Read kapsiki Yɛ Ghena Ŋela 31 Bible Online

Yɛ Ghena Ŋela 31 - kapsiki bible

Yɛ Ghena Ŋela 31

¹Wa nyi ghena nyi ncɛte nda meghekɛ ke Leməwɛl, meghe nya mbe Masa nyi:

²«Fate, wəzege ta ɗa, gha nya yake 'ya, gha nya se 'ya kamawe.

³Pele nda ma berete ta ŋa na ke mi, ya nza ta ŋa na ke mi nyi keza ka meghe ma.

⁴Leməwɛl, kehi tɛ kaŋa ka meghea kɛfi we, kehi wəshi kesa nyi keghwəyi ŋkwa kaŋa mbeli nyi te ghə we.

⁵Ma keghwəyinji hɛ ne, katezaghə wəshi mahalegə hɛ ba'a kameha nda ghwə nya tiɗiɗi hɛ ke ka titikwəa kɛfi we.

⁶Ndeke nda mə wəshi kesa nyi keghwəyi ŋkwa ke wəndə nya ketemte ba'a tɛ ke wəndə nya nza mehele ta ŋkɛ ketaze taze.

⁷Sahwe ŋkɛ kezha zaghəyite titikwə nya te ŋkɛ, kezha ɗema ŋkɛ kazəzəte ndiremi nya te.

⁸Ama gha ne, geze ghena te ŋkwa mbeli nyi keshɛma geze ghena ba'a nza kwa sebe ta mbeli nyi wəfəyite mbeli.

⁹Ghwene mɛ kezha meha ghwə tiɗiɗi, ya ka dewə ŋeli ba'a ka titikwəa kɛfi.»

¹⁰Wa nde tenza kakemave male nya nza zləvə te wa? Za ma zləvə te ke wəshi kepesa geva.

¹¹Kagezleŋe ghə za nta ve we, kabeze wəshia ŋkɛ nde we.

¹²Kamene nda wəsə kwa ndiremi nde we, ama zeɗe nza yave nda nde mbe pɛtɛa hɛa ŋkɛ.

¹³Kazele shintia təmə ba'a pawa nde, kamene slene nde le dzeve ta nta tsape tsape.

¹⁴Kala yɛ kwambeləa ka zhɛre dzeve ne, kafə wəsə kezeme ta nta nde se cakeɗake.

¹⁵Mba ŋkwa heviɗi nda sate nde te ŋkwa kezha ta nda wəsə kezeme ke mbelia nta ba'a kezha geze nda slene ta nci ke ka kwaterashia nta.

¹⁶Ma kwa zəzəve nde, pa nde pave wəve, mɓete yɛ wəfe ta rɛzɛŋe te le zhɛme ta slene ta nta.

¹⁷Le ntsə geva dzemɛa slene nde, kanza dzeve ta nta divə we.

¹⁸Kanewe newe nde nda dzeghwa wəshi nyi mene nde megela, kamte paterela ta nta heviɗi we.

¹⁹Kaleme shintia təmə nde le dzeve ta nta, katsa yɛ lekwesa nde le ŋwalea dzeve ta nta.

²⁰Kakemane ka dewə ŋeli nde, kaɗa nda wəshi nde ke ka titikwəa kɛfi.

²¹Kagezleŋe ghə nde va ntasle kaŋa mbelia nta we, kwa nza ŋkɛ lekwesa ntasle ya va yayata wəndə ki ghɛa nta.

²²Katsa yɛ gwada nde ke ghəa nta, le pawa ganji nyi ghemea ghemea yɛ lekwesa ta nta.

²³Wəndə kwele nya hawe mbeli ve za nta, kadzehwa tsene ta mbelia jama nyi mbe meleme ŋkɛ.

²⁴Katsa yɛ lekwesa nde kezha pamte, kapamte nda zewe nyi hwa hwə nde ke ka zhɛre dzeve.

²⁵Berete ba'a zləvə ya kənəa geva ta nta, kagezleŋe ghə nde va hendɛ we.

²⁶Le ntsehwele geze ghena nde, le mehele teke nda wəshi nde ke mbeli.

²⁷Kanewe ghweme nde te dzeghwa ta ghɛa nta, kazeme ɗafa gəmə nde we.

²⁸Kave zləvə ŋwalea nta te kwa kema ta mbeli pɛtɛ, nda tsahe yatsahe ŋkɛ za nta.

²⁹Ma ke sha geze: «Kwele kwele mi nyi kencɛte zləvəa nci, ama za ma na ke hɛ pɛtɛ.»

³⁰Kaghwete ŋkwa pesa geva, katemə ndeɗea geva we. Deke male nya kehawe va Mahwətə yahi mbeli katsahe.

³¹Ndeke nda mə zhɛme ta slene ta nta. Tsahe ŋkɛ mbeli dzeyi te yɛ ŋkwa kebeke gɛ!