Read kapsiki Nde zlape ghena 12 Bible Online

Nde zlape ghena 12 - kapsiki bible

Nde zlape ghena 12

¹Zəzəte Nde pate ŋa vəa ŋkwa nya nza na kamempɛhweta. Zəzəte ŋkɛ tewə hɛ nyi ndiremi ndiremi kenaka kase ba'a tewə va nyi tegeze na: «Kefa zeɗe 'ya mbe nza teghweme we», a pa, kese,

²tewə veci ba'a waŋe kenza ngərə ngərə, tere ba'a yɛ saseregwa kenza dərəmbəzhiwə, ləmbə kezhɛneke geva kwa sebe ta va.

³Ma te vecia shɛ ne, katebare bare ka ya ghɛ, kategwəɗəŋə mbeli nyi berete berete, katefɛa mi kehə te vena, va nya ɗema hɛ kwele kwele, kateza sebe te ndeɗea mi nyi kenewe ŋkwa sawa te wəfela nyi te cɛ,

⁴kateŋzle geva gelembe nya mɛa hweŋkwa, kategweɗakwe gaka ta vena, kateghereŋe gaka ta yɛ 'yɛ, ba'a katedewəmte geva yɛ ciməa mi.

⁵Tagha gɛ, katezhɛ ŋkwa ghazlənə va dzeme vare wəmbə, katedake ŋkwa va dzeghwa kwa hweŋkwa, katezhɛre shinti ketɛawetɛa tɛawetɛanji kala ghwə ta wəfe ta amandiyɛ, katenza geva ɗaŋe ɗaŋe kala nzakwene nya keme te hɛɗi, kateslə mpia wəndə ŋelɛ kala nya teɗe ya ta wəfe. Tagha gɛ, katelə yayata wəndə sha ghɛa ŋkɛ nya kaghala ghala. Katedzawa hweŋkwa mi nyi kenehwene,

⁶nda teŋsle zewe kwa mze kwa tɛawetɛa, nda tepesle helape mze kwa tere tere, nda tempə ghwelepe mɛa ghwa, nda teŋsle zewe kegə yɛmə kadzawa belageji,

⁷nda tezhɛne geva slia geva ta ɓəmə kadzembe hɛɗi nya se ŋkɛ ba'a nda tezhɛne geva sefəa mpi kalə sha Shala nya kendeke nda ŋkɛ ke mbeli.

⁸Ma ke nde ntsehwele ntsehwele: «Gəmə wəshi pɛtɛ, wəsə shɛ kaketekɛ ŋkwa we.»

⁹Ma kwete wəsə nya kembakete geva ne, kenzanyɛ nde ntsehwele ntsehwele keteke nda wəsə nya ɗepe ŋkɛ ke mbeli we. Nahe ŋkɛ kese kazəzə te ghena ŋela kwele kwele, nahe ŋkɛ kefave zeweve ta nci ba'a ketseɓate hɛ megela.

¹⁰Nahe nde ntsehwele ntsehwele kendeke nda ghə ke zele ghena nyi zeɗe zeɗe ba'a nahe ŋkɛ kerafete ghena nyi kaganda tserame.

¹¹Ma ghena ta mbeli nyi kentsehwele ntsehwele ne, kala geta nyi lɛmelɛa lɛmelɛa va ka ya wəshi hɛ. Ma mbeli nyi kerafe yɛ palepa ne, kala wəshi kebaŋe wəshi nyi kebaŋeyi geva gəzə gəzə hɛ. Nya ya kawəsə nya kese va Shala nya kande ya ŋkwa kwetɛŋenyɛ.

¹²Wəzege ta ɗa, ya ghəa ŋa va mbake kwete wəsə kadzeyite. Rafe yɛ palepa ne, slene nya keɗema kakiɗi ŋkɛ, teke wəshi kwele kwele ne, leɓe ghə ŋkɛ.

¹³Wa nya kwa keɗaŋe ta pɛtɛa ghena nyi kegezete geva nya: Hawe va Shala ba'a mene slene le ghena nyi gezete ŋkɛ. Kaganda ne, nya ya kawəsə nya hi wəndə ŋelɛ kamene.

¹⁴Kwa nza ŋkɛ ne, katemeha ghwə Shala te pɛtɛa wəshi nyi menete gheɓəmə, ya nyi menete gheɓəmə tewəfərə ya ghenci nza keganji ganjinji keɗema kendiremi ndireminji.