Read kapsiki Nde zlape ghena 10 Bible Online

Nde zlape ghena 10 - kapsiki bible

Nde zlape ghena 10

¹Ma zhiwə nyi kempə mpə ne, kabeze ba'a kave nda zəŋwə nya ndiremi hɛ ke n'yi kefi. Tsagha shɛnyɛ beze ntsehwele ba'a zləvə dewə mehele.

²Tiɗiɗi dzeghwa mehele ta nde ntsehwele ntsehwele, ama mezlawere mezlawere dzeghwa ŋa gezhi.

³Ya gezhi nza kadzeghwa kwa hweŋkwa ne, dewə nda mehele. Dzeghwa ta ŋkɛ nde ncɛ nda ke mbeli kagezhi ŋkɛ.

⁴Ma kebezenyɛ wənəa wəndə nya te ghəa ŋa va gha ne, wəfəyitema slene ta ŋa na ma. Kwa nza ŋkɛ ne, kaya ŋkwa nza gweɗakwe va fete nyi jama jama.

⁵Kwete wəsə kwa ndiremi nya nakɛ 'ya te hɛɗi lema ya shɛ, kala fete nya kembelenyɛ va wəndə nya te ghə:

⁶kaŋ'we slene nyi jama jama ka dewə mehele, ama kanza mbeli nyi nza zləvə te hɛ te slene nyi ɓɛhwɛ ɓɛhwɛ.

⁷Nahe 'ya kenakɛ ka mavashi pelɛ gədəwəa lɛmə, ama le seɗa dzeghwa mbeli nyi te ghə kala ka mavashi.

⁸Wərə wəndə nya kela ki kateɗe kadzawa ba'a wərə shishi kahaleve wəndə nya keŋa ŋkwa te zli.

⁹Wərə nde mpə pelɛ kaɗakɛ ghəa ŋkɛ le zhi ba'a wərə nde perawe sheghwə kavate ndiremi te ghəa ŋkɛ.

¹⁰Ma keɗema mbeli kamɗɛ tseyɛ nya kedərəfə dərəfə ne, nda mbeli kantsə berete kezha tsasle wəsə le. Kwa nza ŋkɛ ne, ntsehwele ya kawəsə nya kekele ŋkwa jive mbe kema.

¹¹Ma kehaleve ŋkwa shishi nya gweɗakweyi mbeli le ghwɛ ne, wa wəsə nya ketekɛ nde gweɗakwe wəshi le ghwɛ ŋkɛ le wa?

¹²Zeɗekə ghena nya kesame kwa mɛa nde ntsehwele ntsehwele, ama za yaza nde dewə ntsehwele mɛa ŋkɛ.

¹³Ghena gezhi yagha ŋkɛ kageze, ghena dewə mehele nya ndiremi yakeɗaŋe ŋkɛ kageze.

¹⁴Kwele kwele geze ghena nde dewə mehele. Ndagwara keɗepe wəsə nya ketemene geva wəndə ŋelɛ we. Wa nde tencɛ nda wəsə nya ketemene geva kwa sebe ta ŋkɛ wa?

¹⁵Kwele kwele leɓe gezhi va slene ta ŋkɛ. Ya hweŋkwa kedzembe meleme ne, keɗepe ŋkɛ we.

¹⁶Wa nya ndiremi te hɛɗi nya nza meghe nya mbe kamempɛhweta ba'a nya zeme wəshi kezeme mbeli nyi te ghə nyi mba ŋkwa masheke gɛ!

¹⁷Zlama ya va hɛɗi nya nza meghe nya mbe kawəzege ta wəndə nya nza zləvə te ba'a nya zeme wəshi kezeme mbeli nyi te ghə nyi mbe te vəa ŋkɛ, kezha kemave berete, kaɗema kezha ghwəyi.

¹⁸Kabete mezaɗe nya te cɛ kadzawa sleme va meɗə, kadzawa va hwa cɛa wəndə nya keɗema mene slene.

¹⁹Kata wəshi kezeme mbeli kezha zlama, kave nda farefa tɛ ke wəndə ba'a kamene yayata wəsə cɛdɛ.

²⁰Ŋelema meghe na mbe zəzə ta ŋa ma, gezema ghena na te nde mcɛlə ya mbe cɛa ŋa ma. Kwa nza ŋkɛ ne, wərə 'yɛ kaslə le ghena nyi gezete ba'a kaɓelate hɛ.