Read kapsiki Nde zlape ghena 4 Bible Online

Nde zlape ghena 4 - kapsiki bible

Nde zlape ghena 4

¹Ɓiyitsa ne, nahe 'ya keneweve yaka nyi sa mbeli ke mbeli kwake te hɛɗi lema. Kanehwene ka dewə ŋeli, ama wəndə shɛ kezha gweɗakwe hɛ we. Va mbeli nyi kesa nda yaka ke hɛ nza berete, ama wəndə shɛ kezha gweɗakwe hɛ we.

²Ma sha 'ya ne, zeɗe nza ma va mbeli nyi kempənji ke mbeli nyi mba teghweme.

³Ama zeɗe nza ma va wəndə nya keyakema geva ke hɛ bake nci. Kwa nza ŋkɛ ne, kenakɛ wəshi nyi ndiremi ndiremi nyi kemene geva kwake te hɛɗi lema ŋkɛ we.

⁴Nahe 'ya kenakɛ ɓiyitsa tsema tsema ntsə geva ba'a ve nda ghə mbeli ke slene kezha ndakɛ berete ta kweci mbeli. Gəmə ba'a kese sefə ŋkɛ perə.

⁵Kaganda ne, ghəa ŋkɛ yapesle nde dewə mehele nya keɗema kamene slene le ma.

⁶Megela ma zhɛnakɛ mpi ɓɛhwɛ ke pesle ghə le slene nya kakese sefə.

⁷Nahe 'ya keneweve kwete wəsə nya gəmə ɓiyitsa kwake te hɛɗi lema:

⁸pa kwete wəndə kwetɛŋenyɛ, kaɗema kwete wəndə vare, nya ɗema wəzege keɗema wəza ma ve. Ghala kwa slene nyi mene ŋkɛ we, kegha ntsə ta ŋkɛ kabehe va mcɛlə we. Ndagwara ma ke sha 'yɛwe va ghəa ŋkɛ: «Ke wa mene nda slene 'ya tse wa? Yitea wa fɛa nda zeɗe nza 'ya ke ghəa tse wa?» Wəsə nya kala nya ɓiyitsa ne, gəmə ŋkɛ, kwete ŋkɛ wəsə kwa ndiremi.

⁹Za ma mbeli bake ke wəndə kwetɛŋe, kwa nza ŋkɛ zhɛme ganyɛ yaŋ'we hɛ te slene nya mene hɛ.

¹⁰Ma keteɗe kwete wəndəa nci ne, kakese ŋkɛ kwete sate te ŋkwa. Ama ndiremi ya te wəndə nya kwetɛŋenyɛ. Ma keteɗe ŋkɛ ne, wəndə shɛ kezha kese ŋkɛ sate te ŋkwa we.

¹¹Ɓiyitsa, ma keɓelahe hɛ bake nci te ŋkwa nya kwetɛŋe ne, ɓete ɓete nza geva ta nci. Ama wəndə nya kwetɛŋenyɛ ne, tsema tenza geva ta ŋkɛ ɓete ɓete wa?

¹²Ma kenza kwete wəndə kahərəte wəndə nya kwetɛŋenyɛ ne, wərə mbeli bake kazhɛnete nda ghə. Ma zewe nya nderete mbeli le zewe mahekene ne, kaŋsle ŋkɛ kahe kahe we.

¹³Ganyɛ ma mempɛhweta nya kande titikwə, ama kentsehwele ntsehwele ŋkɛ ke meghe nya kehale hale, ama kagezhi nya keɗema kayɛ ntsehwele nya ncɛ nda mbeli ŋkɛ,

¹⁴ya mempɛhweta shɛ same kwa daŋgayɛ kezha nza meghe, ya gheŋkɛ se kande səkwə wəshi te hɛɗia ŋkɛ.

¹⁵Nahe 'ya keneweve tsema tsema rəkwə geva pɛtɛa mbeli nyi te hɛɗi lema yitea mempɛhweta nya ketedzete meghe te ŋkwa meghe nya vəashi.

¹⁶Kanza ŋkɛ te ghəa mbeli kwele kwele. Ndagwara katezlama hwelefefi nyi keteya kwa sebe yite we. Kwa nza ŋkɛ ne, gəmə ba'a kese sefə ŋkɛ perə.

¹⁷Ntsehwele yitea dzeghwa ta ŋa vəa ŋkwa nya dzembe ghɛa Shala na, dzembe kezha fa ghena kenya dzeghe melɛ na kala ka gezhia kɛfi. Kwa nza ŋkɛ ne, keɗepe hɛ wəsə kwa ndiremi yamene hɛ we.