Read kapsiki Nde zlape ghena 3 Bible Online

Nde zlape ghena 3 - kapsiki bible

Nde zlape ghena 3

¹Və ya shɛ kaŋa yayata wəsə nya kemene geva kwake te hɛɗi lema:

²və keya wəzege ba'a və kemte, və kemɓe wəshi ba'a və kenteɗe wəshi,

³və nya pesle ŋkwa ba'a və kembe ŋkwa, və keŋzla ba'a və keŋa,

⁴və kenehwene ba'a və keŋ'wəshi, və keŋələvə ba'a və kewetse,

⁵və kebeza pelɛ ba'a və ketsene pelɛ, və kehəməwə ŋkwa ba'a və keɗema həməwə ŋkwa,

⁶və kesepa ba'a və keza, və kewəfərə wəsə ba'a və kenegha wəsə,

⁷və keŋkwahe ba'a və kentsəzlə, və kenza divə ba'a və kegeze ghena,

⁸və keɗe ba'a və keɗema, və kempa ba'a və kenza kwelɛŋe.

⁹Wa meleɓe nya ŋ'wete nde mene slene mbe slene ta ŋkɛ tse wa?

¹⁰Nahe 'ya keneweve slene nya ndeke nda Shala ke mbeli kamene.

¹¹Ganyɛke menete yayata wəsə Shala te vəa ŋkɛ. Nahe ŋkɛ kendeke nda zəzə keɗepe wəshi nyi kemenete geva ba'a nyi ketemene geva ke wəndə ŋelɛ perə. Ndagwara kaɗepete pɛtɛa wəshi nyi mene Shala wəndə ŋelɛ we.

¹²Tsagha gɛ ne, pa 'ya ɗepete: ma zeɗe nza nya shɛ kaŋa wəndə ŋelɛ ne, deke zlama nya zlama ŋkɛ ba'a deme nya fa ŋkɛ te nza teghweme.

¹³Ma vəa ŋkwa nya zeme wəsə kezeme, nya sa wəsə kesa ba'a nya zlama wəndə te wəshi nyi kemave ŋkɛ mbe pɛtɛa slene ta ŋkɛ ne, wəsə gəmə nya ndeke nda Shala ŋkɛ.

¹⁴Nahe 'ya keɗepe, ma yayata wəsə nya mene Shala ne, kaghala ghala tenza ŋkɛ. Wəsə shɛ kambakeyite geva keɗema kantamte geva yite we. Ma nda menete Shala kala nya ne, kezha hawe mbeli ve.

¹⁵Ma wəsə nya kemene geva tsetsenya ba'a nya ketemene geva te kwete hɛ ne, nahe ŋkɛ kegha kamenete geva vəashi. Shala nde zhɛne ghwelə yite wəshi nyi kezanji vəashi.

¹⁶Wa nya kwete wəsə nya neweve 'ya kwake te hɛɗi lema nya ɓiyitsa: 'yaghwa mehele nde mene geva te ŋkwa nya hi mbeli kamene va wəsə nya tiɗiɗi. Ma te ŋkwa nya meha ghwə mbeli ne, 'yaghwa mehele nde kelehwe ŋkwa.

¹⁷Tagha gɛ, ma 'ya mbe ghəa ɗa: katemeha ghwə Shala te wəndə nya tiɗiɗi ba'a wəndə nya 'yaghwa mehele. Kwa nza ŋkɛ ne, və ya shɛ kaŋa yayata wəsə ba'a kaŋa yayata slene.

¹⁸Ma 'ya mbe ghəa ɗa te ghəa mbeli: dzeghe yadzeghe hɛ Shala kezha ncɛ nda ke hɛ kaɗema hɛ za ma ke wəshi keseɗa.

¹⁹Kwa nza ŋkɛ ne, wəsə nya kwetɛŋe nde temene nda geva ke mbeli ba'a ke wəshi keseɗa. Mpi nya kwetɛŋe ya hwa mbeli ba'a hwa wəshi keseɗa, pɛtɛa nci katempə. Kenza mbeli za ma ke wəshi keseɗa we, kwa nza ŋkɛ ne, gəmə wəshi pɛtɛ.

²⁰Te ŋkwa nya kwetɛŋe telə pɛtɛa wəshi nyi nza mpi hwe, shave mbe hɛɗi nya pate geva hɛ le shave pɛtɛa wəshi nyi teghweme, pɛtɛ tezhɛne geva hɛ kadzembe hɛɗia shɛ.

²¹Wa nde geze dzeme yitea ghweme dzeme mpia mbeli, ama dzawa mbe hɛɗi dzawa ŋa wəshi keseɗa, ke wa?

²²Ma zeɗe nza ta wəndə ŋelɛ neweve 'ya ne, deke fa deme te zhɛme ta slene ta ŋkɛ. Kwa nza ŋkɛ ne, gheŋkɛ ya kaŋa ŋkɛ bela. Wa nde tezhɛneke ŋkɛ kezha newe wəshi nyi ketemene geva kwa sebe ta ŋkɛ wa?