Read kapsiki Yɛ Ghena Ŋela 5 Bible Online

Yɛ Ghena Ŋela 5 - kapsiki bible

Yɛ Ghena Ŋela 5

¹Wəzege ta ɗa, ndeke nda mehele ke ntsehwelea ɗa ve sleme yitea ɗepe wəsəa ɗa.

²Ma tsagha ne, katenza zəzə ghena va gha ba'a katenza ɗepe ghena te ghɛnia ŋa.

³Kwa nza ŋkɛ ma ghena ta male ta wəndə ne, ghɛnike kala mze, kweɗe kweɗe ta geva ŋkɛ kala n'yi.

⁴Ama te kwa keɗaŋe ne, ndɛalɛake tenza ŋkɛ kala cɛana, nale nale kala kafayɛ nya nza mɛ bake te.

⁵Kadzawa sha mte dzawa seɗa ta nta, kadzawa sha mbelia kwahɛɗi dzeghwa ta nta.

⁶Kakele hweŋkwa ta mpi nde we, kaza nda za hweŋkwa kaɗema nde keɗepe.

⁷Ma tsetsenya gɛ wəzege ta ɗa, fa ghena ta ɗa. Betema ghena nyi geze 'ya na ma.

⁸Nza ŋa cakeɗake yitea male nya kala nyagha, mba na kehende geva kase kadzemɛa cɛa nta,

⁹yagha nde kandeke nda zləvəa ŋa ke kweci mbeli ba'a yɛ va ta ŋa teghweme ke nde pesle ŋkwa,

¹⁰yagha ka se se kabehekɛ ghəa nci le wəshia ŋa ba'a zhɛme ta slene ta ŋa kanza mbe dzeve ta kwete wəndə,

¹¹kakwa keɗaŋe, yagha na kateŋələvə vəa ŋkwa nya kiɗinji yɛ berete ta ŋa.

¹²Tagha gɛ, ma pa na sha tegeze: «Va wa ɗema 'ya fa ghena nyi geze ɗa mbeli tse wa? Va wa yɛtema ghena shɛhɛ wənəa ɗa tse wa?

¹³Va wa ɗema 'ya kese kafa ghena ta ka teke ɗa wəshi ba'a kave sleme yitea wəshi nyi teke ɗa hɛ tse wa?

¹⁴Tagha gɛ, takwa takwa 'ya kadzembe ndiremi kwa kema mbeli ba'a kwa kema ta hwelefe ta ɗa.»

¹⁵Ma male ta ŋa ne, kala ghwa nya wɛŋe nde. Sa yɛmə nya kegwezha gwezha same kwa ghwa shɛ.

¹⁶Pelema yɛməa ŋkɛ na kahwɛ dzeyi kwa yɛ hweŋkwa ba'a dzeyi te yɛ ŋkwa kebeke ma.

¹⁷Nza nde kaŋa ŋa kwetɛŋe ŋa, nehema na le kweci mbeli ma.

¹⁸Nza ghwa ta ŋa kewəpi wəpi ba'a zlama te male mempɛhweta ta ŋa.

¹⁹Shɛanɛake nɛake nde kala le, ganyɛke nde kala kɛme. Ve ŋa zlama yɛ ŋ'wa ta nta keveci keveci. Nza keghwəyi ghwəyi keveci keveci va ɗe ŋkɛ.

²⁰Wəzege ta ɗa, va wa ɗe male ta kwete wəndə ba'a keɓe ŋ'wa ta kwete male na wa?

²¹Kaganda ne, te dzeghwa ta mbeli pɛtɛ ntsə ta Mahwətə, kanewe newe pɛtɛa wəshi nyi mene hɛ ŋkɛ.

²²Katekese nde 'yaghwa mehele fete nyi mene ŋkɛ, katehwepe ŋkɛ yɛ jaɗafa ta ŋkɛ kala zewe.

²³Katemte ŋkɛ va dewə ntsehwele, kateza ŋkɛ va dewə mehele ta ŋkɛ.