Read kapsiki Yɛ Ghena Ŋela 9 Bible Online

Yɛ Ghena Ŋela 9 - kapsiki bible

Yɛ Ghena Ŋela 9

¹Nahe ntsehwele kefeɗete selə mberefaŋe, nahe ŋkɛ keŋate ghɛa ŋkɛ.

²Nahe ŋkɛ kehenekɛ wəshi keseɗa ba'a ketakɛ tɛ, kwa sebe ta ŋkɛ, pa takɛ wəshi kezeme.

³Pa ŋkɛ ghwenakɛ ka kwaterashia ŋkɛ kalə kaheka ŋkwa kwa ghəa wəmbə nyi mbe meleme. Ma ke hɛ sha zlape:

⁴«Gheyɛ ka dewə ntsehwele, nde mə teke!» Ma ke hɛ sha ka dewə zəzə:

⁵«Nde mə kazeme wəshi kezeme ta ɗa ba'a kasa tɛ nya takɛ 'ya.

⁶Sərəakɛ mə dewə ntsehwelea ŋayɛ yitea nza yɛ teghweme. Kelete mə hweŋkwa nya nza ɗepe wəsə kwa.»

⁷Ŋele yakema wəndə nya kegeze nda ghena ke nde kele ghə. Ŋ'wəshi yaŋ'we wəndə nya kegeze nda ghena ke nde 'yaghwa mehele.

⁸Ŋelema nde kele ghə na ma, kwa nza ŋkɛ kateɗe ntsə ta ŋa ŋkɛ we. Ama kenza na kaŋele nde ntsehwele ntsehwele ne, kateɗe ŋa ŋkɛ.

⁹Ncɛ nda ghena ke nde ntsehwele ntsehwele ne, katenza ŋkɛ ntsehwele ma. Teke nda wəshi ke wəndə nya tiɗiɗi, katembake geva ɗepe wəsə ta ŋkɛ.

¹⁰Hawe va Mahwətə ya kagha ta ntsehwele, ɗepe Shala nya keveyi geva tekeleke ya kaɗepe wəsə.

¹¹Ma 'ya nya kantsehwele ne, katemtsehe yɛ hɛa ŋa 'ya, katembake yɛ va ta ŋa 'ya.

¹²Ma kenza na kande ntsehwele ntsehwele ne, kaŋa ghəa ŋa nza na kentsehwele ntsehwele. Ma kenza na kande kele ghə ne, deke gha nde tefa ɗaŋeɗa ta ŋkɛ.

¹³Nahe gezhi kenza kala male nya kezlere zlere. Wəsə shɛ keɗepe nde va nya nza nde kagezhi we.

¹⁴Kantishɛ nde mɛa degha ta nta te tsəkwələ, dzeyi kwa ghəa wəmbə nyi mbe meleme.

¹⁵Tagha ne, kazlape mbeli nyi kedzeghwa dzeghwa ta nci kwa hweŋkwa nde.

¹⁶Ma ke sha hɛ: «Gheyɛ nyi kaka dewə ntsehwele, nde ŋkɛ teke.» Ma ke sha ka dewə zəzə:

¹⁷«Ma wəshi kesa nyi ghərəke mbeli ne, kezeɗe zeɗenji hɛ, ma wəshi nyi zeme mbeli tewəfərə ne, kezeɗe zeɗenji hɛ.»

¹⁸Keɗepe mbelia shɛhɛ sha mbelia kwahɛɗi lə hɛ ba'a kwa ghɛa mbelia kwahɛɗi mbeli nyi hekake nde we.