ŋa zlama ŋkɛ.

¹⁸Kebeze beze nza mbeli keɗema zəzə hendɛ shɛ. Ama zlama ya va wəndə nya kehawe va wəsə mahalegə.

¹⁹Ka'yɛ nde mene slene mbeli le ghena we. Katehawe ŋkɛ ve, ya gheŋkɛ fate ghena nya geze nda mbeli we.

²⁰Ma kenakɛ wəndə na kageze ghena kaɗema kazəzə ne, megela ma ve ghə te nde dewə mehele ke gheŋkɛ.

²¹Ma wəndə nya kemene nda ganyɛ ke mava ta ŋkɛ se kawəzege ŋkɛ ne, katezhɛre ŋkɛ kande meɗə.

²²Ghəpə yamtse wəndə nya nza wənə hwe. Jaɗafa yambake wəndə nya keɗema kagweɗakwe.

²³Kateshifəmte geva wəndə nya kekele ghə. Ama katenza zləvə te wəndə nya keshifə ghəa ŋkɛ.

²⁴Ghəa ŋkɛ yaɗema wəndə nya kamcɛnyɛa ghərə. Nahe ŋkɛ keɗepe bezla nya ketedzete, ama kancɛ ghərəa shɛ ŋkɛ we.

²⁵Nahe ghazlənə va kweci mbeli kenza kakeleŋa. Ama gwezlayɛ nza wəndə nya kendeke nda ghəa ŋkɛ ke Mahwətə.

²⁶Kwele kwele mbeli nyi kezele zlaɓa ta wəndə nya te ghə, ama va Mahwətə se nza le hweŋkwa ta ŋkɛ kaŋa yayata wəndə.

²⁷Kaɗe ntsə ta mbeli nyi ɗema kaganda va hɛ mbeli nyi tiɗiɗi we. Kaɗe dzeghwa ta mbeli nyi tiɗiɗi ka 'yaghwa mehele we.