Read kapsiki Yɛ Ghena Ŋela 6 Bible Online

Yɛ Ghena Ŋela 6 - kapsiki bible

Yɛ Ghena Ŋela 6

¹Wəzege ta ɗa, ma keyɛhwe na kanza kande dzeve ta dewa ta mcɛ ŋa, ma keveyi dewa ta kwete wəndə na te dzeve ta ŋa,

²ma kekeseyi ghəa ŋa na te dagalawe le ghena nyi geze na, ma kedzete ŋa na te keleŋa laka meɗe mɛ nyi menete na ne,

³wa nya wəsə nya mene na kezha mbele ghəa ŋa nya wəzege ta ɗa: ma kwa nza ŋkɛ nahe na kedzembe dzeve ta nde ghedəkwəa ŋa ne, kwiɗi shɛ, mpiyi nda dzeve, deneve ŋkɛ.

⁴Mtatema mte na te hɛ ba'a dərəzləma ntsə na ma.

⁵Mbelemte ghəa ŋa va keleŋa kala kɛme, va dagalawe nya keŋate geva kala 'yɛ.

⁶Kwiɗi kalə kadzete ghɛa lɛshekwɛnɛa, gɛ nde meɗə! Neweve nza ta nci, ma tsagha ne, kande ntsehwele ntsehwele tenza na.

⁷Wəndə nya te ghəa nci, wəndə nya keya hɛ keɗema wəndə nya kesleke hɛ shɛ hwa hɛ we.

⁸Ma heghele ne, katsene wəshi kezeme ta nci hɛ. Ma vəa nya mene wəshi mbeli se te wəve ne, kawəmbə wəshi hɛ.

⁹Ma gha gɛ nde meɗə, pa te nyama və tenza na meɓelahe wa? Hweŋkwa tefeɗeghe na te hɛ ta ŋa wa?

¹⁰Hɛakɛ hɛ ɓɛhwɛ, shiwəakɛ shiwə ɓɛhwɛ, teməakɛ temə ɓɛhwɛ le dzeve tepeɗe.

¹¹Ma mbe və nyagha gɛ ne, katese titikwə kala ghərə ba'a yaka kala nde mefətekwə.

¹²Nahe nde dewə mehele kenza kawəsə kwadanyɛa wəndə, le tseŋwə dzeghwa ŋkɛ te mɛ.

¹³Kamelɛawe ntsə ŋkɛ, kadɛme dɛme seɗa ŋkɛ ba'a kakwaslɛ dzeve ŋkɛ.

¹⁴Wəsə kwa ndiremi yazeɗehwe nda, slene nyi ndiremi ndiremi yazəzə ŋkɛ keveci keveci, ghəpə yamtse ŋkɛ.

¹⁵Vatse teteɗe ŋkɛ tewə ketemə, kateza ŋkɛ kala metɛ ta ntsə kaɗema ghwɛ yite.

¹⁶Wəshi ya shɛ ŋkwaŋe nyi ɗema Mahwətə, mberefaŋe wəshi nyi ndiremi ndiremi kashasha shɛ:

¹⁷ntsə nya keghwərəzlə ŋkwa, ghɛni nya kesla tseŋwə, dzeve nyi kepesle wəndə nya ɗema fete ve,

¹⁸wənə nya kezəzə wəshi nyi ndiremi ndiremi, seɗa nyi wɛrewɛ kezha mene wəsə kwa ndiremi,

¹⁹nde negha fete nya kesla tseŋwə ba'a wəndə nya keve ghəpə kwelɛ ka menəhɛ.

²⁰Wəzege ta ɗa, ya wəshi nyi gezete yiteyɛ ŋa ba'a pelema se na yitea wəsə nya tekete ŋa meyɛ ŋa ma.

²¹Keseyi hɛ kwa wənəa ŋa keveci keveci, hwepeyi hɛ kwa welɛa ŋa.

²²Katencɛ ŋa hweŋkwa hɛ vəa ŋkwa nya tedzeghwa na, kateya ŋa hɛ vəa ŋkwa nya nza na meɓelahe ba'a kategeze ŋa ghena hɛ vəa ŋkwa nya tefeɗeghe na.

²³Kwa nza ŋkɛ paterela ghena nyi kegezete geva, waŋe wəsə nya ketekete geva. Ma ŋele ba'a geze nda ghena ke wəndə ne, ghenci ka ve ŋkwa kwa hweŋkwa ta mpi.

²⁴Kateya ŋa hɛ va male nya ndiremia mehele ba'a va ghena keghwete ŋkwa ta male nya ɗepema na.

²⁵Mawema ndeɗea nta na kwa wənəa ŋa ma, ghwetema ŋa newe ŋkwa ta nta ma.

²⁶Kwa nza ŋkɛ te cɛdɛ ɓɛhwɛ zlama male mefətekwə, ama kezha male ta za ne, mpia ŋkɛ pɛtɛ yaza wəndə.

²⁷Kaveyi ghwə wəndə kwa slibəa ŋkɛ kaɗema lekwesa ta ŋkɛ katere na?

²⁸Kadzeghwate dzeghwa wəndə te laɗe ta ghwə kaɗema ŋkɛ katendə ŋkɛ mbe seɗa na?

²⁹Tsetse ŋkɛ kaŋa wəndə nya kedzawa te zli yitea male ta nde ghedəkwəa ŋkɛ: yayata wəndə nya ketekwaɗe ŋkɛ nde tefa ghwene nya mbe.

³⁰Kaɓelama ghərə mbeli va nya ghərəve wəsə ŋkɛ kezha zeme va ma we.

³¹Ama vəa ŋkwa nya keseve ŋkɛ mbeli ne, kateŋki wəsə nya ghərəve ŋkɛ mberefaŋe zhigə, kateza pɛtɛa wəshi nyi ki ghɛa ŋkɛ ŋkɛ.

³²Ma wəndə nya kemene vale tahe le male ta za ne, nde dewə mehele ŋkɛ. Ma va nya mene ŋkɛ tsagha ne, kateza mpia ŋkɛ ŋkɛ.

³³Kateɗa ŋkɛ mbeli, katekelemte geva zləvə te ba'a katekiɗi hawe te we.

³⁴Kwa nza ŋkɛ ne, katezhɛre za nta zlɛ ghyanake ba'a katezhɛma heli ŋkɛ te və nya tewa ŋkɛ.

³⁵Wəsə shɛ kateyɛ ŋkɛ te ŋkwa ŋkɛ we, katezhɛre mehele ŋkɛ ya mbeli hwehwekɛ nda mɛ we.